Совет хабзэм ихьатыркIэ адыгэхэм мэхьанэ зиIэ щыIэныгъэ лъэбэкъу дахэхэр ашIыгъэх. Ахэм ащыщ жъоныгъуакIэм и 15-м, 1934-рэ илъэсым тхакIохэм яорганизацие изэхэщэкIо комитет щыIэ зэрэхъугъэр. Ащ тхьаматэу иIагъэр КIэрэщэ Тембот, пшъэ­дэкIыжь зыхьырэ секретарэу агъэнэфэгъагъэр Хьаткъо Ахьмэд. ТешIагъэ щымыIэу ар РСФСР-м итхакIохэм я Союз и Адыгэ къутамэ хъугъэ.
Т. КIэращэмрэ А. Хьаткъомрэ СССР-м итхакIохэм яапэрэ Всесоюзнэ зэфэсэу Москва щыкIуагъэм иIофшIэн хэлэжьагъэх. Анахьэу анаIэ зытетыгъэр зэчый зыхэлъ ныбжьыкIэхэр тхэнымкIэ къыхэгъэщыгъэнхэр ыкIи ятворческэ кIуачIэ гъэпытэгъэнымкIэ адеIэгъэныр.
1936-рэ илъэсым тыгъэгъазэм Адыгеим итхакIохэм ыкIи ашугхэм яапэрэ зэфэс щыIагъ, ащ литературэм иIофыгъо­хэм щатегущыIагъэх. Я 30 – 40-рэ илъэс­хэм организацием исатырхэр тхэкIо ыкIи усэкIо ныбжьыкIэхэм къаушъагъэх, ахэм ащыщыгъэх А. Еутыхыр, Къ. Жанэр, Д. Кэстанэр, Ю. Лъэустэныр.
Хэгъэгу зэошхом илъэхъан адыгэ тхакIохэм ащыщхэр Iашэр аIыгъэу пыим езэуагъэх, дзэ гъэзетхэм якорреспондентэу Iоф ашIагъ, Родинэм пае зыпсэ зытыгъэри макIэп… ТинасыпкIэ, фашизмэм текIуагъэх.
1967-рэ илъэсым РСФСР-м итхакIохэм я Адыгэ къутамэ нэмыкIыцIэ фашIыгъ — РСФСР-м итхакIохэм я Союз и Адыгэ тхэкIо организаций. Аужырэ уахътэм Адыгеим итхакIохэм я Союз хъугъэ. Республикэм итхэкIо организацие лъэпкъ литературэм изэтеуцон иIахьышхо хи­лъ­хьагъ. Ар щыIэ зыхъугъэм къыщегъэ­жьагъэу исатырхэм заушхугъ, прозаик ыкIи усэкIо лIэуж зэфэшъхьафхэр иIэ хъугъэх. Ахэм ятворческэ гъэхъагъэхэм яфэшъошэ уасэ къафашIыгъ. СССР-м и Къэралыгъо шIухьафтын апэрэу Темыр Кавказым итхакIохэмкIэ Т. КIэращэм, СССР-м ыкIи РСФСР-м я Къэралыгъо премиехэр И. МэщбашIэм къафагъэшъо­шагъэх. Бэмэ щытхъуцIэхэу «Урысыем культурэмкIэ изаслуженнэ IофышI» ыкIи «Адыгеим инароднэ тхакIу» зыфиIохэрэр къалэжьыгъ.
Адыгэ Республикэм итхакIохэм я Союз иправление итхьаматэр УФ-м IофшIэнымкIэ и ЛIыхъужъэу, Адыгеим, Къэ­бэртэе-Бэлъкъарым, Къэрэщэе-Черкесым янароднэ тхакIоу, УФ-м ыкIи Адыгэ Республикэм япремиехэм ялауреатэу МэщбэшIэ Исхьакъ.
Адыгеим итхакIохэм ащыщыбэм орденхэр ыкIи медальхэр къафагъэшъошагъэх, ахэр лъэпкъым итхакIох ыкIи иуса­кIох, литературэм ылъэныкъокIэ Къэралыгъо премиер къэзылэжьыгъэх, Адыгеим ыкIи Урысыем культурэмкIэ изаслуженнэ IофышIэх. 2004-рэ илъэсым Адыгэ тхэкIо организацием ыныбжь илъэс 70-рэ зэхъум, республикэм итын анахь лъапIэу «Адыгеим и Щытхъузехь» зыфиIорэ медалыр къыфагъэшъошагъ.
АР-м и Лъэпкъ тхылъеджапIэ краеведениемрэ литературэмрэкIэ иотдел мэфэкI тхылъ къэгъэлъэгъон «Служить своим пером народу» ыIоу къыщагъэхьазырыгъ ыкIи къыщызэIуахыгъ. Ар Адыгеим итхакIохэм я Союз зызэхащагъэр илъэс 90-рэ зэрэхъугъэм фэгъэхьыгъ ыкIи ащ епхыгъэ тарихъыр кIэкIэу нэм къыкIэзгъэуцорэ, мэхьанэ зиIэ хэутыгъэ тхыгъэхэр, тхылъхэр зыщыгъэфедагъэх.
Мамырыкъо Нуриет.