Проектэу «Урысые ыкIи дунэе зэнэкъо­къухэм ялауреатхэм яконцертхэр»
зыфиIоу Мыекъуапэ щыкIуагъэм хэлэ­жьагъэх зэлъашIэрэ ныбжьыкIэ музы­кантхэр. Урысые Федерацием культу­рэмкIэ и Министерствэ ипшъэрылъкIэ ащ кIэщакIо фэхъугъ АНО-у «ЛIэшIэ­гъукI» зы­фиIорэр.

АР-м иконцерт объединение икъэралыгъо симфоническэ оркестрэ лъэхъаным изэфэшIыжьын иIагъ. ЖъоныгъуакIэм и 23-м Адыгеим и Къэралыгъо филармоние концертэу щыкIуа­гъэм ныбжьыкIэ музыкантхэр хэлэжьагъэх.
Урысые Федерацием культу­рэмкIэ и Министерствэ кIэщакIо зыфэхъугъэ Iофтхьабзэу 2020-рэ илъэсым къыщыублагъэу зэхащэрэм ныбжьыкIэхэм ятворчествэ зегъэушъомбгъу­гъэным фэIорышIэ.
ШIуагъэ къэзытырэ проектыр лъагъэкIуатэ. Илъэс къэс къэралыгъом икъэлэ зэфэшъхьаф­хэм ащыпсэурэ цIыфхэм сэнаущыгъэ зыхэлъ ныбжьыкIэхэм ятворчествэ нэIуасэ фэхъунхэ амалхэр яI.
Мы илъэсым лауреатхэм ягастрольхэр къэлиблымэ ащыкIощтых: Тамбов, Мыекъуапэ, Великий Новгород, Старая Русса, Хабаровскэ, Благовещенск ыкIи Пензэ.
Къэгъэлъэгъоным изэхэща­кIохэм пшъэрылъ шъхьаIэу яIэр хэгъэгу ыкIи лъэпкъ искусствэр къызэтегъэнэгъэныр, тапэкIэ хэхъоныгъэ егъэшIыгъэныр, цIыфхэр академическэ искусствэм нэIуасэ фашIыхэзэ нахь зэпэблагъэ хъунхэр, зэлъашIэгъэ композиторхэм афэшъхьа­фэу музыкант ныбжьыкIэхэми нэIуасэ афашIынхэр ары. Урысыем ишъолъырхэм зыкIыныгъэ зэряIэр ащ къыщыхэщыгъ.

Концертым хэлэжьагъэх АР-м исимфоническэ оркестрэ ихудо­жественнэ пащэу ыкIи идири-
жер шъхьаIэу СтIашъу Къэп­лъан, оркестрэм идирижерэу, Адыгэ Республикэм изаслуженнэ артистэу Аркадий Хуснияровыр. Джаущтэу къэгъэлъэгъоныр къа­гъэбаигъ музыкант ныбжьыкIэхэу, дунэе зэнэкъокъухэм ялауреатхэу Федор Освер, Станислав Корчагиным, Максим Лисииным.
Ахэм гущыIэгъу тыфэхъугъ.
— ЦIыфхэм якультурэрэ ягъэсэныгъэрэ зыкъязыгъэIэ­тыщт, ахэр музыкальнэ классическэ искусствэм фэзыщэщтхэ творческэ проект гъэшIэгъонэу мыр щыт, — ыIуагъ форте­пианэм къезыгъэIорэ Стани­слав Корчагиным.
— Симфонием пIуныгъэ мэхьанэшхо къыхэщы. ЩыIэны­гъэм, шIушIагъэм, цIыфым ипсэу­кIэ ар ащызэхэохы. Симфоническэ произведениехэр куоу гъэпсыгъэх. Музыкэр къы­зэрыкIоп. Композиторым цIыфым ипIун мэхьанэу ритырэр гукIэ къыхэсэхы, тамэ къызгуе­гъакIэ. Къэгъэлъэгъоным едэ­Iухэрэр мэкъэмэ дахэм ижьыкорен рехьыжьэх. Адыгеим щы­псэухэрэм фэбэныгъэу къыс­пагъохыгъэм лъэшэу сырыраз, — къыIуагъ Максим Лисиин.
— ЩыIэныгъэр мэкъамэкIэ къэпIотэн плъэкIыщт. ЦIыфым игушъхьэ кIуачIэ зэрэлъэшыр музыкэм къыхэтэгъэщы. ЕдэIу­хэрэр егъэщхых, егъэгушIох, регъэгупшысэх. Адыгеим ты­къызэрэкIуагъэм осэ ин есэты, — къыIуагъ Федор Освер.
Iофтхьабзэу Мыекъуапэ щыкIуагъэр лектор-музыковедэу Хьакъуй Заремэ зэрищагъ.
Артистхэм искусствэр зышIогъэшIэгъонхэр, симфоническэ оркестрэм хэтхэр аIукIагъэх, къэбархэр къызэфаIотагъэх, нэ­пэеплъ сурэтхэр атырахыгъэх.
Филармониер щыIэныгъэм ихъугъэ-шIагъэхэм ягупчэ ит, цIыфхэр зэфещэх. Музыкант-
хэм къагъэхьазырыгъэ къэгъэлъэгъоным гухахъо хагъуатэу цIыфхэр еплъыгъэх.