ХэушъхьафыкIыгъэ дзэ операцием зидзэ пшъэрылъхэр щызгъэцакIэзэ хэкIодэгъэ дзэкIолIхэм къафагъэшъошэгъэ къэ­ралыгъо тын лъапIэхэр яIахьыл гупсэхэм Мыекъопэ къэлэ администрацием тыгъуасэ щаратыжьыгъэх.

Iофтхьабзэм хэлэжьагъэх Мыекъуапэ имэрэу Геннадий Митрофановыр, ащ игуадзэу, ветеранхэм я къэлэ Совет итхьаматэу Юрий Томчак, Мыекъуапэ идзэ комиссарэу Алексей Санташовыр, зыпсэ зыгъэ­тIылъыгъэхэм яIахьылхэр.
Iофтхьабзэм ипэублэ шIуфэс гущыIэхэмкIэ къе­кIолIагъэхэм закъыфи­гъэзагъ къалэм идзэ комиссар.
— Зидзэ пшъэрылъхэр зыгъэцакIэхэзэ хэушъхьафыкIыгъэ дзэ операцием хэкIодагъэхэм къалэжьыгъэ тын лъапIэхэр яIа­хьыл­хэм яттыжьынхэу ты­зэ­хэхьагъ. Анахь охътэ къин къызкъокIым ахэр Хэгъэгур къаухъумэнэу къоу­цуагъэх ыкIи лIыхъужъ­ныгъэу зэрахьагъэм тари­хъыр лъигъэкIотэщт. Ти­къэралыгъо икъэкIощт уахътэ къэзыухъумэзэ зы­­псэ зыгъэтIылъыгъэхэм ацIэ егъашIи тщыгъупшэщтэп, тхьашъуегъэпсэу шъотэIо, шъхьащэ шъуфэтэшIы, — хигъэунэфы­кIыгъ Алексей Санта­шовым.
Урысые Федерацием и Президентэу Владимир Путиным иунашъокIэ лIы­хъужъныгъэу ыкIи псэ­емыблэжьыныгъэу къахэфагъэм афэшI щымыIэжьхэ младшэ сержантэу Евгений Морозовым, рядовоеу Артем Мартиросян ЛIыхъужъныгъэм иорден, рядовоеу Сергей Бело­усовым медалэу «За отвагу», рядовоеу Вячеслав Василенкэм медалэу «За храбрость» зыфиIоу я II-рэ шъуашэ зиIэр афагъэшъо­шагъ. А тын лъапIэхэр Геннадий Митрофановым зыпсэ зыгъэтIылъыгъэхэм яIахьылхэм аритыжьыгъэх.
— Зыпсэ емыблэжьхэу къэралыгъом инеущ фэбэнагъэхэм тафэраз. Хэгъэ­гум ипатриот шъыпкъэу зэрэщытхэр ахэм къагъэшъыпкъэжьыгъ. ТидзэкIолI­хэм лIыхъужъныгъэу зэра­хьагъэр тыгухэм арылъыщт. ЧIэнагъэу шъушIыгъэр къыдгурэIо, тышъуфэтхьаусыхэ, — къыIуагъ Мые­къуапэ имэрэу Геннадий Митрофановым.
Iэшъынэ Сусан.