Адыгэ Республикэм щыпсэухэу лъытэныгъэ зыфэтшIыхэрэр!
Лъытэныгъэ зыфэтшIырэ предпринимательхэр!

Урысые предпринимательствэм и Мафэ фэшI тышъуфэгушIо!
Ячаныгъэрэ, яIэпэIэсэныгъэрэ яшIуагъэкIэ ежьхэм яIоф къызэIузыхын ыкIи зезыгъэушъомбгъун зылъэ­кIыгъэ, Адыгэ Республикэмрэ хэгъэгумрэ яэкономикэ игъэпытэн зиIахь хэзышIыхьэгъэ цIыфхэм непэ ящытхъу тэIо.
Экономикэм хэхъоныгъэ ышIынымкIэ, IофшIэпIэ чIыпIакIэхэр щыIэнхэмкIэ ыкIи а пстэуми яшIуагъэкIэ цIыфхэм ящыIэкIэ-псэукIэ зыкъыIэтынымкIэ непэ анахь мэхьанэшхо зиIэхэм ащыщ предпринимательствэ цIыкIумрэ гурытымрэ яамалхэм зягъэушъомбгъугъэныр.
Предпринимательствэ цIыкIумрэ гурытымрэ къэралыгъо IэпыIэгъу ятыгъэнымкIэ республикэм шIыкIэ зэфэшъхьафыбэ щагъэфедэ. Апэрэ лъэбэкъухэр зышIыхэрэр ары анахьэу анаIэ зытырагъэтыхэрэр.
Тицыхьэ телъ республикэм ипредпринимательхэм ячаныгъэ нахь хэхъонымкIэ а Iофтхьабзэхэм яшIуагъэ къызэрэкIощтым ыкIи Адыгэ Республикэм исоциальнэ-экономикэ хэхъоныгъэ джыри нахь зыкъызэриIэтыщтым.
Мы мэфэкI мафэм Адыгеим ипредпринимательхэм тафэлъаIо псауныгъэ пытэ, щыIэкIэшIу яIэнэу, проект гъэшIэгъоныкIэхэм япхырыщынкIэ гъэхъагъэхэр ашIынхэу!
АР-м и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет —Хасэм и Тхьаматэу Владимир Нарожнэр