Бзылъфыгъэхэм ащыщхэм хэбзэухъумэкIо къулыкъухэм IэнатIэ зэрэщаIыгъырэр бгъэшIэгъожьынэу щытэп. Ахэм ящытхъу арагъаIозэ Iоф ашIэ.

БзэджашIэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу Адыгэ Республикэм щыIэм ихьапс-поселениеу N 6-м пIуныгъэ IофымкIэ отрядым ипащэу Фатима Барановар ахэм зэу ащыщ.
Уголовнэ-гъэцэкIэкIо системэм апэу къулыкъур щыригъэжьагъ. ИIофшIэн хэшIыкI дэгъу фыриIэу мыщ пытэу хэ­уцуагъ. Мы илъэсым гъэтхапэм и 1-м хэгъэгу кIоцI къулыкъум иподполковник зэрэхъугъэр къэзыушыхьатырэ тэмэтелъыр къыфагъэшъошагъ. Илъэс пчъагъэ хъугъэу Мыекъуапэ дэт хьапс-поселениеу N 6-м иотряд ипащэу Iоф ешIэ.
— Отрядым ипащэу Iоф пшIэным пае системэм хэшIыкI дэгъу фыуиIэн фае. Бзылъфыгъэ­хэр зыщагъэпщынэхэрэ хьапсыр пштэмэ, хэгъэгу кIоцI къулы­къум иподполковник ухъуным пае Iэпэ­Iэсэныгъэшхо пхэлъынэу щыт. Фатимэ Салбый ыпхъум иIофшIэн хэшIыкI дэгъу фыриI, уголовнэ-гъэцэкIэкIо системэм иофицер пэрыт,— еIо бзэджа­шIэхэм пшъэ­дэкIыжь ягъэ­хьыгъэ­нымкIэ федеральнэ къу­лыкъум и ГъэIорышIапIэу Адыгэ Рес­публикэм щыIэм ипащэу Виталий Перхорович.
Фатимэ Мыекъуапэ къы­щыхъугъ, къалэм дэт гурыт еджапIэу N 13-м щеджагъ. Спортыр икIасэу кружокхэм кIощтыгъэ, дэн-бзэн курсыр къыухыгъ, еджапIэм иобщественнэ щыIакIэ чанэу хэлажьэщтыгъ.
1990-рэ илъэсым офицерэу Александр Барановым шъхьэгъусэ фэхъугъ. Ипсэогъурэ ежьыррэ зэгъусэхэу апшъэрэ дзэ еджапIэр къаухыгъ, нэужым КъокIыпIэ Чыжьэм IофшIапIэкIэ агъэкIуагъэх. 1991-рэ илъэсым Барановхэм яунагъо пшъэшъэжъые къихъухьагъ, ащ цIэу фаусыгъэр Кристина. Нэужым Мыекъуа­пэ къагъэзэжьыгъ. 1995-рэ илъэсым Александр бзэджашIэхэм пшъэдэкIыжь ягъэхьыгъэнымкIэ федеральнэ къулы­къум и ГъэIорышIапIэ къулыкъур щыригъэ­жьагъ. ­
Фатимэ Мыекъопэ къэралыгъо технологическэ институтым экологиемкIэ ифакультет къыухыгъ. Ишъхьэгъусэ иIофшIэн кIэлъыплъызэ пшъэдэкIыжьэу пылъыр дэгъоу къыгурыIощтыгъ. Ежьми ицIыкIугъом къыщыублагъэу полицие шъуашэ щыгъынэу зэрэкIэхъопсыщты­гъэр щыгъупшагъэп, бзэджашIэхэм апэуцужьыгъэныр ипшъэрылъэу зыфигъэуцужьыгъ.
2004-рэ илъэсым бзэджашIэхэм пшъэ­дэкIыжь ягъэхьыгъэнымкIэ федеральнэ къулыкъум и ГъэIорышIапIэ граждан IэнатIэ иIэу Iухьагъ, нэужым тэмэтелъ къыратыгъ. 2012-рэ илъэсым къыщы­ублагъэу апэ бзылъфыгъэхэр зыщагъэ­пщынэхэрэ хьапсым пIуныгъэ IофымкIэ подразделением щылэжьагъ, мы мафэхэм Мыекъопэ хьапс-поселениеу N 6-м Iоф щешIэ.
