Урысые зэнэкъо­къоу «Воплоти свою мечту!» зыфиIорэр мы мафэ­хэм Мыекъопэ къэралыгъо технологическэ университетым щыкIуагъ.

Апшъэрэ еджапIэмрэ АР-м гъэсэныгъэмрэ шIэныгъэмрэкIэ и Министерствэрэ ащ кIэщакIо фэ­хъугъэх.
Мы илъэсым Iофтхьа­бзэм куп 200 фэдиз хэлэжьагъ. Финалныкъом 92-рэ, ахэм ащыщэу куп 62-р финалым ихьагъэх. Воронежскэ, Новгородскэ, Саратовскэ, Тульскэ, Пензенскэ хэкухэм, Краснодар краим, Москва, ­Адыгэ Республикэм ыкIи Удмуртием ащыщ ныбжьыкIэхэм япроектхэр къагъэ­лъэгъуагъэх. Ахэм ащыщ­хэр онлайн шIыкIэм тетэу хэлэ­жьагъэх.
Мэфищрэ ныбжьыкIэхэр зэнэкъокъугъэх, лъэны­къуи 6-кIэ проектэу агъэ­хьазырыгъэхэр къыраIотыкIыгъэх. НыбжьыкIэхэм яшIэныгъэхэм ахагъэхъоныр, проект зэфэшъхьаф­хэр зэхагъэуцон алъэкIыныр, зыщыпсэухэрэ чIыпIэхэр нахь дахэ ашIынхэм фэщэгъэнхэр ары пшъэрылъ шъхьаIэу зэ­хэщакIохэм зыфагъэуцу­жьыгъэр.
Зэнэкъокъум икIэща­кIоу, МКъТУ-м маркетингымкIэ, сервисымкIэ ыкIи зекIонымкIэ икафедрэ идо­центэу, апшъэрэ еджапIэм къыщызэIуахыгъэ «Точка кипения» зыфи­Iорэм ипрограммнэ па-щэу Светлана Новиковам къы­зэрэтиIуагъэмкIэ, Iофтхьабзэм хэлажьэхэрэм япчъа­гъэ илъэс къэс хэхъо.
— Зэнэкъокъур гъэ­ре­кIо шэкIогъум тыублагъ. Куп 200 фэдизмэ лъэ­ны­къо зэфэшъхьафхэмкIэ проектхэр къагъэхьазырыгъэх. ШIушIэнымкIэ, предпринимательствэмкIэ, ме­диа, ИТ, цифрэ технологиемкIэ, чIыпIэ зэфэ­шъхьафхэр зэтегъэпсыхьэгъэнхэмкIэ, псауныгъэмкIэ яшIошIхэр къызыщыраIотыкIыгъэ IофшIэнхэр къагъэлъэгъуагъэх. Мы илъэ­сым апэрэу зэнэкъокъум хэлажьэхэрэм апае мас­тер-классхэр, нэмыкI Iоф­тхьабзэхэр афызэхэтщагъэх. ЯтIонэрэ илъэс хъу­гъэу хэушъхьафыкIыгъэ лъэныкъоу «Устойчивый туризм» зыфиIорэр къы­хэдгъэхьагъ, ар джырэкIэ зигъо къэсыгъэ Iофыгъоу тлъытагъ, — къыIуагъ Светлана Новиковам.
ТекIоныгъэр къыдэзы­хыгъэхэм щытхъу тхылъхэм ягъусэу мы апшъэрэ еджапIэм чIэхьанхэмкIэ балли 10, хагъэунэфыкIырэ чIыпIэ къыдэзыхыгъэ­хэм балли 8 къафыха­гъэхъощт.
ДЕЛЭКЪО Анет.