ХэушъхьафыкIыгъэ дзэ операцием зипшъэрылъхэр щызыгъэцакIэзэ хэкIодэгъэ дзэкIолIхэм къафагъэшъошэгъэ къэ­ралыгъо тын лъапIэхэр яIахьыл гупсэхэм Мыекъопэ къэлэ администрацием ты­гъуа­сэ щаратыжьыгъэх.
Iофтхьабзэм хэлэжьагъэх Мыекъуапэ имэрэу Геннадий Митрофановыр, ащ игуадзэу, ветеранхэм якъэлэ Совет итхьаматэу Юрий Томчак, Мыекъуапэ идзэ комиссарэу Алексей Санташовыр, зыпсэ зыгъэтIылъыгъэхэм яIахьылхэр.
Урысые Федерацием и Президентэу Владимир Путиным иунашъокIэ лIыхъужъ­ныгъэу ыкIи псэемыблэжьыныгъэу къа­хэфагъэхэм афэшI зидунай зыхъожьыгъэ капитанэу Шъхьаплъэкъо Ричард, младшэ сержантэу Дмитрий Макаровым, рядовойхэу Александр Кузнецовым ыкIи Константин Аминовым ЛIыхъужъныгъэм иорден къафагъэшъошагъ. А тын лъапIэр Геннадий Митрофановым зыпсэ зыгъэтIылъыгъэхэм яIахьылхэм аритыжьыгъ.
Къалэм ипащэ зэрэхигъэунэфыкIыгъэм­кIэ, тидзэкIолIхэм зэрифэшъуашэу я Хэгъэгу къулыкъур фахьыгъ ыкIи ащ ищынэгъончъагъэ апсэ фатыгъ. Джы ахэм яшIэжь егъашIэм тыгухэм зэрары­лъы­щтыр къыхигъэщыгъ.
— ГущыIэ пытэу атыгъэм тетхэу тилIыхъужъхэм я Хэгъэгу къаухъумагъ. Ахэм лIыгъэу ыкIи псэемыблэжьыны­гъэу зэрахьагъэр тщыгъупшэщтэп. ЧIэнэгъэшхо зышIыгъэ Iахьыл-гупсэхэм тэри тадэшъыгъо, — къыIуагъ Геннадий Митрофановым.

ХэушъхьафыкIыгъэ дзэ операцием хэкIодагъэхэм ащыщэу Шъхьаплъэкъо Ричард иунагъуи мы Iофтхьабзэм къе­кIолIагъ. Ащ ипшъашъэу ХьапэкIэ Маринэ гущыIэгъу тыфэхъугъ.
— Сятэу Шъхьаплъэкъо Ричард ыгукIи ыпсэкIи дзэкъулыкъушIэ шъыпкъэу щытыгъ. Чэчэн зэпэуцужьми хэлэжьагъ ыкIи къэралыгъо тын лъапIэу «За отличие в охране общественного порядка» зыфиIорэр къыфагъэшъошагъ. Апшъэрэ дзэ команднэ училищыр къызеухым ыуж илъэситфырэ къулыкъур ыхьыгъ, нэужым хэгъэгу кIоцI IофхэмкIэ къулыкъухэм ахэтэу пенсием окIофэ IэнэтIэ зэфэшъхьафхэр ыгъэцэкIагъэх. ХэушъхьафыкIыгъэ дзэ операциер рагъэжьагъэу зызэхехым, рэхьатэу щысын ылъэкIыгъэп, и Хэгъэгу къыухъумэныр ыпэ ригъэ­шъыгъ ыкIи ар ипшъэрылъэу ылъытагъ. ТиунагъокIэ чIэнэгъэшхо тшIыгъэ, къыфагъэшъошэгъэ тын лъапIэу непэ къытатыжьыгъэм тэркIэ мэхьанэшхо иI. Зэрихьэгъэ лIыхъужъныгъэр хьаулые зэрэмыхъу­гъэм ар ишыхьат, — къыIуагъ Маринэ.
ЛIыгъэ зэрэпхэлъын, уихэгъэгу шIу зэрэплъэгъун фаемкIэ джащ фэдэ цIыфхэр ныбжьыкIэхэм щысэ афэхъущтых.
Iэшъынэ Сусан.
Сурэтхэр: тырихыгъ.