Лъэныкъо зэфэшъхьафхэмкIэ къэралыгъо ыкIи муниципальнэ фэIо-фашIэхэр зыщагъэцэкIэрэ Унэгъо гупчэ селоу Красногвардейскэм дэт социальнэ-зэтегъэуцожьын Гупчэу «Доверие» зыфиIорэм къыщызэIуахыгъ. Мыр республикэмкIэ ятIонэрэ Унэгъо гупчэ хъугъэ.

МэфэкI шIыкIэм тетэу рекIокIыгъэ Iофтхьабзэм хэлэжьагъэх АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч, ащ игуа­дзэу Екатерина Леоновар, Красногвардейскэ районым ипащэу Гъубжьэкъо Темур, кIэ­лэ­цIыкIухэм яфитыныгъэхэр къэухъу­мэгъэнхэмкIэ Уполномоченнэу АР-м щыIэ Наталья Агеевар.
Къэзэрэугъоигъэхэм шIуфэс гущыIэ­хэмкIэ министрэм закъыфигъэзагъ.
— Сабый зэрыс унагъохэм тынаIэ атедгъэтыныр ыкIи ящыкIэгъэ IэпыIэгъур ядгъэгъотыныр пшъэрылъ шъхьа­Iэу Адыгеим и ЛIышъхьэу КъумпIыл Мурат къытфегъэуцу. Ащ епхыгъэу рес­публикэм щагъэпсырэм зэкIэм ащ иIэпыIэгъу хэлъ. КIэлэцIыкIухэр зэрыс унагъохэм ящыIэныгъэ изытет на­хьышIу шIыгъэным мы гупчэр фэIоры­шIэщт. КъяолIэщтхэм шапхъэхэм атетэу социальнэ IэпыIэгъу зэрарагъэгъотыщтым, мыщ иIофышIэхэм япшъэ­рылъхэр зэрифэшъуашэу зэрагъэцэкIэщтхэм сицыхьэ телъ, — къыIуагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.
ГущыIэр лъигъэкIотагъ Красногвардейскэ район администрацием ипащэ. Унагъом и Илъэсэу агъэнэфагъэм тефэу мы гупчэу къызэIуахыгъэм районымкIэ мэхьанэшхо иIэу зэрэщытыр ащ хигъэ­унэфыкIыгъ. Джащ фэдэу, сабый зэрыс унагъохэм лъэныкъо зэфэшъхьафхэмкIэ ящыкIэгъэ фэIо-фашIэхэр а зы чIыпIэм зэращафагъэцэкIэщтхэр Iэрыфэгъоу зэ­рэщытыр, ащкIэ IофышIэхэм пшъэры­лъэу апашъхьэ итыр зэрэзэшIуахыщтыр Гъуб­жьэкъо Темур къыхигъэщыгъ.

Социальнэ-реабилитационнэ Гупчэу «Доверие» зыфиIорэм ипащэу Лариса Адаменкэм Iофтхьабзэм хэлажьэхэрэм агу къыгъэкIыжьыгъ лъэныкъо зэфэшъхьафхэмкIэ къэралыгъо ыкIи муниципальнэ фэIо-фашIэхэр зыщагъэцэкIэрэ Унэгъо гупчэ ащызэхэщэгъэным хэлэжьэрэ пилотнэ шъолъырхэм Адыгеир 2023-рэ илъэсым зэрахэфагъэр. КIэлэцIыкIоу щыIэныгъэм чIыпIэ къин ригъэу­цуагъэхэм IэпыIэгъу ягъэгъотыгъэнымкIэ Фондым зэхищэгъэ зэнэкъокъум респуб­ликэр хэлажьи, грантэу сомэ миллиони 8,1-рэ къырихыгъ. Ащ ишIуагъэкIэ икIыгъэ илъэсым тыгъэгъазэм ыкIэхэм апэрэ Унэгъо гупчэр цIыфхэм социальнэ фэIо-фашIэхэр афэгъэцэкIэгъэнхэмкIэ гупчэу Мыекъуапэ дэтым щагъэпсыгъ.
— А мылъкум къыхагъэкIи, тэ тигупчи сомэ миллиони 4-рэ мин 700-рэ къы­IукIагъ. Ащ ишIуагъэ­кIэ гупчэр дгъэп­сын амал щыIэ хъугъэ ыкIи тищыкIэ­гъэщт оборудованиер зэдгъэгъотыгъ. КIэлэцIыкIухэр зэрыс унагъохэм ящыкIэгъэ медицинэ, психологическэ, педагогическэ, юридическэ, социальнэ IэпыIэгъур шIуагъэ къытэу зы чIыпIэм ащыфызэхэщэгъэныр гупчэм ипшъэ­рылъ шъхьа­Iэхэм ащыщ. Арышъ, тиIофы­шIэхэм къэралыгъо учреждениехэм ыкIи къулыкъухэм зэпхыныгъэ адыряIэу «зы шъхьаныгъупчъэ» шIыкIэм тетэу ящыкIэгъэ фэIо-фашIэхэр мы Гупчэм щафагъэцэкIэщтых, — къыIуагъ Лариса Адаменкэм.
