МэфэкI мафэу блэкIыгъэхэмкIэ зэрафэгушIохэрэм ишыхьатэу хэушъхьафыкIыгъэ дзэ операцием хэлэжьэрэ дзэкIолIхэу Херсонскэ ыкIи Запорожскэ лъэныкъохэм ащыIэхэм зичэзыу шIушIэ IэпыIэгъоу тонн 1,5-рэ хъурэр афащагъ.

Адыгеим икъэзэкъ ныбжьыкIэхэм я Союз итхьаматэу Екатерина Загорулько ыкIи Союзым хэт къэзэкъ-гъэсакIоу Александр Даниловыр зэгъусэхэу а пшъэрылъыр агъэцэкIагъ.
Автомобильхэр шIушIэ IэпыIэгъумкIэ зыушъагъэхэр Адыгеим икъэзэкъ ныбжьыкIэхэм я Союз иштаб хэт ныбжьыкIэхэр, ахэм япэрытэу Данил Антипиныр, ны-тыхэр. Гъогу техьагъэхэм динлэжьэу Роман Малинкэ Тхьэм афелъэIугъ.
Зичэзыу кIогъум афащагъэхэм ащыщых: нэбгырэ гъэнэфагъэхэм апае посылкэхэр, маскировочнэ хъытыухэр, псэу зашъохэрэр, генераторхэр, пхъэзэпыххэр, автомобильхэм апае гъэстыныпхъэхэр ыкIи ахэм ахалъхьэрэ пкъыгъохэр, псэо­лъэшI материалхэр, гъомылэпхъэ зэфэшъхьафхэр, Iэзэгъу уцхэр, щыгъын фабэхэр, нэмыкIхэри. Джащ фэдэу дин мэфэкIэу Пасхэм агъэхьазырыгъэ куличхэр, кIэнкIэ гъэлагъэхэр шIушIэ Iофтхьабзэм хэтыгъэх. Мэхьанэшхо зэратырэ кIэлэцIыкIу письмэхэри ащыгъупшагъэхэп. Мыхэр зэкIэ Адыгеим щыпсэурэ цIыфхэу тидзэкIолIхэм афэгумэкIыхэрэм, яIахьыл-гупсэхэм къаугъоигъэх.
«Лъытэныгъэ зыфэсшIырэ ДзэкIолI! Псауныгъэ пытэ уиIэнэу, гушIуагъор, фэбагъэр къыобэкIэу, къулыкъур псынкIэ пфэхъунэу сыпфэлъаIо. Тхьауегъэпсэу осэIо рэхьатэу еджапIэм тыкIон зэрэтлъэкIырэмкIэ, тыгъэ нэфым тыгу къыдищаеу тызэреплъы­шъурэмкIэ!» — джа гущыIэхэр къыщеIох кIэлэцIыкIу письмэхэм ащыщэу къауIэгъэ зэолIэу госпиталым чIэлъым къыIэкIэфагъэм, ар къыфэзытхыгъэр я 4-рэ «Д» классым ис Ярослава Куплиновар ары.
ТидзэкIолIхэм сэлам фабэрэ рэзэныгъэ гущыIэхэмрэ къафагъэхьы зыщымыгъупшэхэу, зигупыкI гъунэнчъэу шIушIэ IэпыIэгъу къафэзыугъоихэрэм ыкIи кIэлэцIыкIухэу зитхыгъэ агъэлъа­пIэхэрэм.
ШIушIэ IэпыIэгъум иугъоин лъэкIуатэ. Посылкэхэр къешъу­хьылIэнхэ шъулъэкIыщт мы адресым: къалэу Мыекъуапэ, ур. Пионерскэр, 328, Адыгеим икъэзэкъ ныбжьыкIэхэм я Союз иштаб.
Екатерина Загорулько.