Урысыем и Къыблэ шъолъыр ипарламентхэм я Ассоциацие ия XL-рэ конференцие Къалмыкъ Республикэм икъэлэ шъхьаIэу Элиста щыкIуагъ. Адыгеим илIыкIохэу ащ хэлэжьагъэх Къэралыгъо Совет – Хасэм и Тхьаматэу Владимир Нарожнэр, ащ игуадзэу Цэй Эдуард, депутатхэу Шэуджэн Сэфэр, Мыгу Адам ыкIи Наталья Широковар.
Зэрэхабзэу ыпэрапшIэ Ассоциацием икомитетхэм зэхэсыгъохэр яIагъэх. Шъхьадж зыфэгъэзэгъэ лъэныкъом елъытыгъэу шъолъырхэм яхэбзэихъухьэ къулыкъухэр кIэщакIо зыфэхъугъэ джэпсалъэхэм, законопроектхэм ахэм ащытегущыIагъэх.
Ащ дакIоу дзэкIолIхэр щыIэныгъэм социальнэу хэгъэгъозэжьыгъэнхэмкIэ, ветеранхэм яIофхэмкIэ ыкIи патриотическэ пIуныгъэмкIэ Комиссиер зэхэсыгъ. Ащ хэт АР-м и Къэралыгъо Совет – Хасэм хэбзэихъухьанымкIэ и Комитет ипащэ игуадзэу Мыгу Адам. ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм IэпыIэгъоу къэралыгъом аритырэм, дзэкIолIхэр щыIэныгъэм социальнэу хэгъэгъозэжьыгъэнхэм, патриотическэ пIуныгъэм, нэмыкIхэм ащ щатегущыIагъэх.
Нэужым Урысыем и Къыблэ шъолъыр ипарламентхэм я Ассоциацие и Совет зэхэсыгъ. Пленарнэ зэхэсыгъом пае комитетхэм къагъэхьазырыгъэ повесткэм ащ щытегущыIагъэх, Iофыгъоу щыгъэнэфагъэхэм адырагъэштагъ.
Конференциеу зэпстэур зыщызэфахьысыжьыгъэм Урысыем и Къыблэ шъолъыр ихэбзэихъухьэ къулыкъухэр кIэщакIо афэхъугъэхэу джэпсэлъэ ыкIи законопроект 60-мэ щатегущыIагъэх. АР-м и Къэралыгъо Совет – Хасэм идепутатхэр кIэщакIо зыфэхъугъэхэри ахэм ащыщых.
ЦIыфэу IофшIапIэ Iутым илъэс къэс къыратырэ зыгъэпсэфыгъо уахътэм (отпуск) пIалъэу иIэр лъыгъэкIотэгъэным ушъхьагъоу фэхъун ылъэкIыщтхэм алъэныкъокIэ УФ-м IофшIэнымкIэ и Кодекс зэхъокIыныгъэхэр фэшIыгъэнхэм фэгъэхьыгъ зы джэпсалъэр. Сабыеу къэсымэджагъэм ныр е тыр ыуж зыщитыгъэ уахътэр зыгъэпсэфыгъо тэрэз мыхъоу ары Адыгеим и Парламент идепутатхэм зэралъытэрэр. Ащ къыпкъырыкIхэзэ, кIэлэцIыкIум ипсауныгъэ изэтегъэуцожьын тыригъэкIодэгъэ мафэхэр отпускым хамылъытэхэу, пIалъэу ар зыщиухын фэягъэр лъагъэкIотэным кIэщакIо фэхъугъэх.
Ны-тыхэм ясабыйхэр зэраIыгъхэм, зэрапIухэрэм япхыгъэ Iофхэм афэгъэхьыгъэ джэпсалъи тидепутатхэм ЮРПА-м къыхалъхьагъ. Нымрэ тымрэ зэхэкIыжьыгъэхэу ахэм ясабыйхэр очнэ шIыкIэм тетэу еджэхэмэ, аныбжь илъэс 23-м нэсыфэкIэ кIэлэпIупкIэр ятыгъэн фаеу алъытэ.
