Адыгеимрэ Пшызэ шъолъыррэ ащыпсэурэ быслъымэнхэм я ДиндэлэжьапIэ имуфтий иапэрэ гуадзэу Хъущт Азэмат Адыгеим икъэбарлъыгъэIэс амалхэм ялIыкIохэм зэIукIэгъу адыриIагъ. Терроризмэм зимыушъомбгъуным, ар къэмыгъэхъугъэнымкIэ ДиндэлэжьапIэм шъолъыритIум Iофэу ащишIэрэм журналистхэр щигъэгъозагъэх, яупчIэхэм джэуапхэр къаритыжьыгъэх.

Терроризмэмрэ экстремизмэмрэ къэмыгъэхъугъэнхэр Адыгеим ыкIи Пшызэ шъолъыр я ДиндэлэжьапIэ лъэныкъо шъхьаIэу аужырэ илъэсхэм Iоф зыдишIэрэмэ ащыщ. Хъущт Азэмат къызэриIуагъэмкIэ, Адыгеир зыхэхьэрэ Темыр Кавказым щыпсэурэ быслъымэн­хэм язэхэщэкIо Гупчэ аужырэ илъэситфым мы Iофыгъом фэгъэхьыгъэ Iоф­тхьабзэ 200 фэдиз ригъэкIокIыгъ. Ащ нэмыкIэу терроризмэмрэ экстремизмэм­рэ къэмыгъэхъугъэнхэр зипшъэрылъ Iофтхьабзэ зэмылIэужыгъуабэ ДиндэлэжьапIэм шъхьафэу республикэми, краими ащызэхещэх.
Непэ республикэми гъунэгъу шъолъыр­ми зэхэтэу мэщыт 52-рэ (Адыгеим 45-рэ), тхьэлъэIупIэ 25-рэ, Iимам 68-рэ, ефэнд 40 ащэлажьэ. Тхьамафэ къэс ахэм бэрэскэшхо нэмазхэр ащэкIох. ЦIыфхэм адэгущыIэгъэнымкIэ, терроризмэмрэ экстремизмэмрэ еу зэрэщытхэр агурыгъэIогъэнымкIэ ар амалышIоу Хъущт Азэмат къеIо..
— Мыекъуапэ, Инэм, Кощхьаблэ, Шъачэ, Новороссийск ащыкIорэ мэфэкI ыкIи бэрэскэшхо нэмазхэм нэбгырэ мин ыкIи нахьыбэ къякIуалIэ. Шъыпкъэ, эк­стремизмэмрэ терроризмэмрэ япхыгъэ Iофыгъохэм бэрэскэшхо къэс тарэгущыIэ сIон слъэкIыщтэп, ау цIыфыныгъэм икъэухъумэн, хэти зэрэзекIон фаер афэтэIуатэ. БлэкIыгъэ илъэсым муфтиир тигъусэу мэщыт инхэм тяблэгъагъ ыкIи терроризмэм лъапсэ фэхъурэр, теплъэ зэфэшъхьафэу иIэхэр, быслъымэн диным зэрэдимыштэрэр къафэтIотагъ.
Джащ фэдэу апшъэрэ дин гъэсэныгъэ зиIэ Iимамхэм егъэджэнхэр зэхащэх. Ахэм япчъагъэ макIэми, мэщытышхохэр къызэлъаубытынхэ алъэкIы. Бэрэскэшхо, мэфэкI нэмазхэм якIуалIэхэрэр Iимамым игъэсэпэтхыдэ едэIух, егъэджэнхэр упчIэ-джэуап шъуашэм илъэу макIох, шъхьафэу зы нэбгырэм дэлэжьэшъух, упчIэу къатырэм елъытыгъэу цIыфым игупшысэхэм гу лъатэныр афызэшIокIы. Ащ фэшъхьафэу телеграм нэкIубгъомкIи ныбжьыкIэхэм Iоф адашIэ. Хъутбэхэм къащаIэтырэ упчIэхэр зэкIэ ащ къырагъуатэх. Тхылъ еджэныр макIэ зыщыхъу­гъэ лъэхъаным мыщ фэдэ екIолIакIэхэр нахь къэгъэлъэгъонышэIу динлэжьхэм алъытэ ыкIи Хъущт Азэмат къызэри­--IуагъэмкIэ, мы гъатхэ «Крокус-Сити» къыщыхъугъэ тхьамыкIагъом цIыфхэм еплъыкIэу фыряIэм ар къеушыхьатыгъ.
