УрысыбзэмкIэ зыкI къэралыгъо ушэтыныр непэ Урысыем щаты. АдыгеимкIэ ащ нэбгырэ 1778-рэ хэла­жьэ. Ахэр мы илъэсым я 11-рэ классыр къэзыухыхэрэр ары. Ушэтыныр сыхьати 3,5-м (такъикъ 210-рэ) телъы­тагъ, гъэцэкIэн 27-рэ къыдыхэлъытагъ. Аужырэм нэмыкIэу зэкIэри тест шъуашэм илъ. Ахэм ащыщхэм мыгъэ зэхъокIыныгъэхэр афашIыгъэх. НахьыбэмкIэ ахэр гъэцэкIэнхэм уасэ зэрафашIыщтым ехьылIагъ.
ЗэрагъэнэфагъэмкIэ, урысыбзэмкIэ балл анахь макIэу 40 ныбжьыкIэхэм рагъэкъун фае. Апшъэрэ еджапIэм ахэр чIэхьанхэмкIэ универститетым ежь ишап­хъэхэр егъэнафэх, ау Министерствэм ыгъэуцугъэ пчъагъэхэм анахь макIэ хъу­щтэп.
Ушъхьагъу зэфэшъхьафхэм апкъ къикIэу урысыбзэмкIэ непэ ушэтыным къемыкIолIэшъугъэхэм мэкъу­огъум и 17-м джыри зэ атыжьын амал яIэщт.
БлэкIыгъэ илъэсхэм еджапIэр къэзыухыгъэхэу икIэрыкIэу урысыбзэр зытыжьы зышIоигъохэм бэдзэ­огъум и 4-м загъэтэрэзыжьын алъэкIыщт. КIуачIэ зиIэщтыр аужырэ ушэтыным икъэгъэлъэгъонхэр ары. Джащ фэдэу аттестатым дэхьащт пчъагъэр зыгъэтэрэзыжьы зышIоигъохэм мэфэ тедзэхэр яIэщтых: Iоныгъом и 4-м ыкIи и 23-м.
Анцокъо Ирин.