Урысые Федерацием и Къэралыгъо Думэ Адыгеим ыцIэкIэ иде­путатэу Владислав Резник къызыхъугъэр непэ илъэс 70-рэ мэхъу.

Хэбзэгъэуцум республикэм щыпсэ­ухэрэм ацIэкIэ апэ фэгушIуагъэхэм ащыщ Адыгеим и ЛIышъхьэу КъумпIыл Мурат. Къэралыгъо Думэм тишъолъыр ятIонэрэ зэIугъэкIэгъу хъугъэу къыщызы­гъэлъэгъорэ депутатым цIыфхэм яцыхьэ къызэрилэ­жьыгъэр ыкIи республикэмрэ къэралы­гъомрэ апашъхьэкIэ зэшIуихыгъэ IофышIу­хэм ар къакIэкIуагъэу зэрэщытыр тишъо­лъыр ипащэ игущыIэхэм къащы­хигъэщыгъ.
Владислав Резник жъоныгъуакIэм и 17-м, 1954-рэ илъэсым къалэу Ленинград къыщыхъугъ.
1976-рэ илъэсым Ленинград къэралыгъо университетым ибиолого-чIышъхьэ факультет ащ къыухыгъ, микроорганизмэхэмкIэ биолог-генетик сэнэхьатыр ыIэ къыригъэхьагъ. БиологиемкIэ институтэу Москва дэтым иаспирантурэ ыужкIэ къыухыгъ.
Владислав Резник Къэралыгъо Думэм идепутат зыхъугъэр 1999-рэ илъэсыр ары, хэбзэгъэуцу анахь чанхэм, зэшIокIы­шхо зиIэхэм, урысые парламентым хэтхэу илъэсыбэ хъугъэу цыхьэшхо зыфашIыхэрэм ащыщ.
Къэралыгъо ДумэмкIэ хэдзынэу 2016-рэ илъэсым щыIагъэр ары Владислав Резник Адыгеим ыцIэкIэ депутатэу апэрэу зыщыхадзыгъэр ыкIи иIофшIакIэкIэ къыгъэшъыпкъэжьыгъ цыхьэу фашIыгъэр.
Адыгеим ипащэхэмрэ хэбзэгъэуцумрэ, партиеу «Единэ Россиер» ягъусэу Iофэу зэдашIэрэм ишIуагъэкIэ федеральнэ мылъкушхо республикэм къыIукIагъ ыкIи гурыт еджэпIакIэхэр, кIэлэцIыкIу Iыгъы­пIэхэр, IэзапIэхэр, сымэджэщхэр, гъогу­хэр, культурэмрэ спортымрэ япсэуалъэхэр, укъэбзалъэхэр, псыр аIэкIэзыгъэхьэрэ Iэмэ-псымэхэр ыкIи социальнэ мэхьанэ зиIэ нэмыкI псэолъабэ зэрэщагъэпсыгъэхэр пстэуми янэрылъэгъу.
Псауныгъэм икъэухъумэн иIофыгъохэри анаIэ анахьэу зытетхэм ащыщых. Пан­демием илъэхъан Владислав Резник ежь ышъхьэкIи ишIуагъэ къызэригъэкIуагъэр Адыгеим и ЛIышъхьэ къыIуагъ. Ащ нэмы­кIэу диагностическэ гупчэм, фельдшер-мамыку IэзапIэхэм яшIын тегъэпсыхьэгъэ федеральнэ мылъкум икъещэлIэнкIи IэпыIэгъушхо зэрэхъугъэр къыхигъэщыгъ.

АР-м и Къэралыгъо Совет — Хасэм и Тхьаматэу Владимир Нарожнэм Владислав Резник иIофшIэкIэ амал пэрытхэр къыпчъыхэзэ, республикэм къыфэфедэу зэшIуихыгъэ Iофыгъохэм ягугъу къышIыгъ:
«Къэралыгъо хабзэм илъэныкъо зэ­фэшъхьафхэм уазэрэдэлэжьэщтым ишIы­кIэ-амалхэм ащыгъуазэу Адыгеир УФ-м и Къэ­ралыгъо Думэ Владислав Резник къыщегъэлъагъо ыкIи шъолъырым ихахъо фэлажьэ. ГущыIэм пае, ащ иIэ­пыIэгъукIэ Ермэлхьаблэ къикIэу Мые­къуапэ укъе­зыщэлIэрэ гъогур аужырэ шапхъэхэм адиштэу ашIыгъ, «Бжъэ­дыгъухьабл — Ады­гэкъал» зыфиIорэ гъогур федеральнэ мэхьанэ иIэу хъугъэ, Мыекъопэ районым псыкъэкIуапIэу пхы­ры­кIырэм игъэцэкIэжьын ща­ухыгъ. Джащ фэдэу Къэралыгъо Думэм бюд­жетымкIэ ыкIи хьакъулахьхэмкIэ и Комитет зэрэхэтым ишIуагъэкIэ Адыгеим фэгъэкIотэныгъэхэр иIэнхэм Владислав Резник мыпшъыжьэу дэлажьэ. Лъэпкъ проектхэр ыкIи къэралыгъо программэхэр Адыгеим гъэцэкIагъэ щыхъунхэм пае ищыкIэгъэ мылъку къэкIуапIэхэр шъо­лъырым ыгъотыным ынаIэ тет. Ащ дакIоу цIыфхэм заIуегъакIэ, АР-м и Къэралыгъо Совет — Хасэм изэхэсыгъохэм ахэлажьэ, зэшIуихыгъэм хэдзакIохэм ыкIи хэбзэ­гъэуцухэм апашъхьэ зэфэхьысыжьхэр фешIых, ти Парламент Iофтхьабзэу кIэщакIо зыфэхъухэрэм Къэралыгъо Думэм щыдырагъэштэным ишъыпкъэу Iоф дешIэ.
