Илъэсым иохътиплIымэ — гъатхи, гъэмафи, бжыхьи, кIымафи ахэб­дзын гори ахэмытэу ама­ли лъэкIи яI.

Ахэр зым нахьи адрэр нахь хъупхъэжьэу, цIыфхэм къытэшIушIэх — тичIыопс зэфэдэу фэулэух. ЗэплъэкIыгъо тимыфагъэу гъэтхапэр ыкIи мэлылъфэгъур кIуагъэх, джы гуфа­плъэу дунаим ухаплъэмэ, къэтэбэ шхъонтIабзэу, гур зыщэфэу, тичIыопс тIэмыгъэ-къэгъэгъэ мэIу. Тыгъэр лъагэ, огур къаргъо, жьыр къэбзэ гохь! Пхъэшъхьэ-мышъхьэхэр ыкIи хэтэ­рыкIхэр — бэлыджэр, помидор-нэшэбэгухэр, бжьын тхьапэ шхъонтIабзэр, бжьыныф шъхьэ­хъураер, картофыр, къэбаскъэр къызэлъэхъух. Цумпэр пIонышъ, тэ тичIыгу къыщыкIи, къыщымыкIи, плъыжьыбзэ зэкIэхъу­хьэгъэ дахэу хъои. ЩакIохэми щэфакIохэми яшIугъу, шхын псынкIэу витамин закIэхэр нэ­рэ-Iэрэм зэрапхъох. ЦIыфым шIоигъо гъомылэр пкъырыхьаным мэхьанэ иI, хэти псауныгъэ тиIэнэу тэлъаIо.
ЖъоныгъуакIэм имэфэ гъу­шъэ фабэ пэпчъ емызэщыжь орэдыIохэу бзыухэм яджэгу зэ­рэгъэфэжъу макъэ дунаир еIэты! Мэфэ ошIу нэфынэхэм пкIуачIэ къырагъэблы, кIон-зыплъыхьаным нахь удехьыхы. Джащ фэдэ сыхьатыпэхэм Шъхьэ­гощэ псыхъо чъэр ыма-
къэ укIэдэIоу, иорхэм уахаплъэ­зэ, гупшысэр бгъазэу, зыбгъэ­псэ­фыныр зикIасэр макIэп, ахэм сэри сащыщ.
ЖъоныгъуакIэм идэхэгъу зы­хэмыгъэнэу зыIупщэн ыкIи зы­хэпщэн фае, ащ гури шъхьэри къеукъэбзых.
Дзэукъожь Нуриет.