Иорданием исатыушIхэр мы мафэхэм Адыгеим ихьакIэх. Экспортым ылъэныкъокIэ республикэм иамалхэм нэIуасэ зафашIы. Ащ къыдыхэлъытагъэу хъызмэтшIэпIэ заулэхэм яблэгъагъэх, ахэм яIофшIакIэ зэрагъэлъэгъугъ.

Ащ къыкIэлъыкIоу Адыгеим исатыушIхэм гущыIэгъу защыфэхъугъэхэ зэIукIэгъу АР-м предпринимательствэм IэпыIэгъу фэхъугъэнымкIэ и Гупчэ щыкIуагъ. Лъэпкъ проектэу «Предпринимательствэ цIыкIум ыкIи гурытым IэпыIэгъу егъэкIыгъэныр» зыфиIорэм къыдыхэ­лъытагъэу Iофтхьабзэр зэхащагъ. Адыгеим экспортым IэпыIэгъу фэхъугъэнымкIэ и Гупчэ ащ икIэщакIу, республикэм ращырэ продукцием ипчъагъэ хэгъэхъо­гъэныр ипшъэрылъ шъхьаI.
ЗэIукIэгъу-зэдэгущыIэгъум Адыгеим исатыушI нэбгырэ 20-рэ Иорданием ихъызмэтшIэпIи 6-мэ ялIыкIохэмрэ нэIуа­сэ щызэфэхъугъэх. IэкIыб къэралыгъом щыщэу 2-р хэтэрыкIхэм, лэжьыгъэхэм якъэгъэкIын дэлажьэх, 4-м зекIонымкIэ Iоф ашIэ. Мы лъэныкъохэмкIэ респуб­ликэмрэ Иорданиемрэ язэдэлэжьэныгъэ агъэпытэмэ федэ къэкIуапIэ хъунэу хьа­кIэхэми бысымхэми алъытэ.
— Сэ къэзгъэлъэгъорэ хъызмэтшIапIэр зыдэлажьэрэр къэкIхэ­рэр ары. Анахьэу сынаIэ зытезгъэтырэр гъомылапхъэхэр, ахэр Адыгеим ыкIи Иорданием зэрэщагъэхьазырхэрэр, зэращыдэлажьэхэрэр ары. ХъызмэтшIэпIэ заулэхэм тащыIэгъах. Слъэгъугъэр зэкIэ сыгу рихьыгъ, чIыгубэ шъуиI. Джыри хъызмэтшIапIэхэм тяблэгъэщт, ахэми яIофшIакIэ зыщыдгъэгъозэщт, — къыддэгощагъ Иорданием къикIыгъэ сатыушIэ купым щыщэу Бабук Церса.
Джащ фэдэу зекIоным фэгъэзэгъэ хъызмэтшIапIэхэу Мыекъопэ районым итхэм хьакIэхэр яблэгъэщтых. Мы лъэныкъом епхыгъэу Iоф зышIэрэ респуб­ликэм исатыушIхэри зэIукIэгъум хэлэжьагъэх. ЗекIохэм фэIо-фашIэу афа­гъэцакIэхэрэм хьакIэхэр щагъэгъоза­гъэх. Непэ зекIоным лъэшэу зеушъомбгъу. Зэдэлэжьэныгъэм илъэмыдж агъэпсымэ зекIохэмкIэ зэхъожьынхэр амалышIу хъущт.
— Иорданием исатыушIхэм тазэрэIукIэрэр апэрэп. Мыщ ыпэкIэ тэри ахэм адэжь теблэгъагъ, ежьхэри къэкIуагъэх. НахьыбэмкIэ ахэм ашIогъэшIэгъоныр мэкъумэщ лэжьыгъэр, къыдэгъэкIыжьыгъэ гъомылапхъэр (тыгъэгъэзэ дагъэр, хьаджыгъэр, псыр). Джы мызэгъэгум зекIонми анаIэ тыра­дзагъ. Ахэм апае хэушъхьафыкIыгъэ программэ зэхэдгъэу­цуагъ. ЕтIанэ, тэ тисатыушIхэми мыщ фэдэ зэдэлэжьэныгъэр ашIогъэшIэгъон. Къэралыгъо гъунапкъэхэм арыкIхэу Iоф ашIэным фэхьазырых, — къы­Iуагъ АР-м экспортым Iэпы­Iэгъу фэхъугъэнымкIэ игупчэ ипащэу Дыдыхъу Алый.
Мы илъэсымкIэ IэкIыб къэралыгъохэм ясатыушIхэр Адыгеим къызэреблагъэ­хэрэр ятIонэр. Гъэтхапэм республикэу Беларусь илIыкIо куп къэкIогъагъ. ТапэкIи мыщ фэдэ IофшIэныр лъагъэкIо­тэщт. Ащ фэшъхьафэу IофшIэгъу дэкIыгъохэр зэхащэщтых. Беларусь, Армением, Азербайджан, Китай ащыкIощт къэ­гъэлъэгъон инхэм Адыгеим исатыушIхэр зыхэт лIыкIо купхэр яблэгъэщтых.
Анцокъо Ирин.