— Бзылъфыгъэ купым уахэтэу Iоф пшIэнымкIэ мы IэнатIэр еджэпIэ ­шъыпкъ.­ Хьапсым дэс бзылъфыгъэхэм ренэу сахэт, ахэм угу афызэIухыгъэу уахэтын фае, армырмэ цыхьэ къыпфашIыщтэп. Ащ къыхэкIэу социальнэ IофышIэу, психологэу ыкIи гъэсакIоу ахэм сахэт, — еIо Фатимэ.
Отрядым ипащэ иIофшIэн ренэу жъот, псынкIэу бгъэцэкIэн фэе IофшIэныр ихъой зэпыт. Арышъ, шIуагъэ къытэу мафэр зэригъэкIощтым пылъ ыкIи ар къыдэхъу. Хьапсым чIэсхэм ыкIи ахэм азыфагу ихъухьэхэрэм, язэфыщытыкIэхэм ренэу ынаIэ атырегъэты, мы­хъун зекIуакIэхэр къахэмыфэнхэм лъэплъэ.
Отрядым ипащэ Iофым изытет ыкIи хъугъэ-шIагъэм дэгъоу ащыгъозэн, хьапсым чIэсхэм цыхьэ ыкIи шъхьэкIафэ къыфашIыным фэшI иIофшIэн шIу ылъэ­гъун, IэпэIэсэныгъэшхо хэлъын фае. Фатимэ лъэныкъо зэфэшъхьафхэр къыз­фигъэфедэхэзэ хьапс зытелъхэм пIуныгъэм епхыгъэ IофшIэн игъэкIотыгъэхэр адызэрехьэ ыкIи ащкIэ къэгъэлъэгъонышIухэр иIэх.
Мафэ къэс хэгъэгу кIоцI къулыкъум иподполковникэу Фатима Барановам учреждениер къызэлъекIухьэ, къэбзэныгъэм лъэшэу лъэплъэ. Зэрэшхэхэрэм, Iоф зыщашIэрэ цехым ынаIэ атет. Ащ нэмыкIэу документхэм, хьыкумым, очылхэм, нэмыкIхэми Iоф адешIэ.
Зыгъэпсэфыгъо уахътэм отрядым иIофышIэхэм хьапсым чIэсхэм кружокхэр, тхылъеджэныр, декоративнэ-прикладной творчествэр, театральнэ ыкIи спорт лъэныкъохэм апылъхэм Iофтхьэ­бзэ зэфэшъхьафхэр афызэхащэх.
— Тэ, хьапсым чIэсхэм ащ ты­дэгущыIэ зыхъукIэ психологическэу ­­гу­ха­хъо хэтэгъуатэ. Дэ­гъоу ­­тыкъы­гу­рэ­Iо, упчIэжьэгъу къы­тфэхъу, ишIуагъэ къызэрэтигъэ­кIыщтым ренэу пылъ. Мыщ фэдэ къулыкъушIэу IофшIэныр зищыIэныгъэу щыIэр макIэ. Лъэшэу тигуапэ мыщ фэдэ пащэ зэрэтиIэр, — аIо хьапсым чIэс бзылъфыгъэхэм.
— Сэ зэрэслъытэрэмкIэ, мы Iоф­шIэныр бзылъфыгъэм зэрифэшъуашэу ыгъэцэкIэн ылъэ­кIыщт. Нэбгырэ пэпчъ щыIэныгъэ гъогоу къыкIугъэм елъытыгъэу ежьхэр зэгурэIожьых. Анахь шъхьа­Iэр угу зэIухыгъэу уадэгущыIэныр ары. Хьапсым чIэсхэм лъэшэу унаIэ атетын фае, сыда пIомэ ахэм цыхьэ къы­тфашIы, тиIэпыIэгъу къежэх, — еIо отрядым ипащэ.
Фатимэ ыпхъоу Кристинэ янэрэ ятэрэ ялъагъо рэкIо, уголовнэ-гъэцэкIэкIо системэм икъулыкъушI. Мы уахътэм ар капитан. Ащ икIалэхэу Александррэ Артемрэ янэжъ-ятэжъхэм ыкIи янэ-ятэхэм афэдэу мы къулыкъум ящыIэныгъэ гъогу рапхыным кIэхъопсых.
В. Аведов.
Сурэтыр: ГъэIорышIапIэм ипресс-къулыкъу