УФ-м культурэмкIэ и Министерствэ ыгъэнэфэгъэ Iофтхьабзэмэ адиштэу Луганскэ академическэ нысхъэпэ театрэм игастрольхэр къэралыгъом ишъолъырхэм ащэкIох.

Мы илъэсым театрэм ­ыныбжь илъэс 85-рэ зэрэхъугъэм ихэгъэунэфыкIын ахэр къыдыхэ­лъытагъэх.
«УФ-м культурэмкIэ и Ми­нистерствэ «Гастроль инхэр» зы­фиIорэ программэу зэхигъэу­цуагъэм культурэм хэхъоныгъэ ышIынымкIэ, цIыфхэр, лъэпкъхэр нахь зэрэшIэнхэмкIэ мэхьанэшхо иI. Ащ хэщагъэхэу ежьхэм творческэ кIуачIэу яIэр амы­гъэ­хьаулыеу зыкъагъэлъэгъон, зарагъэшIэн амалхэр къазэрэритырэм ишIогъэшхэ къэкIонэу тыщэгугъы», — хигъэунэфыкIыгъ УФ-м культурэмкIэ ими­нистрэу Ольга Любимовам.

— Адыгеир театральнэ шъо­лъырэу, Мыекъуапэ театральнэ къалэу зэрэщытыр тигуапэу хэдгъэунэфыкIыгъ. Республикэм икIэлэцIыкIухэм тикъэгъэлъэ­гъонхэр къафэтщагъэх. С. Козловам ипьесэ техыгъэ спектак­лэу «По зеленым холмам океа­на» ыкIи М. Бартеневым ытхыгъэу «Считаю до пяти..» зыфиIорэм техыгъэ къэгъэлъэгъоныр Мыекъуапэрэ Тэхъутэмыкъуаерэ къащыдгъэлъэгъощт. КIэлэцIыкIухэм шIумрэ емрэ зэхафын алъэкIын амал яIэщт. Ныбджэгъу уиIэным имэхьанэ алъыдгъэIэсыщт. Къэгъэлъэгъон­хэм кIэлэцIыкIумэ гухахъо хагъотэщт. ТищыIэныгъэ лъэкIуатэ, мамырэу тыпсэу тшIоигъу, пшъэрылъ шъхьаIэу тиIэр творчествэр ары, — хигъэунэ­фыкIыгъ Луганскэ нысхъэпэ те­атрэм ипащэу Сергей Терновым.
Нахь пасэу мы Iофтхьабзэр зэхащэнэу щытыгъ, ау ащ хэлэжьэрэ хъулъфыгъэ артистхэр хэушъхьафыкIыгъэ дзэ операцием хэлэжьэнхэу зэрэдэкIыгъэхэм ыкIи зэкIэми къызэрамыгъэзэжьышъугъэм къыхэкIэу ар зэкIахьан фае хъугъэ. «Гаст­роль инхэр» къызщежьэщт уахъ­тэм ехъулIэу мы артистхэм ачIы­пIэ иуцощтхэр агъэнафэхи, къэгъэлъэгъоныр икIэрыкIэу агъэуцужьыгъ.
— МэфитIурэ кIощт Iофтхьабзэм пшысэхэр къыщыдгъэлъэгъощт. ШIушIэным имэхьанэ, цIыф шэн-хабзэхэр, лIыгъэр, шIулъэгъур, ныбджэгъумэ зыкIы­ныгъэу ахэлъыр тиартистхэм къыраIотыкIы. Спектаклэхэм кIэ­лэцIыкIухэр, ны-тыхэр яплъы­хэмэ, цIыфхэм язэфыщытыкIэ­хэмрэ пшысэмрэ зэрагъапшэхэзэ зэфэхьысыжьхэр ашIыщтых, — къыIуагъ ЛНР-м изаслуженнэ артистэу Елена Маловам.
Луганскэ нысхъэпэ театрэм иактерхэм къагъэлъэгъогъэ спек­таклэхэм ежьхэм яекIолIакIэ къахэщэу гъэпсыгъагъэх.
Луганскэ нысхъэпэ театрэм икъэгъэлъэгъонхэр Къалмы­къым, КъБР-м, Ставрополь, Ростов-на-Дону, Краснодар ащы­кIощтых.
Театрэм игастрольхэр Адыге­им щыпсэурэ цIыфхэм шIукIэ агу къинэжьыщт.