КIэпсэжъыер Мырзэ Джанбэчрэ Гъуб­жьэкъо Темуррэ зызэпаупкIым, гупчэм ыкIоцI къаплъыхьанэу еблэгъагъэх. Ла­ри­са Адаменкэм ар зэрэзэтегъэпсыхьагъэр къафиIотагъ. Унэгъо гупчэм цIыф­хэм яIоф зэхафыфэ зыщежэщтхэ залыр, джэгупIэ кIэлэцIыкIу унэр, социальнэ фэIо-фашIэхэр зэрафагъэцэкIэщт мультимедийнэ ыкIи джэгун оборудованиер, цифрэ амалхэр, къэбар порталэу «Къэралыгъо фэIо-фашIэхэр» къыдыхэлъытагъэх.
Нэужым министрэу Мырзэ Джанбэч мы уахътэм гупчэм реабилитацие щызыхьырэ кIэлэцIыкIухэм аIукIагъ ыкIи псэукIэу щыряIэр агу рехьымэ къари­гъэIотагъ. Шэуджэн, Кощхьэблэ ыкIи Джэджэ районхэм къарыкIыгъэ кIэлэцIыкIуищымэ пшахъокIэ сурэт ашIэу тефагъэх. Ахэм ащыщхэр апэрэп мыщ къызэрэкIохэрэр ыкIи агу зэрэрихьырэр къыхагъэщыгъ.
Iофтхьабзэм къыщыгущыIагъэхэм ащыщ Гупчэу «Доверие» зыфиIорэм мы уахътэм реабилитацие щызыхьырэ кIэлэцIыкIухэм ащыщэу Кощхьэблэ районым къикIыгъэ Никита Загорулько янэу Надеждэ.
— Сэкъатныгъэ зиIэхэу, зиамал къыхьырэр макIэу мы гупчэм къакIорэр бэ. Ахэм сэ сикIали ащыщ, илъэсипшI мэхъу мыщ къызэрэщытэIазэхэрэр. Ащ фэдизым мыщ щыдгъотыгъэ гукIэгъум, анаIэ къызэрэттетыгъэм фэдэ фыщытыкIэ тыди щыдгъотыгъэп. Гупчэм иIофышIэ куп зэгурыIожь лъэшэу тыфэраз, ятIонэрэ унэ мы чIыпIэр тфэхъугъ, — хигъэунэфыкIыгъ Надеждэ Василий ыпхъум.
Ежь Никитэ уз хьылъэу иIэм емылъы­тыгъэу, цIыф зэIухыгъэу щыт, дэгъоу еджэ. Компьютер ыкIи къэбарлъыгъэIэс технологиехэм, шахматхэм ыгу рихьэу апылъ. Республикэ творческэ зэнэкъокъу­хэм текIоныгъэр пчъагъэрэ къащыди­хыгъ, сэкъатныгъэ зиIэхэм апае зэхащэрэ фестивалэу «Шаг навстречу» зыфиIорэми хэлэжьагъ.
Къыхэзгъэщымэ сшIоигъу, УФ-м щыIэныгъэм чIыпIэ зэжъу ригъэуцогъэ кIэлэцIыкIухэм IэпыIэгъу афэхъугъэнымкIэ и Фонд зэпхыныгъэ дыряIэу ащ зэхищэрэ зэнэкъокъухэм алъэплъэх, социальнэ реабилитационнэ гупчэм къекIоу, ищыкIагъэу алъытэхэрэм ахэлажьэх.
— Грантхэм якъыдэхын илъэс зэкIэ­лъыкIохэм тахэлажьэ ыкIи плIэгъогогъо текIоныгъэр къыдэтхыгъ. Ахэм яшIуагъэкIэ фэIо-фашIэу дгъэцакIэхэрэм зядгъэушъомбгъугъ ыкIи хэушъхьафыкIыгъэ къулыкъу цIыкIухэр зэхэтщагъэх, — къыхигъэщыгъ Лариса Адаменкэм.
Iофтхьабзэм икIэух гупчэм зыщяIэзэхэрэ кIэлэцIыкIухэм азыфагу щырагъэ­кIокIыгъэ творческэ зэнэкъокъум текIоныгъэ къыщыдэзыхыгъэхэм афэгушIуагъэх.
Мы илъэсыр екIыфэ лъэныкъо зэфэшъхьафхэмкIэ къэралыгъо ыкIи муниципальнэ фэIо-фашIэхэр зыщагъэцэкIэрэ Унэгъо гупчэхэр адрэ районхэми къащызэIуахын гухэлъ яI.
Iэшъынэ Сусан.