Хабзэ зэрэхъугъэу, Урысыем и Мафэрэ кушъхьэфачъэм и Дунэе мафэрэ яхъулIэу къалэу Мыекъуапэ игупчэ урамхэм (Про­ле­тарскэмрэ Пинеор­скэмрэ) кушъхьэфачъэкIэ къыщызэпэчъэщтых. Ахэм километрэ 18 хъурэ гъогур зэпачыщт.

Iофтхьабзэм хэлэжьэщтхэр Зэкъошныгъэм игупчэ къыщызэрэугъоищтых, урамхэу Пионерскэмрэ Лермонтовым ыцIэ зыхьырэмрэ зыщызэуталIэхэрэм дэжь ар щырагъэжьэщт. Зэрэрахъухьэ­рэмкIэ, нэбгырэ 3000-м ехъу хэлэжьэщт.
Зэкъошныгъэм игупчэ пхъэдз­хэр щырадзэщтых, творческэ купхэр зыхэлэжьэщтхэ концерт щыкIощт. Сыхьатыр 8-м щегъэжьагъэу 9.40-м нэс Iофтхьабзэм хэлэжьэщтхэр атхыщтых, сыхьатыр 10-м къызэпэчъэныр рагъэжьэщт, 12-м аухыщт.
Нэужым анахьыжъэу ыкIи ана­хьыкIэу ащ хэлэжьагъэм, спортым нахь лъэшэу пыщэгъэ унагъом, шъошэ анахь дахэ зыщыгъым ыкIи нэмыкIхэм шIухьафтынхэр аратыщтых.
Зыныбжь илъэс 14-м нэмысыгъэхэм Зэкъошныгъэм игупчэ зэнэкъокъу ащыфызэхащэщт.