Шъачэ икIэлэегъэджэ анахьыжъхэм ащыщыгъэу, Хэгъэгу зэошхом ыкIи IофшIэным яветеранэу, къэлэ гъэсэныгъэ гъэIорышIапIэм хэтхэм агъэлъа­пIэщтыгъэ Кобл Хъурет Къамболэт ыпхъур илъэс 93-м итэу дунаим ехыжьыгъ. ИгъашIэ гъэсэныгъэм, кIэлэеджакIохэм афигъэшъошагъ.

Кобл Хъурет щэгъогогъо сыдэгущыIэнэу синасып къыхьыгъ. Ау нахьыбэрэм иIофшIэгъухэр, ригъэджагъэхэр, ахэм янэ-ятэхэр ары ар къызтегущыIэщтыгъэр. Къаигъэ хьазырэу ыкIи теубытэгъэ-пытагъэ хэлъэу щы­Iэныгъэм зэрэхэтыгъэм пае къамыгъанэу, ар цIыфхэм лъэш дэдэу шIу алъэгъущтыгъ ыкIи лъытэныгъэшхо фашIыщтыгъ. IэпэIэсэныгъэшхо зэрэхэлъы­гъэм, сабыйхэр шIу зэрилъэ­гъущтыгъэхэм, еджапIэм пае ылъэкI къызэрэмынэщтыгъэм а гуфэбэныгъэр къакIэлъыкIуагъ. Аужырэу ащ дэжь сызыкIогъагъэр илъэс 80 ыныбжь зэрэ­хъугъэр хагъэунэфыкIы зэхъур ары. ПсышIопэ районым ит поселкэу Каткова Щель зыцIэм иеджапIэ пчыхьэзэхахьэр щыкIогъагъ. Залым цIыфыр чIэмыфэжьэу чIэсыгъ.
ХьисапымкIэ кIэлэегъаджэу илъэс тIокIищым къехъурэ лэ­жьэгъэ Кобл Хъурет Къамбо-
лэт ыпхъур пенсием зэкIоми рэхьатэу щысышъугъэп: ар бэрэ еджапIэм кIощтыгъ, иIофшIэгъу­гъэхэм, кIэлэеджакIохэм, ны-тыхэм зэдэгущыIэгъухэр ади­шIыщтыгъ. Мыщ щыIэр зэкIэ ащ ыгукIэ пэблэгъагъ.
Iоныгъом иапэрэ мафэ къызысырэм, Хъурет ителефон зэ­пымыоу къытеощтыгъ, рэзэныгъэшхо къыфэзышIырэ икIэлэеджакIохэм ягущыIэ фабэхэр ащ зэхихыщтыгъ, ахэм
ыгуи къаIэтэу бэрэ хъугъэ. Нэбгырэ минитIум ехъоу ригъэ­джагъэмэ ар ятIонэрэ нэу алъытагъ, ащыщыбэ ны-ты къо­дыехэп, нэнэжъ-тэтэжъи хъу­гъахэх, къо­рэлъф-пхъорэлъфхэр къятэкъо­кIыгъэх, цIыфмэ алъытэх. Хэгъэгум ичIыпIабэм ащыпсэурэ икIэлэ­еджа­кIохэм зы мэфэкI мафэ бла­гъэкIыгъэп къыфытемыохэу, ренэу ипсауныгъэ, изытет, щы­кIагъэ горэ иIэмэ къыкIэ­уп­чIагъэх.
«Мы чIыпIэм сэ сIэшъхьи­тIукIэ еджапIэм лъачIэ фэхъущтыр щыстIыгъагъ», — къысфиIотэгъагъ Кобл Хъурет. Ар гъэсэныгъэ учреждение Каткова Щель дэтым апэрэ мафэм къыщыублагъэу щылэжьагъ, еджапIэм хэхъоныгъэу ышIы­гъэхэр едзыгъо-едзыгъоу ынэгу кIэкIыгъэх, ригъэджагъэмэ зэ­кIэмэ ацIэ-алъэкъуацIэхэр, язы­тетыгъэр къышIэжьыщтыгъ.
