КIэлэеджакIохэм я Урысые зэнэкъокъоу «Президент спорт джэгунхэр» зыфиIорэм ишъолъыр едзыгъо тыгъуасэ рекIокIыгъ. Ар Адыгэ республикэ стадионэу «Зэкъошныгъэм» щыкIуагъ. Iофтхьабзэм Адыгеим имуниципальнэ образовании 8-мэ къарыкIыгъэ ныбжьыкIэхэр хэлэжьагъэх.

КIэлэеджакIохэм спортым яIэпэIэсэныгъэ щыхагъэхъоным, япсауныгъэ агъэпытэным, щыIэныгъэм нахьышIоу зыфагъэхьазырыным афэшI илъэс къэс «Президент джэгунхэр» хэгъэгум щызэхащэ.
Апэ спорт зэIукIэгъухэр къоджэ псэупIэхэм яеджапIэхэм, нэужым районхэм ащыкIуагъэх. Анахь лъэшхэр къыхахынхэм пае кIэух зэнэкъокъур джы Мые­къуапэ щызэхащагъ.
— Непэ атлетикэ псынкIэмкIэ, къэчъэнымкIэ, футболымкIэ (кIалэхэр), теннис цIыкIумкIэ (пшъашъэхэр), баскетболымкIэ (кIалэхэри, пшъашъэхэри) зэнэкъокъущтых, — къеIуатэ Адыгэ Республикэм физкультурэмкIэ ыкIи спортымкIэ и Комитет иIофышIэу Елена Шаталовам. — Урысыем спортым мэхьанэу щыратырэм зыкъе­гъэIэтыгъэнымкIэ мыщ фэдэ зэIукIэгъухэм шIогъэшхо къахьы.
Едзыгъо пэпчъ хагъэунэфыкIырэ чIыпIэхэр къыдэзыхыгъэ командэхэм нэпэеплъ шIухьафтынхэр, кубокхэр, медальхэр аратыщтых.
Республикэм апэрэ чIыпIэр щызыубытыгъэ командэр Урысые кIэух зэнэ­къо­къоу Iоныгъом щыIэщтым хэлэжьэщт.
Шъугу къэдгъэкIыжьын, анахь цIыфыбэ зыхэлэжьэрэ спорт Iофтхьабзэу Урысыем щызэхащэхэрэм мы зэнэкъо­къур зэращыщыр. «Президент джэгунхэр» федеральнэ проектэу «УФ-м щыпсэухэрэм япатриотическэ пIуныгъ» зыфиIорэм хэхьэрэ проектэу «Спортыр — щыIэныгъэм ишапхъ» зыцIэм къыдыхэлъытагъэу 2010-рэ илъэсым къыщегъэжьагъэу рагъэкIокIы.
Iэшъынэ Сусан.
Сурэтыр: Iэшъынэ Аслъан.