ХъокIо Светланэ Айдэмыр ыпхъур При­кубанскэ чIыпIэ коим зипащэр илъэс 12 хъугъэ. Хъулъфыгъэ пстэуми мы IэнатIэр агъэцэкIэшъущтэп, ау къуаджэм щыпсэухэрэм зэралъытэрэмкIэ, Светланэ ар къыдэхъу. Районым икоммунальнэ хъызмэт ыкIи исоциальнэ къулыкъухэм ащылажьэзэ цIыфхэм Iоф адишIэным зыфигъэсагъ. ИIофшIэгъухэри къыфэразэх.

— ПшъэдэкIыжьыр дэгъоу зэхешIыкIы, Iофым изэшIохын къыдэхъу, — хегъэунэфыкIы Тэхъутэмыкъое чIыпIэ коим ипащэ игуадзэу Талъэкъо Аскэр. — Iофтхьэбзэ зэфэ­шъхьафхэм цIыфхэр ахегъэлажьэх, къызэрелъэIухэрэмкIэ IэпыIэгъу аригъэкIыным пылъ, чIыпIэ коим иадминистрацие IутхэмкIи, ищыкIагъэ хъумэ, гупсэфыгъо къытимытэу, тиIоф­шIэн дэгъоу зэхещэ.
Чанэу Iоф зэришIэрэм дакIоу Светланэ цIыф гушIубзыоу, сэмэркъэу хэлъэу щыт, щхыпэр ынэгу кIэлъ зэпыт, гушъаб. Ау ищыIэныгъэ зыпштэрэм, гумэкIи гукъауи бэ зыпхырыкIыгъэр.
Светланэ къуаджэу Щынджые Трахъо Айдамыррэ Нуриетрэ яунагъо къихъухьагъ. Ичылэ­гъоу Нэхэе Айдэмыркъан иныбжьыкIэгъум дэкIуагъ. Бэрэ зэдэмы­псэугъэхэу ишъхьэгъусэ ава­рием хэкIуадэшъ, сабый цIыкIоу къафэхъугъэр игъусэу изакъоу къэнэ. Уахътэ зытешIэм, Пчы­хьэлIыкъуае щыщэу ХъокIо Руслъан дэкIо. Шъхьэгъусэр унэгъо Iужъу къихъухьагъэу щытти, пынджлэжь совхозэу Прикубанскэм иIофышIэхэу къэзэрэщэгъакIэхэм фэтэрхэр къазэрэратырэр зызэхахым, ащ кIуагъэх. ПсэупIи зэрагъэгъотыгъ, а уахътэм сабыитIу яIэ хъужьыгъэ: апэрэм, Трахъо Рус­лъан, тынэпIосым ыцIэ ритыгъ, ятIонэрэу Мадин дэгоу ыкIи бзакоу къэхъугъ. Ар сы­мэджэщ зэфэшъхьафхэм бэрэ ащэщтыгъ, машинэ ямыIэми Краснодар кIощтыгъэх.
Светланэ ишъхьэгъусэ Iоф зыщишIэрэ бригадэм нэбгырэ 43-рэ хэтыгъ. А лъэхъаным пынджлэжьхэм осэшхо афашIыщтыгъ. Зэ бригадэм машинэ къыфагъэшъуаши ар зытефэщтыр пхъэдзыкIэ къыхахынэу агъэнэфагъ. Ишъхьэгъусэ ычIыпIэ ежь пхъэдзым хэлэжьэнэу Светланэ лIым елъэIугъ. ЫкIи машинакIэр къызэрэрихыгъэм икъэбар пчэдыжьым къэнэфагъ. Джащ фэдэу а уахътэм Хъуа­кIомэ янасып къыхьыгъ.
