Я 11-рэ ыкIи я 9-рэ классхэр къэ­зыухыхэрэр непэ бэрэ зэжэгъэхэ маф. Аужырэ одыджыныр къафытеощт.

Сыхьатыр 8-м къыще­гъэ­жьагъэу республикэм игурыт еджапIэхэм, игимназиехэм ыкIи илицейхэм ащ фэгъэхьыгъэ мэфэкI Iофтхьабзэхэр ащыкIощтых. ПстэумкIи рес­публикэм иныбжьыкIэ 1775-мэ я 11-рэ классыр къау­хыгъ. Илъэси 9 еджэгъур кIэлэ­еджэкIо 6123-мэ къызэра­нэкIыгъ. Зэтыгъо ыкIи шIокI зимыIэ къэралыгъо ушэтынхэу къапыщылъхэр къызэранэкIыхэмэ, ящыIэныгъэ игъогукIэ аублэщт. ЗэкIэмкIи зэтыгъо къэралыгъо ушэтынхэр нэбгырэ 1908-мэ атыщт. Гурыт сэнэхьат зэзыгъэгъотыгъэ ыкIи ыпэрэ илъэсхэм еджапIэр къэзыухыгъэхэр мы пчъагъэм хэтых. Ахэм апае чIыпIэ 11 республикэм щагъэпсыгъ. Нахьыбэмэ къыхахыгъэхэр обществознаниер (нэбгырэ 766-рэ), хьисапыр (623-мэ), биологиер (428-мэ), информатикэр (395-мэ). Аужырэ илъэсхэм информатикэмкIэ зызыушэтыхэрэм япчъагъэ хэхъуагъ. 2020-рэ илъэсым елъытыгъэмэ, фэдитIукIэ нахьыбэ хъугъэ. Анахь макIэу къызщыуцу­гъэхэр географиер (нэбгырэ 80) ыкIи литературэр (98-рэ). Мы мазэм щегъэжьагъэу мэкъуогъум ыкIэм нэс ныбжьыкIэхэм яушэтынхэр къызэкIэлъыкIощтых. Джащ фэ­дэу, шIокI зимыIэ къэралыгъо ушэтынхэр я 9-рэ классыр къэзыухырэмэ къяжэх.
Анцокъо Ирин.