ЖъоныгъуакIэм и 25-р зыдэхъугъэр амышIэу кIодыгъэ сабыйхэм я Маф. Урысые гуфэ-кIо лъыхъон-къэгъэнэжьэкIо купэу «ЛизаАлерт» зыфиIорэм кIэлэцIыкIоу кIодыхэрэм ыкIи сабыйхэм ящынэгъончъагъэ япхыгъэ къиныгъохэм афэгъэхьыгъэ Iофтхьабзэхэр зэхищагъэх. Сабыйхэм ящынэгъончъагъэ фэгъэхьыгъэ зэдэгущыIэгъухэр, отрядым хэтхэм кIэлэцIыкIухэм адашIыгъэ зэIукIэгъухэр Мыекъуапэрэ псэупIэу Яблоновскэмрэ ащыкIуагъэх.

— Тишъолъыр къутамэ 2019-рэ илъэ­сым щыублагъэу Iоф ешIэ. Сабыеу ыкIи ныбжь зиIэу кIодыхэрэм талъыхъуным пае организацие фэдэу тызэрэлэжьэн фаер мэкъуогъум иапэрэ мафэ зэдэтштагъ. Купыр зэхэщагъэ зыщыхъугъэм щыублагъэу сабыйхэр ашIокIодыгъэхэу гъогогъуи 144-рэ къытэолIагъэх. Ахэм ахьыбэр псаоу къэдгъотыжьыгъ. Гукъау нахь мышIэми, зидунай зыхъожьыгъэхэри, къэтымыгъотыжьышъугъэхэри ахэм къахэкIыгъэх, — къыIотагъ лъыхъон-къэ­гъэнэжьэкIо купэу «ЛизаАлерт» зыфиIорэм ишъолъыр къутамэ хэтэу Валентина Торорыкинам.
Къыппэблэгъэ цIыфыр зыкIодыкIэ пшIэн фаер ыкIи «ЛизаАлерт» зыфиIорэ купым узэрэхэхьан плъэкIыщтыр Iоф­тхьабзэм хэлэжьагъэхэм къафаIотагъ.
— ЦIыфыр зыкIодыкIэ пшIэн фаер бэмэ къагурыIорэп, — хегъэунэфыкIы Валентинэ. — Пстэуми апэу Iахьыл-благъэхэм, нэIуасэхэм зэкIэми афэIопщыгъэн фае. Сабый хъумэ, джэгуным хэтэу кIодыхэрэр къахэкIы. Ахэр Iа­хьылхэр, нэIуасэхэр яIэпыIэгъоу псынкIэу къагъотыжьых. Сабыир сыхьат заулэм къамыгъотыжьыгъэмэ, хэбзэухъумэкIо къулыкъухэм макъэ арагъэIун фае. «Линие плъырымкIэ» «ЛизаАлерт» зыфиIорэ купым фытеонхэ, макъэ рагъэIун алъэкIыщт.
Непэ гуфэкIо купым ишъолъыр къу­тамэ нэбгыри 100-м ехъу хэт. Ахэр лъыхъон-къэгъэнэжьын IофшIэнхэм афэ­гъэсагъэх. Зыныбжь илъэс 18-м къехъу­гъэу шIоигъоныгъэ зиIэхэр купым хэ­хьанхэ алъэкIыщт. Ащ пае социальнэ хъытыоу «ВКонтакте» зыфиIорэм «Лиза­Алерт» ишъолъыр къутамэ инэкIубгъо къыщыхагъэщыни отрядым хахьэхэ зэрашIоигъом фэгъэхьыгъэр ратхэн фае. Джэуап къаратыжьыщт, кIэу къахахьэ зышIоигъохэм афызэхащэрэ егъэджэнхэм арагъэблэгъэщтых.
Урысые гуфэкIо купэу «ЛизаАлерт» зыфиIорэр Урысыем 2010-рэ илъэсым чъэпыогъум зэхащагъ. Непэ ащ зэкIэмкIи нэбгырэ мин 40 хахьэ ыкIи УФ-м ишъо­лъыр 64-мэ ащ икъутамэхэр ащызэ­хэщагъэх. Илъэс 13-м лъыхъон-къэгъэ­нэжьын Iофтхьэбзэ мин 237-мэ купыр ахэлэжьагъ, нэбгырэ мин 204-рэ къагъо­тыжьыгъ. Псаоу къагъотыжьыгъэхэм япчъагъэ мини 174-рэ.
Лъыхъон Iофтхьабзэу зэшIуахыхэрэм сайтэу «www.lizaalert.org» зыфиIорэм уащылъыплъэн плъэкIыщт. Джащ фэдэу телефон номерэу 8(800)700-54-52-м шъутеон, «ЛизаАлерт» иоператорхэм ыпкIэ хэмылъэу макъэ яжъугъэIун шъулъэкIыщт.
Александра Балабась.