Экономикэмрэ социальнэ лъэныкъомрэкIэ цифровизацием зегъэу­шъомбгъугъэнымкIэ пшъэрылъэу АР-м и ЛIышъхьэу КъумпIыл Мурат къыгъэуцугъэр агъэцакIэзэ, Адыгеим Iофтхьэбзэ зэфэшъхьафхэр щызэрахьэх.

Ахэм зэу ащыщ ахъщэ тын системэу «Мирыр» зылъэпсэ про­ектэу «Адыгэ Республикэм щыпсэурэм икартэ» зыфиIорэр. Къэбар-ахъщэ тын фэIо-фашIэ­хэм республикэм зыщягъэу­шъом­бгъугъэным, Адыгеим ис­хэм мылъкум игъэфедэнкIэ шIэ­ныгъэу яIэм зыкъегъэIэтыгъэнымкIэ Iофтхьабзэхэр зэхэщэгъэнхэм ар афытегъэпсы­хьагъ. Проектым игъэцэкIэн пае АР-м иминистрэхэм я Кабинетрэ системэу «Мирымрэ» зэ­дэлэжьэныгъэ зэрэзэдыряIэщтым фэгъэхьыгъэ зэзэгъыныгъэм зэдыкIэтхагъэх.
Хэгъэгум технологическэ суверенитет иIэнымкIэ ыкIи лъэпкъ проектэу «Цифровая экономика» зыфиIорэм игъэцэкIэнкIэ УФ-м и Президентэу Владимир Путиным пшъэры­лъэу къафишIыгъэхэм ягъэцэкIэн мэхьанэшхо зэриIэр АР-м и ЛIышъхьэ къыхигъэщыгъ. Ахэр зыфытегъэпсыхьагъэхэр технологие пэрытхэр зыщыгъэфедэгъэ бизнес зэхэщэгъэныр, хэгъэгум ищынэгъончъагъэ гъэпытэгъэныр, цIыфхэм ящыIэкIэ-псэукIэ зыкъегъэIэтыгъэныр ары.
«Лъэныкъо пэпчъ «цифровая зрелость» зыфиIорэм нэсыным пае инновациехэр,
къэ­бар, теле­коммуникационнэ тех­нологие­хэр, фэIо-фэшIэ лъэпкъ­хэу джы­рэ шапхъэхэм адиштэхэрэр нахь икъоу къызыфигъэфедэнхэм мэхьанэшхо иI. Цифровизацием цIыфхэм ящыIэкIэ-псэукIэ зыкъыригъэIэтын, къэралыгъо фэ­Iо-­фа­шIэхэм язэхэщэн нахь Iэрыфэгъу ышIын фае. ПроектыкIэм тыкъытегущыIэ зыхъукIэ къэIогъэн фае ахъщэ мыIэрылъхьэр зыгъэфедэрэ системэм ихэхъоныгъэхэм цIыфхэм афагъэцэкIэрэ финанс фэIо-фа­шIэхэм зызэрарагъэушъомб­гъу­щтыр, республикэм исоциальнэ-экономикэ хэхъоныгъэ, инвестициехэр нахьыбэу Адыгеим къыхалъхьанхэм ахэр зэрафэIорышIэщтхэр», — къыIуагъ КъумпIыл Мурат.
Системэу «Мирым» игенеральнэ пащэ ипшъэрылъхэр пIалъэ горэкIэ зыгъэцэкIэрэ Олег Тишаковым къызэриIуа­гъэмкIэ, Адыгэ Республикэм щыпсэурэм икартэ системэу «Мирым» ибанк картэу щыт. Ахъщэм игъэзекIон епхыгъэ операцие зэфэшъхьафхэр ащкIэ ашIын зэралъэкIыщтым имызакъоу, фэгъэкIотэныгъэ зиIэ уасэкIэ транспортым рызекIонхэу, коммунальнэ фэIо-фашIэхэм атефэрэ уасэр атынэу амал яIэщт, республикэм щагъэфедэрэ фэгъэкIотэныгъэ, бонус зэфэшъхьафхэр къаратын алъэ­кIыщт. ГущыIэм пае, социальнэ ахъщэ IэпыIэгъухэр, республикэ предприятие зэфэшъхьафхэм, культурэм, зекIоным, спортым яучреждениехэм япрограммэхэмкIэ мылъкоу зэIуагъэкIагъэр къаIахынымкIэ а картэр къызфагъэфедэн алъэкIыщт.
Республикэм щыпсэурэм икартэ финанс, социальнэ ама­лэу щыт. ФэгъэкIотэныгъэ хэлъэу къэралыгъо фэIо-фашIэхэр къафагъэцэкIэнхэмкIэ ыкIи социальнэ IэпыIэгъу зэрарагъэ­гъотырэ нэмыкI лъэныкъохэмкIэ электрон гуадзэхэр къызфагъэфедэн алъэкIыщт. Цифрэ фэIо-фашIэхэр къызыфагъэфедэхэзэ социальнэ проектхэр зэрагъэцэкIэщтхэм ишIуагъэкIэ бюджет мылъкоу агъэкIодыгъэр нахьышIоу учет ашIын алъэ­кIыщт, социальнэ IэпыIэгъу лъэпкъхэр нахьышIоу афагъэцэкIэщтых.
«Мы проектым ипхырыщын, республикэм щыпсэурэ цIыфхэм якартэкIэ фэIо-фашIэхэр афэгъэцэкIэгъэнхэм апае тиIоф­шIэгъухэм технологическэ IэпыIэгъоу ищыкIагъэр ядгъэгъотыным тыфэхьазыр. ГущыIэм пае, ыпэрапшIэу тэ пшъэрылъэу зыфэдгъэуцужьырэр транспорт процессинговэ платформэр къызыфэдгъэфедэзэ, общественнэ транспортым ахъщэ мыIэрылъхьэр зэрэщагъэфе­дэрэм зедгъэушъомбгъуныр ары. Мы охътэ благъэм картэу «Мирыр» къызфэзгъэфедэхэрэр фэгъэкIотэныгъэ зиIэ уасэкIэ транспортым рызекIонхэ алъэ­кIыщт», — къыIуагъ Олег Тишаковым.
Проектэу «Адыгэ Респуб­ли­кэм ис цIыфым икартэ» зыфиIорэмкIэ фэIо-фэшIэ лъэпкъхэу агъэцэкIэщтхэр мы охътэ благъэм агъэнэфэнхэ ямурад.
Ахъщэ мыIэрылъхьэр Адыгеим щызгъэфедэхэрэр нахьыбэ мэхъу. Урысыем и Банк Адыге­имкIэ икъутамэ ипащэу Сергей Самойленкэм къызэриIуагъэмкIэ, мы илъэсым процент 12-кIэ нахьыбэу картэхэр къыдагъэ­кIыгъэх. Ахъщэ мыIэрылъхьэр зыщыгъэфедэгъэ операциехэр процент 30-кIэ нахьыбэу агъэцэкIагъэх.
«Республикэм исхэм картэхэр нахьыбэрэ къызыфагъэфедэ хъугъэ. Джащ фэдэу фэIо-фашIэхэм атефэрэ уасэр пэIудзыгъэ шIыкIэм тетэуи аты. Ащ къыгъэлъагъорэр мылъкум игъэ­федэнкIэ тицIыфхэм шIэныгъэу яIэм нахь зыкъызэриIэтыгъэр ары», — къыIуагъ Сергей Самойленкэм.