Мыекъуапэ ит псэупIэ комплексыкIэу «Яблоне­вый» зыфиIорэм са­бый ибэхэм, ны-тыхэр зышъхьарымытыжь кIэлэ­цIыкIухэм унэ 25-у къа­фы­хагъэкIыгъэхэм яIункIыбзэхэр тыгъуасэ щаратыжьыгъэх. Адыгеим и ЛIышъхьэу КъумпIыл Мурат унэ къызэратыгъэхэм къафэгушIонэу ащ къэкIогъагъ.

Лъэпкъ проектэу «ПсэупIэмрэ къэлэ щыIакIэмрэ» зыфиIорэм диштэу зэхащэгъэ Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, Адыгеим ипрокурорэу Игорь Шевченкэр, Урысыем и Следственнэ комитет АР-мкIэ иследственнэ гъэIорышIапIэ ипащэу Василий Лариныр, Мыекъуапэ имэрэу Геннадий Митрофановыр, министрэхэм я Кабинет хэтхэр, депутатхэр, псэолъэ­шIы­ным фэгъэзэгъэ фирмэу, пшъэдэкIы­жьэу ыхьырэмкIэ гъунэпкъэ гъэнэфагъэ зиIэ обществэу «КСК-м» ипащэхэр.
Республикэм и ЛIышъхьэ ящыIэныгъэ къыхэхъухьэгъэ хъугъэ-шIэгъэ гушIуагъом­кIэ кIэлэцIыкIухэм афэгушIуагъ, фэтэрыкIэхэм яIофхэр щызэпыфэнхэу, гуIэтыпIэ афэхъунэу афэлъэIуагъ.
«Непэ шъо шъуизакъоп зимэфэкIыр, республикэмкIэ мы мафэм мэхьанэшхо иI. Президентэу Владимир Путиным къыгъэуцугъэ пшъэрылъ шъхьаIэм — тицIыфхэм, анахьэу IэпыIэгъу тедзэ зэратынэу зытефэхэрэм ящыIэныгъэкIэ ящыкIэгъэ амалхэр ягъэгъотыгъэнхэм — изэшIохынкIэ зичэзыу Iофтхьабзэ зэшIохыгъэ хъугъэ», — къыIуагъ Къум­пIыл Мурат.

Адыгеим и ЛIышъхьэ зэрэхигъэунэфыкIыгъэмкIэ, кIэлэцIыкIу ибэхэм унэ ятыгъэным иIофыгъо ышъхьэкIэ гъунэ лъефы. ГъэрекIо сомэ миллиони 177,5-у къыхагъэкIыгъагъэмкIэ унэ 71-рэ къащэфыгъ. Ащ нэмыкIэу джыри мыгъэ унэ 70-рэ къызIэкIагъэхьан ямурад. Непэ фэтэр 25-мэ яIункIыбзэхэр кIэлэцIыкIу­хэм аратыжьыгъэх. Мыекъуапэ икъокIыпIэ щагъэпсырэ унакIэм кIэлэцIыкIу ибэхэм унэ гъэмафэм къащыфыхагъэ­кIынэу рахъухьэ. АР-м и ЛIышъхьэ къулыкъу гъэнэфагъэхэм пшъэрылъ афишIыгъ апэрэ илъэсныкъом икIэуххэм атетэу мыгъэ фэтэрхэр нахьыбэу къащэфынхэмкIэ мылъку тедзэ къыхагъэ­кIынэу.
Республикэм ипащэ зэрэхигъэунэфыкIыгъэмкIэ, лъэпкъ проектэу «ПсэупIэмрэ къэлэ щыIакIэмрэ» зыфиIорэм, псэолъэ­шIыным псынкIэу зызэрагъэушъомбгъу­рэм яшIуагъэкIэ кIэлэцIыкIу ибэхэм фэтэрхэр къафыхэгъэкIыгъэнхэм епхыгъэ Iофыгъор зэшIохыгъэ мэхъу. Анахьэу зыпылъхэр комплексыкIэу агъэпсыхэрэм ащ фэдэ унэхэр къащаратынхэр ары. АщкIэ щысэшIоу щыт микрорайонэу «Яблоневый» зыфиIоу псынкIэу зызыушъомбгъурэр. Мыщ унакIэхэр щашIых, а зы уахътэм инженер, социальнэ инфраструктурэр щызэтырагъэпсыхьэ. Ащ къыпэIулъ чIыпIэр зэтырагъэпсыхьэ, кIэлэцIыкIу, спорт джэгупIэхэр, сатыу псэуалъэхэр агъэпсых. Нэбгырэ 240-мэ ателъытэгъэ кIэлэцIыкIу IыгъыпIэр, нэбгырэ 1100-мэ атегъэпсыхьэгъэ еджэпIэшхор, цIыфхэм япсауныгъэ зыщагъэпытэрэ комплексэу «Ошъутен» зыфиIорэр ащ къыбгъодэтых.
АР-м и ЛIышъхьэ IэпыIэгъу къафэхъу­гъэ пстэуми: псэолъэшIхэм, специалистхэм, социальнэ проектхэм япхыгъэ пшъэрылъхэр зыгъэцакIэхэрэм, лъэныкъо зэфэшъхьафхэмкIэ ныбжьыкIэхэм IэпыIэгъу къафэхъухэрэм тхьашъуегъэпсэу ариIуагъ.

«Предпринимательствэм зегъэушъомбгъугъэным, цIыфхэм IофшIапIэ къафэгъотыгъэным, унэгъо ныбжьыкIэхэм, ныхэм, кIэлэцIыкIухэм IэпыIэгъу афэхъу­гъэным япхыгъэ программэ зэфэ­шъхьафхэр Адыгеим щагъэцакIэх», — къыIуагъ АР-м и ЛIышъхьэ.
КIэлэцIыкIухэр зыпIунэу зыштагъэхэми, унакIэ къызэратыгъэхэми Адыгеим и ЛIышъхьэ зэрэфэразэхэр къаIуагъ сабый ибэхэмрэ ны-тыхэр зышъхьарымытыжь кIэлэцIыкIухэмрэ ынаIэ къызэратыригъэтырэм, IэпыIэгъу зэрафэхъурэм афэшI.
Унэ къызэратыгъэхэм ащыщэу Алена Кощеевам республикэм ипащи, къалэм имэри ригъэб­лагъэхи, ифэтэр зэрэзэтегъэпсыхьагъэр аригъэ­лъэгъугъ. Джащ фэдэу къызыхъугъэ мафэр тыгъуасэ хэзыгъэунэфыкIыгъэ Яна Косенковам иуни Адыгеим ипащэ ихьагъ. КъумпIыл Мурат пшъашъэм фэгушIуагъ, унакIэм итхъахьынэу, гъэхъагъэхэр ышIынхэу фэлъэIуагъ.
ЯщыIэныгъэ дахэу зэрэзэпыфэщтым, унэу къаратыгъэхэр мафэ зэрафэхъущтхэм ицыхьэ зэрателъыр Адыгеим и ЛIышъхьэ къыIуагъ.
АР-м и ЛIышъхьэ ипресс-къулыкъу