Уахътэм диштэрэ IофыгъошIу
«Движение Первых» зыфиIорэ организацием 2024-рэ илъэсым зэхищэгъэ зэнэкъокъум иятIонэрэ едзыгъо Адыгеим ыцIэкIэ хэлэжьагъэхэм ащыщэу социальнэ-культурнэ Iофтхьабзэхэм якIэщакIоу «Агентствэу «Талантидэм» текIоныгъэр къыдихыгъ.
«Окно в культуру» зыфиIорэ проектэу къыгъэлъэгъуагъэр зэнэкъокъум щыпхырыкIыгъ ыкIи «Талантидэм» ар джы ыгъэцэкIэщт. ЗэкIэмкIи Урысыем ишъолъыр 88-мэ къагъэхьыгъэ проект мини 6 фэдиз зэнэкъокъум хэлэжьагъ. ПхырыкIыгъэ проектым иапэрэ едзыгъоу «Моя семья — Россия» зыцIэр республикэм игурыт еджапIэхэм ащызэхащэщт.
Муниципальнэ гъэIорышIапIэхэм ащыхахыгъэ гурыт еджэпIи 9-мэ яунэ дэпкъхэм сурэтышI IэпэIасэхэмрэ еджэкIо- волонтерхэмрэ зэгъусэхэу, унагъом и Илъэсэу Урысыем щыкIорэм диштэу, сурэтхэр атырашIыхьащтых. Хэгъэгу зэошхом хэлэжьэгъэ лIыхъужъхэмрэ «Движение Первых» икъутамэу республикэм щызэхэщагъэм хэтхэмрэ яунагъохэм ахэр афэгъэхьыгъэщтых. ЛIыхъужъхэм ыкIи унагъохэм шъхьэкIафэ зэрафашIырэм ахэр инэпэеплъ хъущтых. КIэлэцIыкIухэр ыкIи ныбжьыкIэхэр Хэгъэгум итарихъ ыкIи икультурэ зэгъэшIэгъэным кIигъэгушIущтых, къыткIэхъухьэрэ лIэужхэм ягушъхьэбаиныгъэ къыIэтыщт.
Проектым ишIуагъэкIэ шъолъырым иеджэпIи 9-мэ творческэ Iофтхьэбзэ гъэшIэгъонхэр ащыкIощтых. Ащ цIыф къызэрыкIохэр хэщагъэ хъущтых. Сурэтхэм яхудожественнэ марафонэу «Моя семья — Россия» зыфиIорэм хэлэжьэнхэ алъэкIыщт. Унагъом фэгъэхьыгъэ тематическэ къэгъэлъэгъоным кIэлэцIыкIу IофшIагъэхэр хагъэлэжьэщтых.
Iофтхьабзэм кIэлэеджэкIо 400-м ехъу хэщагъэ хъущт. А пчъагъэм щыщэу нэбгырэ 225-р волонтерыщтых. Мыекъопэ районым гъэсэныгъэмкIэ игупчэу N 3-р, Советскэ Союзым и ЛIыхъужъэу Къош Алый ыцIэ зыхьырэ Блащэпсынэ гурыт еджапIэу N 5-р, Мыекъопэ гурыт еджапIэу N 6-р, Адыгэкъалэ игурыт еджапIэу N 1-р, Пэнэжьыкъое гурыт еджапIэу N 1-р, Красногвардескэ гурыт еджапIэу N 11-р, псэупIэу Заревэм дэт гурыт еджапIэу N 5-р, Урысыем и ЛIыхъужъэу Мэзыхьэ Владимир ыцIэ зыхьырэ Тэхъутэмыкъое гурыт еджапIэу N 1-р, А.Сапруновым ыцIэ зыхьырэ Джэджэ гурыт еджапIэу N 1-р проектым хэлэжьэщтых. ЖъоныгъуакIэм и 15-м сурэтышIхэм ямарафон аублэщт, а 1 — 4-рэ классхэм якIэлэеджакIохэм ясурэтхэр ащ къыщагъэлъэгъощтых.
Проектым изэхэщакIоу, «Социальнэ-культурнэ Iофтхьабзэхэм язэхэщэнкIэ Автономнэ мысатыушI «Агентствэу «Талантидэм» ипащэу Карен Каракьян къызэриIорэмкIэ, «шIэныгъэм ичылысхэр» зычIэт унэхэм ядэпкъхэр проектым ишIуагъэкIэ гъэкIэрэкIагъэ хъущтых. Урысыем ишэн-хабзэхэр, икультурэ зэрагъэлъапIэхэрэм ахэр яшыхьат хъущтых.
Тэу Замир.