КъокIыпIэм щыпсэурэ лъэпкъхэм яискус­ст­вэкIэ Къэралыгъо музеим икъутамэ Хэгъэгу зэошхом фэгъэхьыгъэ къэгъэлъэгъонэу «Уахътэмрэ шIэжьымрэ» зыфиIорэр щэкIо.

Къэгъэлъэгъоным Урысыем исурэттеххэм я Союз икъутамэу Адыгэ Республикэм щыIэр, Мыекъуапэ икъэлэ сурэттех клубэу «Лэгъонакъэ» зыфиIорэр ащ кIэщакIо фэхъугъэх.
Зэхахьэр къызэIуихыгъ АР-м культурэмкIэ иминистрэ игуа­дзэу Кушъу Светланэ.
— Непэрэ къэгъэлъэгъоныр тищыIэныгъэ къытфэзыухъумэгъэ дзэкIолIхэм шъхьащэ афэт­шIыным тыфэзыщэрэ Iофтхьабз. ЩыIэныгъэм, шIэжьым къапкъырыкIырэ сурэтхэр непэ тинэрылъэгъух. АщкIэ тхьа­шъуегъэпсэу ясIомэ сшIоигъу Урысыем исурэттеххэм я Союз икъутамэу Адыгэ Республикэм щыIэм, Мыекъуапэ икъэлэ сурэттех клубэу «Лэгъонакъэ». Сурэтхэр заом хэлэжьагъэхэм къатегущыIэх. Iашэм имызакъоу, Iэмэ-псымэу дзэкIолIхэм агъэфедэщтыгъэхэр къагъэлъагъо. Адыгеим ичIыопс идэхагъэ сурэтхэмкIэ къэзыIуатэхэрэм Хэгъэгу зэошхом итарихъ ухащэ. ТекIоныгъэм игушIуагъо зынэгу къыкIэщырэ цIыфхэр тапашъхьэ къырагъэуцо. Пыйхэр тичIыгу къызытебанэхэм лъыр щагъэ­чъагъ, заом цIыф пчъагъэ хэ­кIодагъ. ЛIыхъужъныгъэ зезы­хьэгъэ тидзэкIолIхэм мамыр щы­IакIэр къытфаухъумагъ, — къыIуагъ Кушъу Светланэ.

ТекIоныгъэм фэгъэхьыгъэ къэгъэлъэгъоным сурэттех 23-мэ яIофшIэгъэ 70-рэ щызэхэугъоягъ.
Адыгэ Республикэм исурэттеххэм яклуб ипащэу, АР-м культурэмкIэ изаслуженнэ IофышIэу Аркадий Кирнос къы­Iуагъ мы сурэтхэр тарихъым къызэрэхэнэжьыщтхэр.
Адыгеим изаслуженнэ сурэтышIэу Еутых Саидэ иIофшIагъэу «ТекIоныгъэм фэгъэхьыгъ» зыфиIорэр лIыжъ хэкIотагъэу, къин зыпэкIэкIыгъэм фэгъэ­хьыгъ. Заом ихьазаб искусствэм ыбзэкIэ сурэтышIым къегъэлъагъо.
Музеим ипащэу ШъэуапцIэкъо Аминэт сурэттеххэр зэошхом фэгъэхьыгъэ IофшIэнхэм чанэу зэрадэлажьэрэр хигъэунэфыкIыгъ. Тарихъым лъапсэу иIэр тщыгъупшэ зэрэмыхъущтым къытегущыIагъ, зэгъэпшэнхэр ышIыгъэх. ЗэхэщакIохэм пшъэрылъ шъхьаIэу яIэр хэгъэгум иухъумакIохэм ямэхьанэ къэIэтыгъэныр ары. ШIэжь яIэу ныбжьыкIэхэр пIугъэнхэр пшъэрылъ шъхьаIэу зэрэщытыр къыдалъытагъ, ащ епхыгъэу зэхэщакIохэм къэгъэ­лъэгъоныр агъэпсыгъ.
— ЩыIэныгъэр гушIуагъорэ гукъаорэкIэ зэхэт. Тикъэралыгъо зэошхом ТекIоныгъэр къызэрэщыдихыгъэр гушIогъошху. Хьазаб мэшIошхом хэкIодэгъэ лIыхъужъхэм къытфашIагъэр тщыгъупшэ хъущтэп. Заом тыфаеп, мамыр щыIакIэ терэI, — къыIуагъ Адыгэ Хасэм хэ­тэу МэщфэшIу Нэдждэт.
Iофтхьабзэм нэбгырабэ къе­кIолIагъ, анахь гушIуагъор ахэм ныбжьыкIабэ зэрахэтыр ары.
Къэгъэлъэгъоныр мэкъуогъум и 17-м нэс Мыекъуапэ щызэ­Iухыгъэщт.
Лъэпшъыкъо Фатим.