АдыгабзэкIэ рекIо­кIырэ шъолъыр зэ­нэ­къокъоу «Губзы­гъэхэр» зыфиIорэр Iоныгъом и 20-м къыщегъэжьагъэу шэкIогъум и 30-м нэс республикэм щыкIощт. Я 8 — 11-рэ классхэм арыс кIэлэеджакIохэр ащ хэлэжьэнхэ алъэкIыщт.

АР-м гъэсэныгъэмрэ шIэныгъэмрэкIэ, культурэмкIэ иминистерствэхэр, гуманитар ушэтынхэмкIэ Адыгэ респуб­ликэ институтэу КIэрэщэ Тембот ыцIэ зыхьырэм щызэхэщэгъэ проектнэ офисыр ащ икIэ­щакIох. Адыгабзэм изэгъэ­шIэн ныбжьыкIэхэм ашIогъэшIэгъоныныр, ащ ихэгъэхъон ыкIи икъэухъумэн зэнэкъокъум ипшъэрылъ шъхьаIэх.
Республикэм ирайонхэм арыт гурыт еджапIэхэм якIэлэеджакIохэр ащ хэлэжьэнхэу рагъэблагъэх. Зэнэкъокъум куп-купэу зыкъыщагъэлъэгъощт. Зым нэбгыритф хэтын фае.
«Губзыгъэм» хэлэжьэнхэу изыхъухьэхэрэм жъоныгъуакIэм и 31-м нэс яшIоигъоныгъэ къагъэлъэгъон фае. Ар къэзыушыхьатрэ тхыгъэр зэхэщэкIо купым ихъытыу нэкIубгъоу «ipk-ra@yandex.ru» зыфиIорэм зэнэкъокъум ыцIэ пытхагъэу, «Word е pdf» шъуашэм илъэу бгъэхьынэу щыт. ИгъэкIотыгъэ къэбарыр АР-м культурэмкIэ и Министерствэ ихъытыу нэкIубгъо ишъулъэгъощт.
Анцокъо Ирин.