Дзэ-патриотическэ джэгуныр
Урысые дзэ-патриотическэ джэгунэу «Зарница 2.0» зыфиIорэр Мыекъопэ районым щыкIуагъ.
АР-м ныбжьыкIэ IофхэмкIэ и Комитетрэ «Движение первых» зыфиIорэ шъолъыр къутамэмрэ ащ икIэщакIох.
Илъэс 14 — 17 зыныбжь еджакIохэр джэгуным хэлэжьагъэх. Республикэм ирайонхэм къарыкIыгъэ купи 9-р мэфи 3-рэ зэнэкъокъугъэх. Дзэ ухьазырыныгъэу аIэкIэлъыр, купым хэтхэу Iоф зэрашIэшъурэр къагъэлъэгъуагъ, егъэджэнхэм ахэлэжьагъэх, ягубзыгъагъэкIэ зэнэкъокъугъэх, спорт ушэтынхэр акIугъэх, апэрэ IэпыIэгъу зищыкIагъэм рагъэкIышъумэ аушэтыгъ ыкIи нэмыкIхэр. ЗэфэхьысыжьхэмкIэ Мыекъопэ районым икупэу «Феникс 01-м» апэрэ чIыпIэр фагъэшъошагъ. Мыекъуапэ и «Факел МГГТК» — ятIонэр, Красногвардейскэ районым икупэу «Авангард СОШ 2-р» — ящэнэр.
— Шъолъыр едзыгъом бэрэ тыкъыфэкIуагъ. Мафэ къэс гъэхьазырынхэр тиIагъэх. Зэрифэшъуашэу тирайон къэдгъэлъэгъуагъ ыкIи апэрэ чIыпIэр къэтхьыгъ. ЗэкIэ ушэтынхэр тыгу рихьыгъэх. Тикуп анахьэу ыгу рихьыгъэр лазертаг джэгукIэр ары. ЗэнэкъокъухэмкIэ ар лъэныкъуакIэу зэрэщытым зэкIэми тызэфигъэдагъ, — къыддэгощагъ Мыекъопэ районым икупэу «Феникс 01» зыфиIорэм ипащэу Полинэ.
Джы мы купыр «Зарница 2.0» зыфиIорэм ичэзыу едзыгъо хэлэжьэщт. Адыгеир шъолъырхэм язэнэкъокъу къыщигъэлъэгъощт. Iофтхьабзэм хэлэжьагъэхэм гукъэкIыжь шIухьафтынхэр аратыгъэх.
Анцокъо Ирин.