Угу къэкIыжьыни шъыпкъэмкIэ щыIагъ. КъатитIоу зэтет джы­рэ еджапIэр охътэ кIэкIым цIыфхэм зэдашIыгъагъ — зэ­кIэмкIи илъэситIукIэ — апэрэ кIэлэеджакIохэр 1961-рэ илъэсым имэлылъфэгъу мазэ чIэхьэгъагъэх. Арэу псынкIэу еджапIэр ашIыным зыкIыдэгуIэщтыгъэхэр ащ ыпэкIэ яIэгъэ классибл еджа­пIэу ягъунэгъу Зубова Щель зыцIэм дэтыгъэр жъы дэдэу, зэхэтэкъоным нэсыгъэу зэрэщытыгъэр ары. А еджэпIэ за­къом а лъэныкъом щыIэ къуа­джэхэм адэсхэр щеджэщтыгъэх. ЕджэпIакIэр 1961-рэ илъэсым аухыгъагъэми, ащ ыуж бэрэ псэолъакIэхэр къыпашIыхьажьыгъэх, спортивнэ залыр, котельнэр, джэгукIэ зэфэшъхьафхэр зыщырагъэкIокIырэ площадкэр щашIыжьыгъэх. КIэлэегъаджэхэм ыкIи кIэлэеджакIохэм къэгъа­гъэ­хэр, чъыгхэр дагъэтIысхьагъэх.
А уахътэр Кобл Хъурет фэ­ба­гъэ хэлъэу ыгу къэкIыжьыщтыгъ.
— ЗэкIэ тэ къытэлъыты­гъагъ, — къыIуатэщтыгъ ащ. — ТыныбжьыкIагъэба, зэкIэри тIэ къифэнэу къытщыхъущтыгъ — зэрэдунаеу зэпырыдгъэзэн тшIошIыщтыгъ. Джащ фэдэ гуетыныгъэр кIэлэеджакIохэми ахэтлъхьэгъагъ, дэгъоу еджэнхэм, гъэхъагъэхэр ашIынхэм, лъытэныгъэ зыфашIырэ цIыфхэу хъунхэм тедгъэпсыхьагъэх. ТикIалэми тызэхашIыкIыгъ, зыкIи тыкъагъэукIытэжьыгъэп.
Илъэс тIокIиплI зыщиныбжьыгъэ уахътэу сызщыдэгущыIэгъа­гъэм, ащ шIэжьэу иIэр згъэшIэгъогъагъэ, хьисапыр, ащ хэт формулэхэр, уравнениехэр дэ­гъу дэдэу къызэришIырэ за­къор арэп, ищыIэныгъэ щыщ пычыгъохэр хэзыгъэ ямыIэу къышIэжьыщтыгъэх. Ащ къы­гъэшIэгъэ щыIэныгъэ шIагъор нэмыкIхэм щыIэныгъитIу афи­къуныри пшIэхэнэп.
— Сэ къуаджэу ШIоикъо сы­къыщыхъугъ, сыкъызэрыхъухьагъэр унэгъо Iужъоу щытыгъ, — ыгу къэкIыжьыщтыгъ Хъурет. — Сятэрэ сянэрэ — ТIэшъу Къамболэтрэ Фатимэрэ сабыибгъу яIагъ. Тянэ жьэу тыухыгъагъэ, ащ къыхэкIэу тицIыкIугъом къыщегъэжьагъэу колхозым Iоф щытшIагъ. Заом илъэ­хъан губгъо IофшIэнхэм тахэлажьэщтыгъ, къоджэдэсмэ тырягъусэу лэжьыгъэр Iутхыжьыщтыгъ. А уахътэр къин дэдагъ, тидунэееплъыкIэ ыпсыхьагъ, шIу тызэрэлъэгъуным, лъытэныгъэ зэфэтшIыным тафищагъ.
