ЖъоныгъуакIэм и 19-м фармацевт IофышIэм и Мафэ Урысыем щыхагъэунэфыкIы. Мы мэфэкIым провизорхэм, фармацевтхэм, технологхэм афэгушIохэ хабзэ. Илъэс 30-м къыкIоцI аптекэу N 1-м Iоф щызышIэрэ Ерэджэбыкъо Фатимэ зыIудгъэкIагъ, иIофшIэн зыфэдэр къедгъэIотагъ.

Фармацевт сэнэхьатым епхыгъэ мэфэкIыр зыфэIорышIэрэр къэралыгъом хэхъоныгъэ ышIынымкIэ ыкIи цIыфхэм япсауныгъэ къызэтегъэнэгъэнымкIэ мыщ фэдэ IофышIэхэм мэхьанэу яIэр къыхэгъэщыгъэныр ары. А сэнэхьатым рылажьэхэрэм яшIуагъэкIэ узыр хэзгъэжъу­кIыщт уцхэр къызIэкIэдгъэхьан зэрэтлъэ­кIырэм имызакъоу, сымаджэм Iэзэгъу фэхъущт гущыIэ дахэу пагъохыхэрэм щыIэныгъабэ къагъэнэн алъэкIы.
— Фатимэ зипэщэ отделыр анахь мэхьанэ зиIэхэм ащыщ. Сэкъатныгъэу яIэмкIэ куп гъэнэфагъэхэм ахэтэу федеральнэ фэгъэкIотэныгъэу къаратыгъэм ыпкъ къикIэу Iэзэгъу уцхэр сымаджэхэм къязытырэ отделыр ары зигугъу къэсшIырэр. Мыщ сымэджабэ къеуалIэ, ахэм шэн зэфэшъхьафыбэ яI. Ау зэ нэмыIэми зы тхьаусыхэ Фатимэ ылъэныкъокIэ зэхэтхыгъэп. Ары пакIошъ, зыгъэпсэфыгъо уахътэм зыIукIыкIэ «сыдигъо къыдэкIыжьыщта?» аIозэ сымаджэхэр къыкIэупчIэх. ЗэкIэми жабзэ ащ къадегъоты, исэнэхьат хэшIыкI фыриI. Игъом Iэзэгъу уцхэр къытIэкIэмыхьагъэхэ зыхъукIэ, ар сымаджэм зэрэгурыбгъэIощтым, ыгу хэмыкIэу IубгъэкIыжьышъуным, уахътэу къызэрежэщтыр зэрэлъыб­гъэIэсыщтым тиIофшIэнкIэ мэхьанэ иIэу щыт. Ерэджыбэкъо Фатимэ дэгъоу ар къыдэхъу. КъытэолIэрэ сымаджэхэр зэкIэри ешIэх, ежьхэми дэгъоу къашIэ, шIу алъэгъу, зыхэт IофышIэ купми шъхьэ­кIафэ къыфашIы. ЗэхэшIыкI, гукIэгъуныгъэ хэлъэу, адыгагъэр зылъытэу щыт, — хигъэунэфыкIыгъ аптекэм ипащэу Беданэкъо Аминэт.
Къыхэзгъэщымэ сшIоигъу, тигущыIэгъу Iоф зыщишIэрэ аптекэ закъор ары рес­публикэмкIэ Iэзэгъу уц зэфэшъхьафхэр зыщашIыхэрэр. Аптекэу N 1-м ипащэ къызэрэтиIуагъэмкIэ, Мыекъуапэ иIэзапIэхэм зэзэгъыныгъэ адыряIэу ящыкIэгъэ препаратхэр, зэхэгъэкIухьагъэхэр, дэгъэ зэфэшъхьафхэр аIэкIагъахьэх. Ахэр анахьэу сабыйхэм акIышъо, акIоцI узэряIэзэщтхэм атегъэпсыхьагъэх. Джащ фэдэу псы укъэбзыгъэхэр къагъэ­хьа­зырых. Мы отделым нэбгыриплIымэ Iоф щашIэ.
