IэкIыб къэралыгъомэ ащыщ студентхэм азыфагу сурэттехынымкIэ зэIухыгъэ къэлэ зэнэкъокъоу «Адыгеим сищыIэныгъэ зэрэщыкIорэр» зыфиIорэр Адыгэ къэралыгъо университетым зэхещэ.

Зэнэкъокъур апэрэу рагъэкIокIы. Ащ хэлэжьэнхэу фитыныгъэ яI IэкIыб къэралыгъохэм ащыщхэу илъэс 14-м къыщегъэжьагъэу 35-м нэс зыныбжьхэу Адыгэ Республикэм щыпсэухэрэм е щеджэхэрэм.
Зы авторым IофшIэгъитф нахьыбэ Iахыщтэп. Ахэр «JPG» шапхъэм илъхэу, сурэтым къытырэр зы дюймым пикселэу 300-м шIомыкIэу, иинагъэкIэ 15х20-у ыкIи зы файлым ионтэгъуагъэ мегабайтитIум мынахьыбэу щытынхэ фае. Фоторедакторым сурэтым итеплъэ, ащ ышъо, икъэгъэлъэгъуакIэ зэригъэзэфэжьхэми хъущт.
Зэнэкъокъум хэлажьэ зышIоигъомэ мы адресымкIэ яIофшIагъэхэр агъэхьышъущтых: kaf_rki@adygnet.ru
Заявкэр апшъэрэ еджапIэм и Положение ит шапхъэм тетэу атыныр ащ къыделъытэ, ыбгъукIэ тыратхэн фае: «Адыгеим сищыIэныгъэ зэрэщыкIорэр». Сайтым Положениер хэти ригъотэщт, мэкъуогъум и 5-м нэс лъэIу тхылъхэр аштэх.
Зэнэкъокъум иосэшIхэм зэлъашIэрэ фотохудожникхэр ыкIи апшъэрэ еджапIэм иIофышIэхэр ахэхьагъэх. ТекIоныгъэ къыдэзыхыгъэхэр лауреатхэм ядипломхэмкIэ ыкIи шIухьафтынхэмкIэ къыхагъэщыщтых. Финалым ихьэхэрэм зэкIэми дипломхэр афагъэшъо­шэщтых.
Муниципальнэ программэу «Адыгеим икъэлэ шъхьа­Iэ иныбжьыкIэхэр» зыфиIоу 2018 – 2024-рэ илъэсхэм ателъытагъэм диштэу зэнэкъокъур зэхащэ, джащ фэдэу Адыгэ Республикэм икъэралыгъо программэу «Культурэм хэхъоныгъэхэр егъэшIы­гъэнхэр» зыфиIорэми ар къыдыхэлъытагъ.
Адыгеир шIу ягъэлъэгъугъэным, ащ игугъу дахэ- кIэ раIоным, культурнэ-творческэ шIоигъоныгъэ­хэр гъэцэкIэгъэнхэм, сурэттехыным фэщэгъэ ныбжьыкIэмэ ятворчествэ лъыгъэкIотэгъэным, сэнаущыгъэ зы­хэлъхэр къыхэгъэщыгъэнхэм зэнэкъокъур афэгъэ­хьыгъ.

Адыгэ къэралыгъо университетым
ипресс-къулыкъу