Ыш-ышыпхъухэм афэдэу Кобл Хъурет мамыр щыIакIэм зыщиушхугъ. ШIоикъо дэтыгъэ илъэсибл еджапIэм ыуж Красноалександровскэм (джырэкIэ Къэлэжъым) гурыт еджапIэр къыщиухыжьыгъ. КIэлэегъэджэ сэнэхьатыр зэригъэгъотыным кIэхъопсыщтыгъ, ар къыздигъэ­хъуным фэшI 1951-рэ илъэсым Черкесскэ кIэлэегъэджэ институтым чIэхьагъ, илъэситIу тешIагъэу (а лъэхъаным илъэситIу ащ зэрэщырагъаджэщтыгъэхэр) ПсышIопэ районым ит поселкэу Зубова Щель дэт еджапIэм Iоф ышIэнэу агъэкIуагъ. Нэужым, къоджэ гъунэгъоу Каткова Щель зыцIэм гъэсэныгъэ учреждениер зыщашIым, ащ зигъэзэжьыгъ. Илъэс тIокIиплIым ыныбжь къы­зекIуалIэм, Хъурет илъэс тIокIищым ехъу кIэлэегъэджэ IофшIэным фигъэхьыгъэу щытыгъ, ныбжьыкIэмэ гъогур ятыгъэныр нахь тэрэзэу къыхихи, зигъэпсэфынэу тIысыжьыгъагъэ. Хъурет ипшъашъэхэу Нуретрэ Зуретрэ янэ игъогу рыкIуагъэх, илъэс пчъагъэ хъугъэшъ къалэу Шъачэ гъэсэныгъэм иучреждениеу дэт­хэм ащэлажьэх.
— КIэлэегъэджэ IофшIэным шъэф горэхэр хэлъэу щытэп, — игупшысэхэмкIэ къыздэгощэгъагъ Хъурет. — ЗэкIэ зы­Iы­гъыр пкъэуищ: сабыйхэр шIу плъэ­гъунхэр, уиIофшIэн IэпэIэсэныгъэшхо фыуиIэныр ыкIи кIэлэ­егъэджэ сэнэхьатым на­хьышIу зэрэщымыIэр пшIошъ хъуныр. КъыткIэхъухьэрэ ныбжьыкIэмэ адэлажьэрэ пэпчъ пшъэдэкIы­жьышхо ехьы — обществэм ыпашъхьэкIэ, ежь ыпа­шъхьэкIэ ыкIи неущрэ ма­фэм­кIэ. Ащ ылъапсэ еджапIэр ары зыщагъэ­псырэр.
Кобл Хъурет Урысые Федерацием народнэ гъэсэныгъэмкIэ иотличник, муниципальнэ зэнэ­къокъоу «Къалэу ШъачэкIэ илъэсым ибзылъфыгъ-2004-рэ» зыфиIорэм илауреат, бгъэ­­хэлъ­хьэ пшIы пчъагъэ иI, ахэм ащыщ «За доблестный труд в годы Великой Отечественной войны» зыфиIорэр ыкIи нэмыкIыбэ. Кобл Хъурет къызщы­хъугъэ къуаджэу ШIоикъо щагъэтIы­лъыжьыгъ.
Кобл Хъурет Къамболэт ыпхъум игупсэмэ афэтхьаусыхагъэх ПсышIопэ районым иадминистрацие иIофышIэхэр, Шъачэ икъэлэ ЗэIукIэ идепутатхэр, къэлэ администрацием гъэсэныгъэмкIэ ыкIи шIэныгъэм­кIэ и ГъэIорышIапIэ щылажьэ­хэрэр, ветеранхэм якъэлэ ыкIи район совет, хышIуцIэ шапсыгъэ­мэ я Адыгэ Хасэ ахэтхэр. Тыгу къэкIыжьы, тэлъытэ, тщыгъупшэщтэп. Тхьэм джэнэт къырет!
Ныбэ Анзор.