КIэлэ нахьыжъэу Руслъан гурыт еджапIэр къызеухым, Хабаровскэ ракетнэ дзэхэм къулыкъур ащихьыгъ. Къызе­гъэзэжьым, тIэкIурэ зызегъэ­псэфым ыуж, зэзэгъыныгъэм кIатхи, дзэ къулыкъур илъэсищрэ Мэздэгу щихьыгъ. Ар къыухи къызэкIожьым, ягъунэгъу Галинэ къыщагъ, пшъашъэу Даринэ къафэхъугъ. Ау бэ темы­шIэу зэгурымыIоныгъэм ыпкъ къикIыкIэ ныбжьыкIэхэр зэхэ­кIыжьыгъэх. Ащ ыуж Руслъан Москва щылэжьэнэу зигъэзагъ, Даринэ цIыкIур ятэжърэ янэжърэ апIущтыгъ. Джыдэдэм Даринэ Краснодар дэт монтажнэ колледжым щеджэ.
КIэлэ нахьыкIэу Мадин ежь фэдэу псауныгъэмкIэ дагъохэр зиIэ пшъашъэ къыщагъ. Шъэо­жъыеу къафэхъугъэм Аслъан фаусыгъ. Ащ дагъо зыпари имыIэу къэхъугъ, апэрэ классыми чIагъэхьагъ.
Москва щылажьэщтыгъэ Руслъан Аиша зыцIэ пшъашъэм нэIуасэ фэхъуи, ар къыщагъ, сабый къафэхъугъ. НэмыкI къа­лэ псэупIэкIэ къыхахи, Руслъан ежь иунэе Iоф къыщызэIуихыгъ, хьылъэхэр зэрищэщтыгъэх. Кавказым щыщ къэбэр­таехэр, чэчэнхэр иIоф хищагъэх. ХэушъхьафыкIыгъэ дзэ операциер къызежьагъэм щыублагъэу зэшъэогъу 12 хъухэу зэзэгъыныгъэкIэ дзэ къулыкъум зыхатхагъ къэралыгъор къау­хъумэ ашIоигъоу. ЗыдэщыIэр янэ римыIонэу Руслъан ишъхьэ­гъусэ гущыIэ пытэ Iихыгъ. Светланэ нахьыбэм телефонкIэ зыдэгущыIэщтыгъэр иныс ары. Ащ яунэгъо къэбархэр къыригъэIуатэщтыгъэх. Мэзищ горэ тешIагъэу, Руслъан ишъэогъу кIалэу чылэм щыщыр пчыхьэ хъугъэу ядэжь къыIухьагъ ыкIи Светланэ ишъхьэгъусэ рищыгъ. Бэрэ къэтыгъэу, ышъхьэ еуфэ­хыгъэу ар унэм къихьажьыгъ. Ныбджэгъоу къыIухьагъэм Руслъан зэрэщымыIэжьым икъэ-
бар гомыIу къафихьыгъэу къы­чIэ­кIыгъ.
Светланэ нысэм зыфытеом Руслъан хэушъхьафыкIыгъэ дзэ операцием хэлэжьэнэу зэрэ­кIуагъэр, дэкIы зэхъум зыпари янэ римыIонэу къызэрэфигъэпытагъэр къыIотэжьыгъ. Светланэ ыгу къыпызыгъ, кIалэу къэбар гомыIур къэзыхьыгъэр къыгъоти, ыкъо икIодыкIэ ащ къыфэзыIотэжьыгъэм ителе-
фон номер къыIихыгъ. Руслъан къулыкъу дэзыхьыщтыгъэ къэ­бэртэе кIалэу ар къычIэкIыгъ. Бэрэ зыфытео уж ащ телефоныр къыIэтыгъ ыкIи Руслъан къыщышIыгъэр кIэкIэу къыфи­Iотагъ:
«Къысфэгъэгъу ащ фэдэу занкIэу къызэрэсIотэжьырэмкIэ. Ростов шъукIон фай, ащ нахьыбэрэ сыкъэгущыIэжьышъущтэп».
