Урысые обществэу «ШIэныгъэм» ипрограммэу «НыбжьыкIэ лекторым ­иеджапI» зыфиIо­рэмкIэ Адыгеим ­истудент нэбгырэ 15-мэ егъэджэнхэр акIугъэх.

Мыр ятIонэрэ къычIэ­кIыгъу. Мыекъопэ къэралыгъо технологическэ ыкIи Адыгэ къэралыгъо университетхэм ястудентых рагъэджагъэхэр. Iофтхьа­бзэхэм яшIуагъэкIэ об­ществэм ишъолъыр лекторхэм япчъагъэ нэбгырэ 27-кIэ нахьыбэ хъугъэ.
ЦIыфхэм апашъхьэ укъы­щыгущыIэным пылъ шапхъэхэм, ащ зызэ­рэ­фэбгъэхьазырын фаем, Iофтхьабзэм изещакIохэм япшъэрылъхэм студентхэм игъэкIотыгъэу защагъэ­гъозагъ. НыбжьыкIэ лекторым иеджапIэ икурсхэр зэракIугъэхэр къэзыушы­хьатырэ тхылъхэр къаратыжьыным ыпэкIэ ныбжьы­кIэхэм яшIэныгъэхэр къа­гъэшъыпкъэжьын фэягъ: лекцием зыфагъэхьазыри, осэшI купым ыпашъхьэ зыкъыщагъэлъэгъуагъ.
Студентхэм уасэ афэзышIыгъэ купым хэтыгъэх обществэу «ШIэныгъэм» ишъолъыр къутамэ ипащэу Галина Измайловар, Мые­къопэ къэралыгъо технологическэ университетым ипсихологическэ къулыкъу ипащэу, обществэу «ШIэныгъэм» илекторэу Людмила Красновар ыкIи еджапIэм иапэрэ къычIэ­кIыгъо хэтыгъэ ныбжьыкIэхэр.
Проектым хэлэжьагъэ­хэм ялекциехэр зыфэгъэ­хьыгъагъэхэр волонтерствэм зэрэхахъорэр, мыгоо шхэным ишапхъэхэр ыкIи псауныгъэм икъэу­хъумэн.
ПшIэным пае: Урысые обществэу «ШIэныгъэм» итарихъ 1947-рэ илъэсым зэхащэгъэгъэ советскэ об­щественнэ организа­циеу «Политикэ ыкIи наукэ шIэныгъэхэр алъыгъэ­IэсыгъэнымкIэ Всесоюзнэ обществ» зыфиIоу зэхащэгъагъэм къыщежьэ. 1963-рэ илъэсым ащ ыцIэ обществэу «ШIэныгъ» зы­фиIорэмкIэ зэблахъу­жьыгъ. Илъэс зэкIэлъыкIохэм ар зэхъокIыныгъэ зэфэшъхьафхэм апхырыкIыгъ. 2021-рэ илъэсым УФ-м и Президентэу Владимир Путиным Федеральнэ ЗэIукIэм факIоу къышIыгъэ Джэпсалъэм Урысые обществэу «ШIэныгъэр» джырэ уахътэм ицифрэ платформэ диштэу гъэпсыжьыгъэнэу пшъэ­рылъ къыгъэуцугъ.