Медицинэм иIофышIэ анахь дэгъухэм ясатыр хэтэу Мэйкэпэрэ Таисэ илъэс щэкIым ехъугъэу Шъэуджэн район гупчэ сымэджэщым щэлажьэ. Псауныгъэм икъэухъумэнкIэ гъэхъэгъэшIоу ышIыгъэхэм афэшI щытхъу тхылъыбэ къыфагъэшъошагъ.

Iэдэб хэлъэу иIофшIэн зыгъэцакIэу, цIыфхэм шъхьэкIэфагъэ афэзышIырэр ары зидахэ аIоу хабзэр. Къуаджэу Къэ­бэхьаблэ щыщэу Мэйкэпэрэ Таисэ зисэнэхьат шIу зылъэгъурэ, сымаджэхэм ынаIэ атезыгъэтырэ цIыф. Ар терапевтическэ отделением имедсестра шъхьаIэу илъэсыбэ хъугъэу мэлажьэ.
Мыекъопэ медицинэ училищыр къы­ухыгъ. Шэуджэн район сымэджэщым 1991-рэ илъэсым IофшIэныр щыригъэ­жьагъ, непи ащ Iут.
Зы мэфэ IофшIэгъум сымаджэу къеуалIэрэм ипчъагъэ шэпхъэ гъэнэфагъэ пымылъэу, цIыфыбэмэ ар IэпыIэгъу афэхъу.

— ЦIыфым сэнэхьатэу къыхихыщтыр лъым хэлъэу къэхъоу ары сызэрегупшысэрэр. СицIыкIу­гъом къыщыубла­гъэу гукIэгъуныгъэр къысэбэ­кIэу сыкъэтэджыгъ. Непэ къызнэсыгъэми гумахэу сыщыт, зыгорэ къызысыма­джэ­кIэ ащ псынкIэу сишIуагъэ зэрезгъэкIыщтым, IэпыIэгъу сызэрэфэхъущтым сыпылъ. Медицинэ IофшIэныр гъэшIэгъоны, гушIуагъуи, нэшхъэигъи хэлъ. СлъэкIырэмкIэ цIыфхэм садеIэ, сишIуагъэ ясэгъэкIы. Сымаджэхэм зэрифэшъуашэу тызэрафыщытын фаер анахь шъхьа­Iэу сэлъытэ. ПсауныгъэмкIэ зы такъикъыми мэхьанэшхо иI. ЦIыфым апэрэ IэпыIэгъур ебгъэгъотыным фэшI илажьэр псынкIэу бгъэунэфын фае. СиIоф згъэтэрэзыным сыдигъуи сыпылъ, ащ есымыгъэ­хъумэ, къы­щызгъэкIэщтэп, — къеIуатэ Таисэ.
IэзапIэм иврач шхьаIэу Гъыщ Сусанэ зыIудгъэкIагъ, яIофшIэн зэрэзэхащэрэм фэгъэхьыгъэ упчIэхэр ащ фэдгъэзагъэх.
— Шэуджэн районым нэбгырэ мин 16,5-м ехъу щэпсэу, ахэм ащыщэу илъэсым къыкIоцI медицинэ IэпыIэгъу зищыкIагъэу мини 7-м нахьыбэ къытэуалIэ. ЦIыфхэмкIэ Iэрыфэгъу дэдэу щыт район гупчэ сымэджэщым чэщи мафи щяIазэх, инсульт, инфаркт хъугъэ сымэджэ хьылъэ­хэр Мыекъуапэ ятэгъащэх. Узым зыгу ыгъэцIыкIугъэ цIыфхэм тиIэпыIэгъу ятэгъэкIы. Сымаджэ пэпчъ екIолIэкIэ гъэ­нэфагъэ къыфэтэгъоты, игумэкIыгъо дэгъэзыжьыгъэ зэрэхъущтым тыпылъ, гуфэбагъэ хэ­лъэу ауж тит.
Мэйкэпэрэ Таисэ ипшъэрылъхэр анахь дэгъоу зыгъэцакIэхэрэм ащыщ, инэу тыфэраз, — хигъэунэфыкIыгъ IэзапIэм ипащэ.
СымаджэмкIэ гущыIэ дахэм мэхьанэшхо иI, сыда пIомэ врачым къыриIорэр ащ ышIошъ мэхъу, ыгу реубытэ.
— ТиIэзапIэ лъэшэу сыфэщагъ ыкIи сыфэраз, — еIо Таисэ. —КъытэолIэрэ цIыфхэр дэгъоу сэшIэх, ежьми сашIэ, ащи мэхьанэшхо иI. IэпыIэгъу зищыкIагъэм тыдеIэныр, ипсауныгъэ, ары пакIошъ, ищыIэныгъэ тэ тIэ зэрилъыр зэхапшIэмэ, сыд икъиныгъэми, уисэнэхьат уфэшъыпкъэщт, уиIофшIэн рэзэныгъэ хэпхыщт.

НэкIубгъор зыгъэхьазырыгъэр Лъэпшъыкъо Фатим.

Сурэтхэр: Iэшъынэ Аслъан.