Светланэ икIалэ лъыхъунэу ыублагъ. АщкIэ Тэхъутэмыкъое чIыпIэ коим ипащэу Нэужьрэ-
къо Алый IэпыIэгъу къафэхъущтыгъ. Светланэрэ ишъхьэ­гъу­сэрэ Ростов кIуагъэх. Лъыхъон IофшIэнхэм якIэух къараIо­жьынэу къагъэгугъэхи, къатIупщыжьыгъэх. ЦIыфхэр тхьаусыхакIо къафакIощтыгъэх. Руслъан зэрэщымыIэжьым икъэбар зызэхахыгъэм ыуж мэфэ 40 те­шIагъэу ефэндым джыназэ ышIыгъ. Ау ныр ыгукIэ еуцуа­лIэщтыгъэп.
Мэфэ заулэ тешIагъэу Светланэ ителефон къытеуагъ.
— Мам, сэлам, сэры ар!
Светланэ телефоныр Iэпы­зыгъ, нэпсыр ынэмэ къячъагъ. Руслъан псаоу къычIэкIыгъ. УIэгъэ хьылъэ телъэу ар сымэ­джэщым чIэлъыгъ. ЗэуапIэм зэрэIухьагъэр янэ ымышIэу елъы­тэти, джынэс къыфытеуа­гъэп. Ным игушIуагъо гъунэ иIагъэп.
Къом къызегъэзэжьым, къур­мэн фашIыжьыгъ, псаоу къэ­кIожьыгъэ кIалэм пае ефэндыми тхьэлъэIу ышIыгъ, цIыфхэр гушIуакIо къафэкIуагъэх.
Ыкъо къырыкIуагъэм Светланэ бэрэ егупшысэщтыгъ ыкIи ежь иныбжьыкIэгъум къыщышIыгъэм фигъадэщтыгъ.
Апэ зыдэкIогъэ лIым игъусэу помидор ащэнэу Украинэм кIогъагъэх. Яшъэогъухэр акIыгъухэу, машинитIукIэ гъогу те­хьагъэх. Яныбджэгъухэр апэ ишъыгъэхэу, ежьхэр ауж итхэу кIохэзэ, хьылъэзещэ мащинэ горэм ылъакъо къауи къызэуцум, еутэкIыгъэх. Светланэ ишъхьэгъусэ хэкIодагъ, ежь къэмынэхъэжьэу сымэджэщым ащагъ, врачхэм ыпсэ хэкIы­гъахэу къашIошIызэ, бзылъфыгъэ ныбжьыкIэр псаоу къы­чIэкIыгъ. Ау тIури щымыIэжьхэу ны-тыхэм къэбар арагъэIугъагъ. Светланэ бэрэ сымэджэщым чIэлъыгъ, илъэсныкъо тешIагъэу зэтеуцожьыгъ. Уахътэ тешIи, икIалэ ты фэхъугъэм унагъо дишIэжьыгъ, ятIонэрэу къыфэ­хъугъэ сабый сымаджэми ыуж итыгъ. Бэ Светланэ ушэтыпIэу зыпхырыкIыгъэр, ау зэкIэмэ анахь мэхьанэ зиIагъэр Iа­хьыл-благъэхэу, иIофшIэгъухэу, игъу­нэгъухэу, ымышIэрэ цIыфхэу IэпыIэгъу къыфэхъущтыгъэхэм къапкъырыкIыгъэ гукIэгъур ары. Ахэм непи шъхьащэ афешIы.
Руслъани ылъэ зытеуцожьым, хэушъхьафыкIыгъэ дзэ операцием ыгъэзэжьынэу зэзэгъыныгъэм кIэтхагъ. НыбжьыкIэу ащ кIохэрэм ишIэныгъэхэмкIэ адэгощэныр ипшъэрылъ шъхьа­Iэу зыфелъэгъужьы. Светланэрэ ишъхьэгъусэрэ зэкIэ зэуапIэм Iут кIалэхэм псаоу къагъэзэ­жьы­нэу афэлъаIох.
АкIэгъу Разиет.