Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм тегъэпсыхьагъэу республикэ автомобиль гъогоу «Мыекъуапэ – Джаджэ – Псыбай – Зеленчукскэр – Карачаевск» зыфиIорэм къыхиубытэрэ гъогу Iахьищэу километри 5 фэдиз хъурэр агъэцэкIэжьы.

А республикэ гъогур автомобиль гъогу зэхэубытагъэхэм язы Iахьэу щыт. Ащ къикIырэр а гъогум республикэ ыкIи район гупчэхэр зэрэзэрипхыхэрэр ары. Ащ нэмыкIэу етIани районми, респуб­ликэми яэкономикэ ихэхъоныгъэкIи, гъунэгъу шъолъырхэм яхэхъоныгъэкIи мэхьэнэ гъэнэфагъэ иI.
Сомэ миллиони 110-рэ зыпэIухьащт гъэцэкIэжьын Iофхэм афэгъэзагъэр подряднэ организациеу «Шэуджэн ДРСУ-р» ары. Лъэпкъ проектым къыды­хэлъытагъэу мыщ щылажьэхэрэм апэрэп ащ фэдэ IофшIэнхэр федеральнэ шап­хъэхэм атетэу загъэцакIэхэрэр. Подряднэ организацием иI лабораторие гъэнэфагъэ. Асфальтыр зэрэзэхэгъэкIу­хьагъэм, ащ хэлъын фаер зэкIэ икъоу зэрагъэфедагъэм ыкIи нэмыкIхэм алъэп­лъэх.
ЖъоныгъуакIэм иапэрэ мафэхэм а гъогу Iахьхэм япхыгъэ IофшIэнхэр аухыгъэх. Гъогубгъухэр зэрищыкIагъэм тетэу зэтырагъэпсыхьагъэх, тамыгъэу атетын фаехэр агъэуцугъэх, зищыкIэгъэ чIыпIэхэр агъэтхъыгъэх.
Агъэкощырэ эксперт лабораторием ишIуагъэкIэ IофшIэным изаказчикэу ГъэIорышIапIэу «Адыгеяавтодорым» лъэпкъ проектхэм атегъэпсыхьагъэу гъэцэкIэжьын Iофэу зэшIуахыгъэхэм яуплъэкIун ащ лъыпытэу зэхещэ. Стационар лабораторием ушэтын Iофтхьабзэхэр зыщызэрихьэхэрэ нэужыр ары техникэм ылъэныкъокIэ шапхъэхэр икъоу къыдалъытагъэхэмэ нафэ къызы­хъурэр. «Адыгеяавтодорым» гъэцэкIэ­жьын IофшIэнхэмкIэ иотдел ипащэу Дмитрий Бороненкэм къызэриIуагъэмкIэ, асфальтыр иIужъуагъэкIи, хэлъын фаехэмкIи шапхъэхэм адештэ.
Ащ фэдэ лабораторнэ уплъэкIунхэр ищыкIагъэх, сыда пIомэ технологиякIэхэр, амал зэфэшъхьафхэр яIофшIэн къыщызыфагъэфедэнхэмкIэ ахэм яшIуа­гъэ къэкIо.
АгъэцэкIэжьыгъэ гъогу Iахьым изытет иуплъэкIун хэлэжьагъэх Адыгэ Респуб­ликэм псэолъэшIынымкIэ и Министерствэ дэжь щызэхэщэгъэ общественнэ Советым илIыкIохэр.