Тиспортсменхэм гъэхъэгъэшIухэр ашIыгъэх
Адыгеим идзюдоистхэм жъоныгъокIэ мазэм икIэух дэгъу дэдэу зыкъагъэлъагъо. Зэнэкъокъуищмэ къэбар гушIуагъохэр къарыкIыгъэх, тиспортсменхэм медали 5 къыдахыгъ.
Дунэе мэхьанэ зиIэ турнирэу «Локодзюдо» зыфиIорэм республикэ спорт еджапIэу Я. Коблым ыцIэ зыхьырэм зыщызыгъэсэрэ нэбгыритIумэ медальхэр къыщахьыгъэх. Зэнэкъокъухэр Башкортостан щыкIуагъэх, зыныбжь илъэс 11-м нэмысыгъэ кIэлэцIыкIухэр ары зызыушэтыгъэхэр. Килограмм 46-рэ къэзыщэчыхэрэм якуп хэтыгъэ Хьасанэкъо Алый текIоныгъэр къыдихыгъ, Хьакурынэ Даутэ ятIонэрэ чIыпIэр къыфагъэшъошагъ. НэбгыритIуми ятренерыр Хьакурынэ Дамир.
Дунэе зэнэкъокъоу «RussianJudoTour» зыфиIорэм джэрз медаль къыщихьыгъ республикэ спорт еджапIэу Я. Коблым зыщызыгъэсэрэ Датхъужъ Алый. Ащ итренерыр Беданэкъо Рэмэзан. В. С. Ощепковым ишIэжь фэгъэхьыгъэ турнирым Урысыем ишъолъыр 27-мэ къарыкIыгъэ спортсмен анахь лъэшхэм ямызакъоу, IэкIыб къэралыгъо 14-мэ ялIыкIохэр хэлэжьагъэх. Адыгеир нэбгыри 7-мэ къагъэлъэгъуагъ.
Джащ фэдэу дзюдомкIэ Урысыем ичемпионат республикэм илIыкIохэм медалитIу къыщахьыгъ. Мыщ хэлэжьагъэхэр зэхэзымыхырэ спортсменхэр ары. Къэралыгъом гъогогъу пчъагъэрэ ичемпионэу Беданэкъо Заур тыжьын медаль къыфагъэшъошагъ, Инна Кибиткинар чемпионкэ хъугъэ. НэбгыритIури зыгъасэхэрэр Урысыем изаслуженнэ тренерэу Беданэкъо Байзэт.