Кощхьэблэ районым Лабэ исэмэгубгъу нэпкъ игъэпытэн щыдэлажьэх. Iоф­шIэнхэр зыщыкIохэрэр къуаджэу Еджэркъуай. Оелэ мафэхэр пэрыохъу къа­фэхъухэу мэфэ заулэм гъэцэкIэжьынхэр зэпыу­гъагъэх, ау джы къызэ­теу­­цогъэ фабэр псэолъэшIхэм къызфагъэфедэ, чанэу япшъэрылъхэр агъэцакIэ. ЧIыпIэм щыIагъ «Адыгэ макъэр».

IофшIэнхэр тIоу зэтеутыгъэх. Апэрэ Iахьым къыдыхэлъытагъэу псыхъо нэпкъ метрэ 95-р агъэпытэщт, ятIонэрэмкIэ — метрэ 230-рэ. ДжырэкIэ игъэ­кIотыгъэ IофшIэнхэр апэрэ Iа­хьым щэкIох. ЯтIэкIэ псы гъунэр къаIэтыгъэу Мыекъопэ районым къыращырэ мыжъошхохэм ягъэ­тIылъын макIо.
— Псыхъо нэпкъым изытет дэй дэдагъ, къыхэнагъэ щымыIэу псым ылъэсыхьэгъагъ пIоми хъущт. БлэкIыгъэ илъэсым Лабэ къызыдэкIуаем, джы къыдэмыкIымэ джы къыдэкIыщт зыфэпIо­щтым фэдагъ. Ащ дэжьым зы мэфэ лые ощхыгъэмэ, мэкъу­мэщ лэжьапIэхэм зэрахэлъа­дэщтыгъэм щэч хэлъэп. Метрэ 95-рэ икIыхьагъэу, метри 4,5-рэ фэдиз ишъомбгъуагъэу тэгъэпытэ, — тыщигъэгъозагъ Iоф­шIэнхэр зыкIорэ Iахьым итхьаматэу Алексей Пархоменкэм.
Ащ игущыIэхэр IофшIэныр рамыгъажьэзэ ашIыгъэ сурэтхэм къаушыхьаты. ШъыпкъэмкIэ, псыхъо нэпкъым изытет дэигъэ. Псыр къыдэкIыгъэмэ ащ къыпэIулъ мэкъумэщ лэжьыгъэшIэпIэ чIыгу гектар мин фэдизыр ыгъэфыкъощтыгъ. Арышъ, непэрэ IофшIэнхэм Еджэркъуае щыпсэухэрэмкIэ мэхьанэ ин яI.
— Мы чIыпIэм зыкIи псыхъор инэпкъымэ къащыдэкIы­гъэп, ау ащ лъэшэу тытещыны­хьэщтыгъ. Уплъэмэ, гу лъыотэ псыр исэмэгубгъукIэ нахь къызэрикIотыгъэр. Илъэс заулэкIэ узэкIэIэбэжьмэ метрэ 50 фэдизкIэ ар зэкIэдзэгъагъ. Арышъ, непэ мыщ щыкIорэ гъэцэкIэ­жьынхэр зигъо Iофыгъох. Оялэ хъоу, псыхъор къыдэкIуаемэ тыгумэкIыщтэп, — еIо Еджэркъое къоджэ псэупIэм ипащэу Брафт Руслъан.
Мы къэблэгъэрэ мазэхэм IофшIэнхэм яапэрэ Iахь кIэм нагъэсымэ ятIонэрэ Iахьым фежьэщтых. Джы IофшIэнхэр зыщыкIохэрэм, Лабэ исэмэ­губгъукIэ уготэу уехымэ, ар щыгъэпсыгъ. ГъэцэкIэжьынхэр резгъэкIокIыхэрэм къызэрэхагъэщырэмкIэ, ар нахь ин — метрэ 230-рэ, ау изытет на­хьышIу. Апэрэм дамбэри, ащ къешIэкIыгъэхэри щызэхэкъу­тэгъагъэхэмэ, адырэм пытэпIэ лъапсэр къыщызэтенагъ. Iоф­шIэнхэр ащ къыгъэпсынкIэщтых.

Нэпкъым игъэпытэнкIэ Iоф­шIэнхэр рахъухьэхэ зэхъум илъэситIум тыралъытэгъагъ: апэрэ Iахьыр — мы илъэсым, ятIонэрэр — къакIорэм. Ау мы илъэсым тIуми игъо афифэнхэр ямурад ыкIи 2024-м ыкIэ нэс къаухынхэу агъэнафэ. ГъэцэкIэжьынхэм апэIухьэрэ ахъщэр федеральнэ ыкIи рес­публикэ бюджетхэм къахэхыгъ. IофшIэнхэм сомэ миллион 17-м ехъу апэIуагъэхьанэу рахъу­хьагъ.
Кощхьэблэ районым иад­министрацие граждан ухъу­мэнымкIэ ыкIи ошIэ-дэмышIэ IофхэмкIэ иотдел къызэритырэмкIэ, Еджэркъуае фэшъхьафэу Натырбые дэжь псыхъо нэпкъхэр щагъэпытэщт. 2024 — 2025-рэ илъэсхэм ар мыгъэ телъытэгъэщт.
Анцокъо Ирин.