— Москва къыщыхъугъэ тхьамыкIагъор быслъымэнхэм япроцент 99-мэ зыфэдэ къэмыхъугъэ хьэкIэ-къокIагъэу алъытагъ. Тиреспубликэ пштэмэ, ар «дэгъу», «тэрэз» ыIонэу зы нэбгырэ къикIыгъэп. Тимэщытхэм къакIорэ динлэжьхэм бзэджашIэхэр агъэмысагъэх. Ащ къикIырэр цIыфхэм непэ къагурэIо, тхьамыкIагъоу къэхъухэрэм акIыб дэтыр алъэгъу. Джащ фэд хэушъхьафыкIыгъэ дзэ операциеу непэ кIорэри. Тикъэралыгъо ичIыгу закъоп къыухъумэрэр, гушъхьэбаиныгъэу тиIэми фэбанэ. Ари цIыфхэм непэ къагурэIо. Ар зыщызэхэтфырэ Iофтхьабзэхэри зэхэтэщэх, яшIуа­гъэ къакIоуи тэлъытэ, — еIо Хъущт Азэмат.
Мыщ фэдэ Iофэу тшIагъэхэм яшIуагъэ зэщыкъуагъэ мыхъуным фэшI радикализ­мэм, экстремизмэм, терроризмэм еу къахьырэр, ятеплъэ зыфэдэр ныбжьыкIэхэм ренэу къафэIотэгъэныр ДиндэлэжьапIэм игъоу елъытэ, сыда пIомэ мэщытхэм къякIуалIэхэрэм япроцент 90-р ахэр ары.
Джащ фэд араб-израиль зэпэуцужьэу непэ кIорэри. Ащ къыхэкIэу лъэпкъ дин зэмызэгъыныгъэхэр къэмыгъэхъугъэнхэр пшъэрылъ шъхьаI. АщкIэ республикэм гупсэфыныгъэ зэрилъыр упчIэу къатыгъэм иджэуапыгъ.
— КъызхэкIырэр сшIэрэп, ау тибыслъы­мэнхэр ащ фэдэ Iофыгъохэм нахь губзыгъэу къякIуалIэх. ГущыIэм пае, блэкIы­гъэ илъэсым Дагъыстан щыхъугъэр шъулъэгъугъэба. Ащ фэдэ зекIуакIэхэр Адыгейми Пшызэ шъолъырми ащыдгъэ­унэфыгъэп. Хъурэ-шIэрэр тэрэзэу къызгурыIорэ цIыфхэми ар яхьатыр, Iофэу тшIэрэми ишIуагъэ къэкIо. Шъугу афэ­узмэ е IэпыIэгъу шъуафэхъунэу шъуфаемэ Тхьэм шъуафелъэIу, ящыкIагъэр афэшъуугъой ятэIо, — къыхигъэщыгъ Хъущт Азэмат.
Унагъом имэхьанэ, ащ ишэн-хабзэхэм якъызэтегъэнэн ДиндэлэжьапIэм мэхьанэшхо реты. Мы илъэсыр унагъом и Илъэсэу Урысыем и Президентэу Владимир Путиным зэригъэнэфагъэм къыдыхэлъытагъэу Iофтхьэбзэ зэфэшъхьафхэр зэхащэх. Ахэр Iэнэ хъураех, зэIукIэх, егъэджэн зэфэшъхьафых.
Анцокъо Ирин.
Сурэтыр: А. Лаутеншлегер