«Музейхэм ячэщ» къыдыхэлъытагъэу, усэхэр зыщызэхэугъоегъэхэ тхылъэу «Жизнь за други своя» зыфиIорэм илъэтегъэуцо фондэу «Хэгъэгум иухъумакIохэр» зыфиIорэм ишъолъыр къутамэ ригъэкIокIыгъ.

Ащ фэгъэхьыгъэ Iофтхьабзэм нэбгырэ 70-м ехъу хэлэжьагъ. ХэушъхьафыкIыгъэ дзэ операцием хэлэжьагъэхэм якъэбар­хэр усэхэмкIэ ыкIи прозэмкIэ къиIотыкIыгъэхэу тхылъым дэхьагъэхэм ащыщхэм къяджагъэх АР-м и Концерт зэхахьэ, Камернэ музыкальнэ театрэм ыкIи искусствэхэмкIэ еджапIэм яартистхэр.
Литературнэ композицием едэIунхэу Хэгъэгум идзэкIолI­хэм яунагъохэр, яшъхьэгъусэхэр, янэхэр, студентхэр ыкIи юнармейцхэр къэкIуагъэх. Хэ­ушъхьа­фыкIыгъэ дзэ операцием илIы­хъужъхэм лъытэныгъэу афашIырэр ыкIи ахэм яунагъохэм гуфэбагъэ зыхэлъ IэпыIэгъоу арагъэгъотырэр Iофтхьабзэм къыщыхэ­щыгъ. Хэгъэгум иухъумакIохэм лIыхъужъныгъэу ыкIи псэемыблэжьныгъэу зэрахьагъэр анэгу къыкIагъэуцозэ, къекIолIагъэхэр ашIогъэшIэгъонэу едэIугъэх. Бэхэм анэпсхэр къашIокIуагъэх.
ЕдэIугъэхэм тхылъыр ашIогъэшIэгъон хъугъэ, зэрэзэхагъэуцонэу хъугъэм ыкIи дзэкIолI гъэнэфагъэхэм якъэбархэм къакIэупчIагъэх. Тхылъэу «Жизнь за други своя» зыфиIорэр зэрагъэгъотымэ зэрашIоигъор бэхэм къаIуагъ.