Урысыем ичемпионат и Суперлигэ хэлэжьэрэ «АГУ-Адыифым» зэнэкъо­къум ифинал едзы­гъо къы­дыхэлъытагъэу Мые­къуапэ щыриIэгъэ ешIэ­гъур къыхьыгъ ыкIи мы спорт лъэпкъыр зыгу ри­хьыхэрэр ыгъэгушIуагъэх.

2023 — 2024-рэ ешIэгъу илъэ­сымкIэ мыр аужырэ зэIукIэгъоу щытыгъ. Шъугу къэдгъэкIыжьын, тикомандэ я 9 — 12-рэ чIыпIэхэм афэ­бэнагъ.
«АГУ-Адыиф» (Мые­къуапэ) — «Луч» (Москва) — 32:29 (14:14).
Командэхэм ахэт ешIакIохэм якъэгъэлъэгъонхэр:
«АГУ-Адыиф»: Терлецкаяр — 10, Кобл — 5, Миловар — 3, Коваленкэр — 3, Томилинар — 3, Бондаренкэр — 2, Краснокут­скаяр — 2, Алексеевар — 2, Болоба — 2.
«Луч»: Федосовар — 7, Крупенниковар — 4, Смирновар — 3, Махневар — 3, Шеина — 3, Шановар — 3, Комковар — 3, Черняевар — 2, Валгузовар — 1.
ЕшIэгъум цIыфыбэ еплъыгъ. БэмышIэу мы командэхэр зэIукIэгъагъэх, ащыгъум Москва илIыкIохэр хэпшIыкIэу нахь лъэшы­гъэх. Ащ къыхэкIыкIэ Адыгеим игандболисткэхэм текIоныгъэр къыдахыным яшъыпкъэу фэбэ­на­гъэх. Мы зэIукIэгъум еплъыгъэх атлетикэ псынкIэм илIыкIохэу Бел­город къикIыгъэхэр. Мы уахътэм ахэр Мыекъуапэ щыIэх.

Апэрэ таймыр гъэшIэгъонэу кIуагъэ. Мыекъуапэ игандболисткэхэр хьакIэхэм Iэгоуи 5-кIэ апэ ишъыхэу къыхэкIыгъ. Ау апэрэ таймыр амыухызэ «Лучым» пчъа­гъэр зэфэдиз ышIыгъ. Зыгъэ-
псэфыгъо уахътэм зэIукIэгъум еплъы­нэу къекIолIагъэхэм кон-
курс зэ­фэшъхьафхэр афызэхащагъэх, кIэлэцIыкIухэм ыпкIэ хэмы­лъэу мороженэр афагощыгъ.
ЯтIонэрэ таймым «АГУ-Адыифым» хэпшIыкIэу иешIакIэ ригъэ­хъугъ ыкIи къытефэу текIоныгъэр къыдихыгъ, пчъагъэр — 32:29.
— Мы ешIэгъум тэркIэ мэхьа­нэшхо иIагъ, текIоныгъэр къы­дэтхын фэягъ. Командэм зыкIы­ныгъэ зэрэхэлъыгъэм ишIуагъэкIэ итхъухьагъэр къыддэхъугъ, — къы­Iуагъ «АГУ-Адыифым» щешIэрэ Виктория Ко­валенкэм.
Купым хэт командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Ставрополье» — 29.
2. «АГУ-Адыиф» — 24.
3. «Луч» — 18.
4. «Университет» — 4.