Фатимэ фармацевт сэнэхьатыр ежь фаеу къыхихыгъ, ау ащ ушъхьагъу гъэ­нэфагъи фэхъугъ.
— Сянэ-сятэхэм кIэлэегъэджэ институтыр къызаухым, Чэчэным Iоф щашIэнэу кIогъагъэх. Ащ тыщыпсэузэ, сянэ ипшъэ­шъэгъухэм ащыщэу Жаннэ мы сэнэхьатым рылажьэщтыгъ, ащ бэрэ гущыIэгъу сыфэхъущтыгъ. Сэри сыдигъуи халат фыжьым сыгукIэ сыфэщагъэу сехъуапсэщтыгъ. Джаущтэу Пятигорсэ фармацевтическэ институтым сычIэхьанэу тесыубытагъ. Провизорэу апшъэрэ гъэсэныгъэ зэзгъэгъотыгъ. Илъэс 30 хъущт шIэхэу а зы чIыпIэм сыIутэу сызыла­жьэрэр, зы мафи сырыкIэгъожьэу къы­хэкIыгъэп. IофшIэнэу згъэцакIэрэр псынкIэп, ау ар къин къысщыхъурэп, — гушIозэ къеIуатэ Фатимэ.
ТигущыIэгъу къызэрэхигъэщыгъэмкIэ, иIофшIэнкIэ анахьэу ыгъэлъапIэрэр къеолIэрэ сымаджэхэм цыхьэ къызэрэфашIырэр ары. Ахэм ащыщхэр Iэзэгъу уцыр ахьынэу къызэрыкIохэрэм нахьэу, гущыIэ фабэ, ушъый фаехэу къычIэхьэх. Зы мафэм нэбгырэ 50-м къыщегъэжьагъэу 200-м нэсэу къеуалIэхэу къыхэкIы. Бэхэр мэфэныкъом поликлиникэм чэзыум къыщыхэсхэу рецептыр аIыгъэу аптекэм къызычIа­хьэхэкIэ, губжыгъэм хэтхэу гущыIэ дыс­хэр къыраIоу мэхъу.
— Ащ фэдэ чIыпIэхэми тарэфэ, ар щыIэныгъэм изы Iахь. Шъыпкъэ, IофшIэн ужым а зэкIэри сыгукIи, сшъхьэкIи зэсэгъэфэжьых. Ау уисэнэхьат шIу плъэгъоу къыхэпхыгъэ зыхъукIэ, уиIэпыIэгъу цIыфхэм ящыкIагъэу зыкъызэрэпфагъа­зэрэр къыбгурыIомэ, зэкIэри къыпфэпсынкIэщт, — еIо Фатимэ.
Сыд фэдизэу пшъыгъэу цIыфыр Iофы­шIэм къычIэжьыгъэми, иунагъо зихьажьыкIэ гуIэтыпIэ фэхъу, ипшъыгъэ теужьы. Ащ фэдэ пкъэоу Фатимэ иIэр ишъхьэгъусэу Юрэрэ икIалэу Къэплъанрэ. Ерэджэбыкъо Юрэ АР-м ихъарзынэщ Iоф щешIэ, Къэплъан апшъэрэ юридическэ гъэсэныгъэ зэригъэгъотыгъ, ышъхьэ фэлэжьэжьы.
КIэухым къыхэзгъэхъожьымэ сшIоигъу, гуетыныгъэ фыриIэу Iоф зэришIэрэм фэшI Урысыем псауныгъэр къэухъумэгъэнымкIэ иминистрэу Михаил Мурашко и Рэзэныгъэ тхылъ Ерэджыбэкъо Фатимэ къызэрэфагъэшъошагъэр. ТапэкIи игъэ­хъагъэхэм ахахъоу, исэнэхьат гухахъо хигъуатэу джыри илъэсыбэрэ Iоф ышIэнэу фэтэIо. Ежьми иIофшIэгъухэми ясэнэхьат епхыгъэ мэфэкIымкIэ тафэгушIо!
Iэшъынэ Сусан.
Сурэтыр Артур Лутеншлегер.