Сабыибэ зыпIурэ ны-тыхэм пенсиехэр зэрафагъэуцухэрэм фэгъэхьыгъэ джэпсалъэми ахэр кIэщакIо фэхъугъэх. Ным е тым япенсие загъэнафэкIэ кIэлэцIыкIу къызыфэхъум ащ зэрэлъыплъэгъэ уахътэр страхованиемкIэ IофшIэгъэ илъэсхэм ахэгъэхьэгъэнэу къыздэлъытэгъэ гъэтэрэзыжьынхэр хэбзэгъэуцугъэм фэшIыгъэнхэ фаеу ащ къыщеIо.
Депутатхэм зэралъытэрэмкIэ, ащ фэдэу ны-тыхэр кIэлэцIыкIухэм зыщалъыплъэхэрэ уахътэм гъунапкъэ зэриIэм, коэффициентхэр къызэралъытэрэ шIыкIэм сабыибэ яIэным унагъохэр кIигъэчэфыхэрэп, кIэлэцIыкIум ыныбжь илъэсрэ ныкъорэ зэрэхъугъэм тетэу IофшIапIэм кIонхэр нахь тэрэзэу къыхахыным фэIорышIэ.
Адыгеим и Парламент кIэщакIо зыфэхъугъэхэм зэкIэми къадырагъэштагъ.
Къэралыгъо Советым – Хасэм и Тхьаматэу Владимир Нарожнэм зэпстэур къызэфихьысыжьзэ, УФ-м и Президентэу Владимир Путиным и Джэпсалъэ пшъэрылъэу къыщишIыгъэхэм, партиеу «Единэ Россием» и Лъэпкъ программэ япхырыщынкIэ шъолъырхэм опытэу яIэмкIи мы конференцием зэрэщызэдэгощагъэхэр, унагъом и Илъэс къыдыхэлъытэгъэ Iофтхьабзэхэм язэхэщэн, сабыибэ зэрыс унагъохэм социальнэ IэпыIэгъу ятыгъэным афытегъэпсыхьэгъэ IофшIэнэу хэбзэихъухьэхэм апэ илъым зэрэтегущыIагъэхэр къыIуагъ.
— АР-м и ЛIышъхьэу КъумпIыл Мурат пэщэныгъэр зэрихьэзэ, мы лъэныкъохэмкIэ Адыгеим Iофышхо щашIэ. ЦIыфхэм ягумэкIыгъохэм ядэгъэзыжьын, лъэпкъ ыкIи стратегическэ пшъэрылъ шъхьаIэхэм япхырыщын ар фэIорышIэ. Федеральнэ гупчэм иIэпыIэгъукIэ республикэм проектышхо ыкIи программэ зэфэшъхьафыбэ щыпхыращы. Ахэм къадыхэлъытагъэу кIэлэцIыкIу IыгъыпIэхэр, еджапIэхэр, спортым, культурэм, псауныгъэм икъэухъумэн япхыгъэ учреждениехэр кIэу ашIых, щыIэхэр агъэцэкIэжьых, инфраструктурэр агъэкIэжьы, кIэлэцIыкIу зэрыс унагъохэм, анахьэу сабыибэ зиIэхэм, IэпыIэгъу арагъэгъоты. Унагъом мэхьанэу иIэм игъэпытэн фытегъэпсыхьэгъэ хэбзэихъухьан IофшIэныр депутатхэмкIэ апшъэ щытхэм ащыщ. ГущыIэм пае, аужырэ илъэситфым АР-м ихэбзэгъэуцугъэу аштагъэм ызыщанэр пIоми хъунэу, социальнэ лъэныкъом фэгъэхьыгъ, — къыкIигъэтхъыгъ Владимир Нарожнэм.
ХЪУТ Нэфсэт.