ЛIыбланэ хъущт

Мосэ тетIысхьэ кушъхьэфачъэм.
Икъоу ышIэрэп джыри чъакIэ.
Къыфэмыгъэуцоу релъэсажьэ,
Къефэхышъ, зэхеутыныхьэ.

ЛIы шъыпкъэу гъырэп.
Тыриутыгъ Iаеу Iэнтэгъур.
Зэрэузыгъэр къымыгъэлъагъоу,
IокIыжьы, зи мыхъугъахэу.

Зебэджым, зэкIэ Iутыгъэхэм,
АгъэшIэгъуагъ:
— Мосэ хэлъ лIыгъэ.
ЩырыгущыIагъэх
зыхэс хьаблэм;
«Къэхъумэ хъущт ар лIы!» —
аIуагъ.

Уайкъокъо Рэмэзан

Iушыжъый

Мосэ цIыкIу еджэ тхылъым,
Шъэожъыер Iушыжъый.
ЗэкIэми гу алъетэ.
Сэнэхьатхэр къелъытэх.

КIэхъопсы ар къухьэлъатэм,
Щыбыбынэу огу шхъуантIэм.
Фай мэшIокури зэрифэнэу,
Машинэ псынкIэми исынэу.
Теты шIоигъу хышхо уалъэм,
ИIэу къухьэм капитанэу.

ЕджэнымкIэ хъупхъэ дэд,
Iордэгъазэу, гукIэгъушI.
Iоф иIэу гупсэфыщтэп,
Шхэщтэп ыкIи джэгущтэп.

Мафэр кIуагъэ, лъэшэу пшъыгъэ.
ЛIы ар хъущт, игъо къэсмэ.