Щынджые гурыт еджапIэу N 24-м икIэлэеджакIоу Талъэкъо Дамир ТекIоныгъэм и Мафэ ипэгъокIэу чылэм щыщ Хьарэхъу зэшитфэу Хэгъэгу зэошхом хэкIодагъэхэу саугъэт зыфагъэуцугъэхэм афэгъэ­хьыгъэу къытхыгъэр къыхэтэуты.

Заор! Сыдэу гущыIэ мэхъа­джа! Къызэпигъэджагъ ащ ти­чIыгуи, тиогуи, тикъали, тикъуа­джи! Пый мэхъаджэр тихэгъэгу къибэнагъ. КIочIэ пытэу ащ пэуцужьыгъэх зэкIэ тицIыфхэр. Къиныгъ, къин дэдагъ а зэо мэхъаджэр къезыгъэжьагъэм ыпсэ Iухыгъэныр. Зао! Къэсыгъ ар адыгэ къуаджэм. Ныхэм нэпсыр къячъэхы, ятэхэм, якIа­лэхэм, яIахьылхэм — зэкIэ хэ­гъэгум ицIыфхэм агу зыгъэ­бэгыгъэ хьазабэу къафыкъо­кIыгъэм имэкъэгъэIугъэх ахэр. Хъулъфыгъэу зыныбжьыкIэ заом Iухьанхэ къызтефэхэрэм, а гу­щыIэ тхьамыкIагъом агучIэ ыгъэсысыгъэми, къызхагъэщыгъэп. «ЧIыгур къэмыщтэу укъэ­мыщт, сикIал!» зыIогъэ ным игущыIэхэр быракъ афэхъугъ! Заом ианахь мэшIо лыгъэ зэридзагъэмэ ащыщ Хьарэхъухэм яунагъо. Хьэрэхъо Долэрэ Чэ­бэхъанрэ унэгъо зэкIужь дахэ яIагъ. ЯкIэлитф зым нахьи зыр нахь IорышIэу псэущтыгъэх. Зэ­шитфыри зэуж итхэу заом кIуагъэх. Джа мафэм къыще­гъэжьагъэу Чэбэхъан гъолъы­жьын хъумэ, пIэкIорым ошэкурыр тырихыти, пхъэм тегъуалъхьэщтыгъ. Аущтэу ышIымэ икIа­лэмэ нахь апэблагъэ хъугъэу ылъытэщтыгъэ. Чэщ мы­чъыябэ къекIугъ Чэбэхъан. ГукIэ икIалэхэр зэпикIухьэщтыгъэ чэщ реным. Сыд фэдиз нэпс ригъэ­хыгъэр?! «Заом пая шъузыкIэс­пIугъэр, сикIэлэ дышъэх!» — джащ фэдэу ягупшысэщтыгъ. Ным ыгукIэ ышIэщтыгъ икIалэмэ къарыкIорэр. Зым ыуж зыр итэу Хьэрахъомэ къэбар гомыIухэр къафахьыгъ, якIэлитф я Хэ­гъэгу къаухъумэзэ фэхыгъэх. Чэбэ­хъанэ лIыхъужъитф къылъфынэу, ыпIунэу насып зеIэм, иIэжьыгъэп ащыщ IукIэжьынэу, ащыщ ихьэдашъхьи теплъэжьынэу. Ащ нахь тхьамыкIагъо мэхъужьа? Гоу зэгоутыгъэм фэщэчыжьа? Зы ныкIэ къин бащ, зы унэгъо IахькIэ — лыящ!
О цIыфыгур! Сыдэу адэ
ЩэIэгъэшхо о уиI!
ТхьамыкIагъоу, игъоджэшхоу
О пфэщэчырэр къэпчъыгъуай.
УгъучIыгъэмэ о устыни,
Умыжъуагъэмэ, утэкъони…
ГухэкI нахь мышIэми, а зэо мэхъаджэм къелыжьыгъэхэм япчъагъэ нахь макIэ мэхъу зэпыт, ахэм зэкIэми ягугъу тшIыныр тэ, псаухэм, къыттефэ. Мы чIыгум щыпсэухэрэм шъуа­щыгъупшэщтэп! Ветеранэу непэ къытхэтхэм псауныгъэ пытэ шъуиIэнэу, шъуигъашIэ кIыхьэ хъунэу сышъуфэлъаIо!