Адыгеим лъэшэу анаIэ щытырагъэты къоджэ псэу­пIэхэм якIолIэрэ гъо­гухэм.

Лъэпкъ проектэу «Щы­нэ­гъончъэ ыкIи шэпхъэшIухэм адиштэрэ гъогу­хэр» зыфиIорэм къыды­хэлъытагъэу федеральнэ шапхъэхэм адиштэу игъо­рыгъоу агъэкIэжьых поселкэу Тульскэм екIурэ гъогухэр.
ТапэкIэ, 2022 — 2023-рэ илъэсхэм ащ игъогу Iахьхэу километри 4 хъу­рэр агъэкIэжьыгъ, мы илъэсым ащ къыкIэлъыкIорэ гъогу Iахьэу километри 7,2-рэ зикIыхьа­гъэр агъэцэкIэжьынэу агъэна­фэ, ар илъэсым телъытэгъэ IофшIэнхэмкIэ анахь гъогу кIыхьэу щыт. Ащ елъытыгъэу, Мыекъуапэ-
рэ Мыекъопэ районым ипсэупIэ шъхьаIэрэ зэзыпхыхэрэ гъогум идэгъугъэ бэ темышIэу шъолъырым щыпсэурэ цIыфхэри хьа­кIэхэри ыгъэгушIощтых.
Мы гъогу Iахьым игъэцэкIэжьынкIэ аукционэу зэхащагъэм текIоныгъэр къыщыдэзыхыгъэр ак­ционер обществэу «ДСУ N 3-р» ары, IофшIэнхэм апэIуагъэхьанэу зэкIэмкIи сомэ миллиони 179,96-рэ зэзэгъыныгъэу ащ дашIыгъэм къыделъытэ. ГъогушIхэм шъолъыр гъогур шапхъэмэ адиштэу агъэцэкIыжьырэ къодыеп, ащ къыпэIулъ уцупIэхэри зэ­блахъух, кIэхэр агъэуцух, псэупIэхэм якIолIэрэ гъо­губгъухэр агъэпытэх, лъэс гъогухэр афашIых, зэпырыкIыпIэхэр агъэнафэх.
IофшIэнхэм хэушъхьафыкIыгъэ техникэ 15 аха­гъэлажьэ. ГъэцэкIэжьынхэр зыщыкIорэ чIыпIэхэм автотранспортыр чэ­зыу-чэзыоу арагъэкIонэу агъэ­псыгъ. Гъогум иIахьышхо игъэцэкIэжьын ежь поселкэу Тульскэм щэкIо, ащ пае ар едзыгъо-едзыгъоу зэтыраутыгъ. Зы IофшIэнхэр зыщыкIохэрэ Iахьыр автотранспортым къыу­хьан ылъэкIынэу шIыгъэ.
«Адыгеяавтодорым» и ГъэIорышIапIэу мы Iоф­шIэнхэр языгъашIэхэрэм къыдилъытагъ автомобиль уцупIэхэр нахьыбэу поселкэм къыщыхэхыгъэнхэр, анахьэу ахэр зыщашIыхэрэр социальнэ псэуалъэхэм, гупчэ бэ­дзэрым, административнэ унэхэм ыкIи тучанхэм адэжь.
Зэзэгъыныгъэм зэритымкIэ, IофшIэнхэр зэкIэ шышъхьэIум нэс аухынхэу ары, ау ахэр бэкIэ нахь псынкIэу зэшIохыгъэ­хэ хъущт — жъоныгъокIэ мэфэкI мафэхэр зыщау­хырэм нэс.