024-рэ илъэсым жъо­ныгъуакIэм и 31-м къыщегъэжьагъэу мэкъуогъум и 2-м нэс къэзэкъ культурэм ия ХХХIII-рэ фестиваль Адыгэ Респуб­ликэм щыкIощт.

Ащ изэхэщакIор Ассоциациеу «Къэзэкъ культурэм ишъолъыр фестиваль» зыфиIорэр ары. Адыгэ Республикэмрэ президент грантхэмкIэ Фондымрэ къаIэкIагъэхьэгъэ грантыр ащкIэ агъэфедэщт. Мы Iофтхьабзэм изэ­хэщэнкIэ IэпыIэгъу къафэхъу­гъэхэм ащыщых Адыгеим
и ЛIышъхьэ, Пшызэ шъолъыр икъэ­зэкъыдзэ иатаман, АР-м IофшIэнымрэ социальнэ хэхъоныгъэмрэкIэ и Министерствэ, культурэмкIэ и Министерствэ, къалэу Мыекъуапэрэ Мыекъопэ районымрэ яадминистрациехэр.
Шъолъыр 23-мэ лъэIу тхылъ 92-рэ къарыкIыгъ: Волгоград, Ростов, Орловскэ, Омскэ, Свердловскэ, Тамбовскэ, Кировскэ хэкухэм, Республикэхэу Къырым, Дагъыстан, Адыгеим, Чэчэным, ЛНР-м, Краснодар, Ставрополь крайхэм ыкIи къа­лэу Москва.
Зыныбжь хэкIотэгъэ ыкIи кIэлэцIыкIу творческэ коллективхэм, орэдыIохэм, къэзэкъ фольклор-этнографическэ купхэм, IэпэщысэхэмкIэ анахь Iоф­шIэгъэ дэгъухэр зиIэхэм, пщынаохэм, къэзэкъ лъэпкъ къашъохэмкIэ ыкIи нэмыкI лъэ­ныкъохэмкIэ нахь къахэщыгъэ­хэм яIэпэIэ­сэныгъэ къагъэлъэгъощт.
Зэнэкъокъум хэлажьэхэрэм Адыгэ Республикэм ичIыпIэ анахь дахэхэр арагъэлъэгъущтых: псыкъефэххэу Рыфабгъо, Свято-Михайло-Афонскэ чылысыр ыкIи нэмыкIхэр. Къалэу Мыекъуапэ дэт Лъэпкъ музеим, КъокIыпIэм щыпсэурэ лъэпкъхэм я Къэралыгъо музей и Темыр-­Кавказ къутамэ ыкIи нэмыкI чIыпIэхэм ахэр ащыIэщтых.
ОрэдыIо-къэшъокIо ансамблэу «Казачатэм» лъапсэ фэзышIыгъэу, Адыгэ Республикэм культурэмкIэ изаслуженнэ IофышIэу, зэш Соловьевхэм ацIэкIэ щыт муниципальнэ шIухьафтыным илауреатэу Анатолий Уваровыр осэшIхэм ятхьамэтэщт. Ащ итхьа­мэтэгъущтыр Виктор Захарченкэр ары. Тызэрэщыгъуа­зэмкIэ, В. Захарченкэр Пшызэ къэзэкъ хорым ихудожественнэ пащэ игуадз, Пшызэрэ Респуб­ликэу Ингушетиемрэ культурэмкIэ язаслуженнэ IофышI, Адыгэ Республикэм искусствэхэмкIэ изаслуженнэ IофышIэшху.
Фестивалым иапэрэ мафэ хьакIэхэр зыхэлэжьэщтхэ концертхэр къатыщтых. КIэлэцIыкIухэм якъэухъумэн и Мафэ тефэу мэфэкI шIыкIэм тетэу Iофтхьабзэхэр къызэIуахыщтых, пчыхьэм зэнэкъокъум хэла­жьэхэрэр къэлэ паркым рагъэ­блэгъэщтых, ахэм орэд къа­фаIощт, къафэшъощтых.
Гупчэ тхылъеджапIэу псэупIэу Тульскэм дэтым Iэнэ хъурае щызэхащэщт, ащ иIофшIэн хэлэжьэщтых Адыгэ Республикэм ихэбзэ къулыкъухэм ыкIи къэзэкъхэм ялIыкIохэр, къэзэкъ кIэлэцIыкIухэр зэрыс классхэм якIэлэегъаджэхэр ыкIи якIэлэпIухэр.
МэфэкIым илъэхъан Пшызэ шъолъырым ис къэзэкъхэм якультурэрэ ящыIэкIэ-псэукIэрэ янэшэнэ шъхьаIэхэм хьакIэхэр нэIуасэ щафэхъущтых къэзэкъ щагухэу агъэпсыщтхэм.
Хабзэ зэрэхъугъэу, фестивалым икIэухым анахь дэгъоу къахахыгъэхэм чIыпIэу аубытыгъэхэр къаIощтых, псэупIэу Тульскэм дэт паркым а Iоф­тхьабзэхэр щырекIокIыщтых.
Екатерина Загорулько.