2023 — 2024-рэ илъэс еджэгъум зэфэхьысыжь фэхъущт зыкI къэралыгъо ушэтынхэм яохътэ шъхьаIэ непэ ра­гъажьэ.

Я 11-рэ классыр къэзыухырэ нэбгырэ 1766-мэ, гурыт сэнэ­хьат зэзыгъэгъотыгъэ студент 16-мэ, блэкIыгъэ илъэсхэм къэзыухыгъэхэу, апшъэрэ еджа­пIэм чIахьэ зышIоигъо нэбгыри 102-мэ предмет зэфэ­шъхьафхэр атынхэу къыхахыгъ, ащ нэмыкIэу аттестатыр къаратыжьыным пае шIокI зимыIэ ушэтынхэр зыфэмытыгъэгъэ нэбгыри 3-мэ заушэтыщт. Джащ фэдэу я 10-рэ классыр къэзыухырэ нэбгыри 5-мэ пэшIорыгъэшъэу урысыбзэм ипрограммэ аухыгъэу мы предметымкIэ ушэтыныр атыщт, къэкIорэ илъэсым ащкIэ заушэтыжьыщтэп.
Хабзэ зэрэхъугъэу, гурыт еджапIэр къэзыухыхэрэм шIокI имыIэу урысыбзэмрэ хьисапымрэкIэ зэратырэм нэмыкIэу ныбжьыкIэхэм ежь яшIоигъоныгъэкIэ ушэтынитIу е нахьыбэ къыхахы. АР-м икъэралыгъо аттестационнэ къулыкъу къызэрэщытаIуагъэмкIэ, блэкIыгъэ илъэсхэм афэдэу мыгъи анахьэу къыхахырэр обществознаниер ары. ЗэрагъэнафэрэмкIэ, ар нэбгырэ 818-мэ, биологиер — 452-мэ, химиер — 326-мэ, тарихъыр — 346-мэ, информатикэр — 310-мэ, физикэр — 226-мэ, инджылызыбзэр — 149-мэ, нэмыцыбзэр ыкIи испаныбзэр нэбгырэ зырызмэ, литературэр — 107-мэ, географиер — 91-мэ атыщт.
Я 9-рэ классыр къэзыухы­хэрэм япчъагъэ зэхапшIэу хэ­хъуагъ, ахэр мыгъэ нэбгырэ 6039-рэ мэхъу, ахэм анэмыкIэу блэкIыгъэ илъэсхэм еджапIэхэм къачIэкIыгъэ нэбгырэ 56-мэ заушэтыщт. Мыгъэ ушэтынхэр зыщатыщт чIыпIэхэми ахагъэ­хъуагъ, 33-м нагъэсыгъ. Ахэр район анахь инхэм кIэу къащызэIуахыгъэх, шапхъэхэм адиштэу зэтырагъэпсыхьагъэх, Iэмэ-­псымэхэр ачIагъэуцуагъэх.
Я 9-рэ классыр къэзыухы­хэрэм жъоныгъуакIэм и 21-м ушэтынхэр аублагъэх. Ахэм IэкIыб къэралыгъуабзэхэмкIэ заушэтыгъ. Нэужым жъоны­гъуакIэм и 23-м ныдэлъфыбзэр, и 27-м — биологиер, информатикэр, обществознаниер, химиер, и 30-м — географиер, тарихъыр, физикэр, химиер, мэкъуогъум и 30-м — урысыбзэр, и 6-м хьисапыр, и 10-м — гео­графиер, информатикэр, об­ществознаниер, и 14-м биологиер, информатикэр, литературэр, физикэр атыщтых.
Я 11-рэ классыр къэзыухы­хэрэм жъоныгъуакIэм и 23-м ушэтынхэр аублэщт. Апэу географиемкIэ, литературэмкIэ, химиемкIэ заушэтыщт. ЖъоныгъуакIэм и 28-м — урысыбзэр, и 31-м хьисапыр лъэныкъуитIумкIи, мэкъуогъум и 4-м обществознаниемкIэ, физикэмкIэ, и 7-м ыкIи и 8-м информатикэмкIэ, IэкIыб къэралы­гъуабзэхэмкIэ (жэрыIокIэ) ушэ­тынхэр атыщтых. Мы мафэхэм емыкIолIэшъугъэхэм мэфэ тедзэхэр яIэщтых.
ЗэхъокIыныгъэу фэхъугъэхэр
2023 — 2024-рэ илъэс еджэгъум къыщегъэжьагъэу ащ ыпэкIэ еджапIэр къэзыухыгъэ­хэм пэшIорыгъэшъэу ушэтынхэр атыжьын амал яIэжьэп. Ар шэпхъакIэхэм ащыщ хъугъэ. Джы тыгъо шъхьаIэм имэфэ тедзэхэр ары ахэм зызаушэтын алъэкIыщтыр.
Мы илъэсым къыщегъэжьагъэу УФ-м и Президент иунашъокIэ шIокI зимыIэ ушэтынхэм анэмыкIэу ежь къыхахырэм щыщ джыри зэ атыжьын амал яIэщт. Шъолъыр гупчэм къызэ­рэщытаIуагъэмкIэ, ащ къы­хэкIы­кIэ ушэтынхэр зыщатыщт мафэ­хэм зэхъокIыныгъэхэр афэ­хъу­гъэх. Мы илъэсым тыгъо шъхьа­Iэр мэкъуогъум и 11-м, IэпэчIэгъэнэ мафэхэр мэкъуогъум и 21-м зэфашIыжьыщт. Бэдзэо­гъум и 4-м ыкIи и 5-м къыхахыгъэ предметхэр зыты­жьы зышIоигъохэр екIолIэщтых. КъэIогъэн фае, апэрэм къыща­хьыгъэ бал­лым уасэ иIэжьыщтэп, кIатыкIыжьыгъэм изэфэ­хьысыжь нахь макIэми, ар атхыщт.
Гукъау нахь мышIэми, зипсау­ныгъэкIэ илэгъухэм акIэмыхьэрэ ныбжьыкIэхэм япчъагъэ илъэс къэс хэхъо. Ахэм яфи­тыныгъэ­хэр къэухъумэгъэнхэм пае ищы­кIагъэр зэкIэ ашIэ. Я 11-рэ классыр къэзыухыхэрэм мы купым хэхьэрэ нэбгырэ 25-рэ ахэт, шъхьадж иуз елъытыгъэу адэзекIощтых, шъхьафэу классым чIэсыщтых. Мыгъэ зэкIэ ушэтыпIэ чIыпIэхэм къякIолIэщтых, гъэрекIо зы нэбгырэ унэм щитыгъагъ.
Я 9-рэ классыр къэзыухы­хэрэм сэкъатныгъэ зиIэ нэбгыри 171-рэ ахэт. Нэбгыритфымэ унэм исхэу ушэтынхэр акIущт, ащ фытегъэпсыхьэгъэ чIыпIэхэр зэрифэшъуашэу агъэхьазырыщтых.
Илъэс еджэгъум ушэтынхэм ныбжьыкIэхэр ыкIи ахэм янэ-ятэхэр афэхьазырынхэм фэшI Iофтхьэбзэ зэфэшъхьафхэр республикэм щызэхащагъэх. Ахэм яшIуагъэ къэкIонэу зэхэщакIохэр мэгугъэх.
ДЕЛЭКЪО Анет.