Адыгэ къэралыгъо университетым стратегическэ сессиеу «Адыгэ Республикэм амалыкIэу иIэхэр» зыфиIорэр щыкIуагъ.

Iофтхьабзэм хэлэжьагъэх Адыгэ Рес­публикэм иминистрэхэм я Кабинет и Тхьаматэ игуадзэу ЛIыхэсэ Махьмуд, АКъУ-м иректорэу Мамый Даут, апшъэрэ еджапIэм иIофышIэхэр ыкIи университетым ииндустриальнэ гъусэгъумэ ялIыкIохэр.
Псауныгъэр къэухъумэгъэнымкIэ Урысыем и Министерствэ хэхьэрэ шIэныгъэ- ушэтыпIэ институтэу информатизацием ыкIи зэхэщэн Iофхэм афэгъэзэгъэ Гупчэм ипащэу, шIэныгъэ-гъэсэныгъэ кластерэу «Псауныгъэм иинженерие ыкIи псэ зыпытхэм ясистемэ и Институт» ишIэныгъэ упчIэжьакIоу Ольга Кобяковар экспертэу Iофтхьабзэм къырагъэблэгъагъ, стратегическэ сессием ар имодераторыгъ. Ащ идокладэу «Глобальные тренды 2050» зыфиIорэмкIэ сессиер къызэIуахыгъ.
ПроектхэмкIэ гукъэкIэу щыIэ шъхьа­Iэхэр Адыгэ Республикэм социальнэ-эко­номическэ хэхъоныгъэу 2030-рэ илъэсым нэс ышIынэу агъэнафэрэм и Стратегие епхыгъэх, ахэр шъолъырым иинновационнэ экосистемэ шIуагъэ къытэу Iоф щегъэшIэгъэным фытегъэпсыхьагъэх. Программэу «Приоритет 2030» зыфи­IорэмкIэ АКъУ-м стратегическэ проектищ егъэцакIэ: «Хьисапыр: еплъыкIэу щыIэр», «Мые къуапэр» ыкIи «Адыгеир — псауныгъэм ишъолъыр». АКъУ-м программэр зэрэщагъэцакIэрэр Iофтхьабзэм хэлажьэрэмэ ректорэу Мамый Даутэ къафиIотагъ.
— АКъУ-р программэу «Приоритет 2030» зыфиIорэм зыхэлажьэрэм къыщыублагъэу зиушъомбгъунымкIэ нахь амалышхохэр иIэхэ хъугъэ. Ащ дакIоу а Iофым пшъэдэкIыжьышхо зэрэпылъыр къыдгурэIо, тиуниверситет закъоп, зэрэреспубликэу хэхъоныгъэхэр ышIынхэм ар фэIорышIэ. Ащ тэ тыфэсакъы ыкIи тиапшъэрэ еджапIэрэ Адыгэ Республикэмрэ зыщызэдэлэжьэщтхэ лъэныкъохэр тэгъэ­нафэх, — къыIотагъ Адыгэ къэралыгъо университетым иректорэу Мамый Даутэ.
Проектэу агъэцакIэхэрэм ыкIи зыдэлэжьэнхэу щытхэм нахь игъэкIотыгъэу къатегущыIагъэх АКъУ-м цифрэ трансформациемкIэ ипроректорэу ПсыIушъо Азамат, АКъУ-м гукъэкI-ушэтынхэмкIэ идепартамент ипащэу Елена Куква, шIэныгъэ-гъэсэныгъэ кластерэу «Теубытэгъэ шIэныгъэхэм ыкIи цифрэ техноло­гиехэм я Институт» ипащэу Бэджэнэ Светланэ.
Ащ ыуж проектнэ сессием хэлажьэ­хэрэм АКъУ-м истратегическэ проектхэу Iоф зыдэшIэжьыгъэн фаехэмкIэ игъоу алъэгъурэр къаIуагъ, хэбзэ къулыкъухэм­рэ университетым ииндустриальнэ гъу­сэгъухэмрэ а Iофым дэлэжьэнхэу зэгохьагъэх.
— Шъолъырым хэхъоныгъэхэр егъэшIыгъэнхэм университетыр фэIорышIэ. АКъУ-м стратегическэ проектэу ыгъэцакIэхэрэм яшIуагъэкIэ, шъолъырым иэкономикэ амалыкIэхэр иIэхэ мэхъу, IэпэIэсэныгъэшхо зыхэлъ кадрэхэр къырещалIэх. Университетым ипшъэрылъыр неущрэ мафэм иэкономикэ щылэжьэщт IофышIэхэм ягъэхьазырын чанэу хэлэжьэныр ары. Ащ а пшъэрылъыр зэрэзэшIуихырэм елъытыгъэщт тиреспубликэ мы илъэсипшI благъэм щыIэкIэ-псэукIэу илъыщтыр, — стратегическэ сессием зэфэхьысыжь къыфишIыгъ экспертэу Ольга Кобяковам.
Адыгэ къэралыгъо университетым ипресс-къулыкъу