«Социальнэ IофышIэ анахь дэгъу» зыфиIорэ зэнэкъокъур апэрэу Адыгеим щызэхащагъ.

Урысыем социальнэ IофышIэм и Мафэу къэблагъэрэм ипэгъокIэу АР-м IофшIэнымкIэ ыкIи социальнэ хэхъоныгъэмкIэ и Министерствэ Iофтхьабзэр ригъэкIокIыгъ. Ащ районхэм ащыкIогъэ зэнэкъокъухэм текIоныгъэ къащыдэзыхыгъэхэр хэлэжьагъэх.
ЗэхэщакIохэм къызэрэхагъэщыгъэмкIэ, зэнэкъокъум пшъэрылъ шъхьаIэу иIэр социальнэ IофышIэхэм IэпэIэсэныгъэу аIэкIэлъымкIэ зэхъожьыгъэнхэр, ясэнэхьат имэхьанэ къэIэтыгъэныр, Iоф­шIакIохэр нахьыбэу социальнэ учреждениехэм къящэлIэгъэнхэр ары.
Iофтхьабзэм хэлажьэхэрэм шIуфэс гущыIэкIэ закъыфигъэзагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.
— ПшъэдэкIыжь ин зыпылъ IофшIэн къин шъогъэцакIэ, ар хэти къыгурыIон ыкIи уасэ фишIын фае. ЩыIэныгъэм чIыпIэ къин ригъэуцогъэ нэбгырэ мин пчъагъэмэ: зыныбжь хэкIотагъэхэм, сэкъатхэм, сабыибэ ыкIи гъот макIэ зиIэхэм, зянэ е зятэ зышъхьарымытыжьхэм, нэмыкIхэми шъуиIэпыIэгъу, джащ фэдэу шъуигукIэгъу зэхашIэ, ар нафэ къашIы мафэ къэс фэIо-фашIэу афэжъугъэцакIэрэм. Мы мафэм ехъулIэу социальнэ IофышIэ нэбгырэ 530-рэ ыкIи ахэм яIэпыIэгъуи 153-рэ тиреспубликэ щэлажьэ. IофшIэн мыпсынкIэу жъугъэцакIэрэм гухахъо хэжъугъотэнэу, шъуи­щытхъу яжъугъэIонэу шъуфэсэIо. Iэпэ­Iэсэныгъэу шъуIэкIэлъымкIэ шъузэхъо­жьынымкIэ мы зэнэкъокъур амалышIоу щыт. Арышъ, текIоныгъэ къыдэшъухынэу зэкIэми сышъуфэлъаIо, — къыIуагъ Мырзэ Джанбэч.
ЦIыфхэм социальнэ фэIо-фашIэхэр афэзыгъэцэкIэрэ Зэхэубытэгъэ гупчи 9-мэ ялIыкIохэр, Адыгеим имуници­пальнэ образование пэпчъ къикIыгъэхэр зэнэкъо­къум хэлэжьагъэх. Ахэм зэу ащыщ Теуцожь районым къикIыгъэ ­КIыкI Маринэ.
— Мы сэнэхьатым сыфеджагъэу щытэп, ау IэпыIэгъу зищыкIагъэхэм, анахьэу нэжъ-Iужъхэм, сишIуагъэ язгъэ­кIыныр шэнышIу зэрэсфэхъугъэм къы­хэкIэу мы IофшIэныр къыхэсхыгъ. ИлъэсиплI хъугъэу цIыфхэм фэIо-фашIэхэр афэзыгъэцэкIэрэ учреждением Iоф щысэшIэ. Мыщ фэдэ зэнэкъокъухэм апэрэу сыхэлажьэ. IэпэIэсэныгъэу тIэкIэ­лъымкIэ тызэхъожьынымкIэ мы зэнэкъо­къур амалышIу, — къыIуагъ Маринэ.
Зэнэкъокъум хэлажьэхэрэм едзы­-гъу­и­­щ­­кIэ заушэтыгъ. «Визитная кар­точка» зыфиIорэм хахьэу социальнэ IофышIэ­хэм якъэбар, сэнэхьатыр къыхахыным лъапсэ фэхъугъэр къаIотагъ. ЯтIонэрэ уцугъом социальнэ фэIо-фашIэхэм япхыгъэ хэбзэ­гъэуцугъэр зэрашIэрэмкIэ заушэтыгъ. Ящэнэрэм чIыпIэ къин ифэ­гъэ цIыфым ищыкIэгъэ IэпыIэгъур зэрэ­ригъэгъотырэ шIыкIэр IофышIэм къыгъэлъэгъон фэягъ.
ОсэшIхэм ахэтыгъэх министрэу Мырзэ Джанбэч ыкIи министерствэм иотделхэм япащэхэр.
Зэнэкъокъум икIэуххэр ясэнэхьат мэфэкI ипэгъокIэу мэкъуогъум и 7-м зэфахьысыжьыщтых. Апэрэ чIыпIэр къыдэзыхыгъэм сомэ мин 15, ятIонэрэ ыкIи ящэнэрэ хъухэрэм сомэ мин 15 ыкIи мини 5 аратыщт.
КIарэ Фатим.
Сурэтыр: Iэшъынэ Аслъан.