АР-м ихэбзэгъэуцухэм, ихэдзакIохэм ацIэкIэ ыкIи сэ сшъхьэкIэ непэ Владислав Резник ыныбжь илъэс 70-рэ зэрэхъурэмкIэ сыфэгушIо! Псауныгъэ пытэм, гуфэбэны­гъэм ащымыкIэу, Адыгэ Республикэм ыкIи Урысые Федерацием яхахъо илъэ­сыбэрэ джыри фэлэжьэнэу фэсэIо!»
«Владислав Резник зиIорэ зишIэрэ зэтефэрэ, гущыIэу ытырэр зыгъэцэ­кIэ­жьырэ цIыфэу зыкъигъэлъэгъуагъ. Хэти фэмыдэу депутатыр цIыф къызэрыкIохэм апэблагъ — республикэм исхэм бэрэ аIокIэ, яIофыгъохэм защегъэгъуазэ, ахэм язэшIохынкIэ IэпыIэгъу афэхъу. Республи­кэми, ащ исхэми ягумэкIхэр къылъэIэсых. Депутатэу хадзыгъэ къодыеу 2016-рэ илъэсым Владислав Резник гущыIэу къыIогъагъэхэр джыри сыгу къэкIыжьых: «Гъэхъэгъэшхо, хэхъоныгъэ ин зышIыгъэ, цIыф насыпышIохэр зыщыпсэурэ шъо­лъырэу Адыгеир сэлъэгъу. Ау ащ паекIэ тызышъхьамысыжьэу Iоф тшIэн фае». Джащ къыщегъэжьагъэуи ишъыпкъэу Iоф ешIэ, тиреспубликэ лъэгэпIакIэхэм якIу­нымкIэ фэлъэкIыщтыр зэкIэ егъэцакIэ. Тихэгъэгу иэкономикэ зэхъокIыныгъэхэр фэшIыгъэн, гъэсэныгъэм, наукэм, меди­цинэм нахьыбэу мылъку ахэлъхьэгъэн фаеу Владислав Резник зэрилъытэрэмкIэ сэри десэгъаштэ. Илъэс зэкIэлъыкIохэм ащ Iофэу ышIагъэр зызэфэпхьысыжькIэ нафэ къэхъу игухэлъхэр щыIэныгъэм зэрэщыпхырищыхэрэр, республикэм исоциальнэ-экономикэ хэхъоныгъэкIэ Iофыгъохэр зэрэзэшIуихыхэрэр», — къытфиIотагъ Урысыем IофшIэнымкIэ и ЛIыхъужъэу, Адыгеим, КъБР-м, КъЩР-м янароднэ тхакIоу МэщбэшIэ Исхьакъ.
Владислав Резник зэхэсыгъохэм ащыщ мырэущтэу къыщиIогъагъ: «Республикэм псынкIэу хэхъоныгъэ зэришIырэр плъэ­гъункIэ гушIуагъо. Псауныгъэм икъэу­хъумэни, гъэсэныгъэми, социальнэ лъэ­ныкъоми ар афэгъэхьыгъ. Мы Iофы­гъохэмкIэ хэгъэгум ипащэхэри IэпыIэ­гъушIу къафэхъух. Къэралыгъо Думэм идепутатэу сызэрэщытым епхыгъэу рес­публикэм игъэцэкIэкIо хэбзэ къулы­къухэм япащэхэм сырягъусэу амалэу щыIэхэр нахь шIогъабэ къатэу згъэфе­дэнхэр сипшъэрылъ. Адыгеим ифедэхэр тапэкIи федеральнэ гупчэм къыщы­сыухъумэщтых, республикэр кIэщакIо зыфэхъурэ Iофтхьабзэхэм япхырыщынкIэ IэпыIэгъу сафэхъущт».
Аужырэ уахътэр пштэмэ, зэшIохыгъэ хъугъэхэм ащыщ АР-м и Лъэпкъ музей игъэкIэжьын. Шэпхъэ лъагэхэм адиштэу гъэлъэгъуапIэхэр зэIухыгъэх, гъэтIылъы­пIэхэр нахь хъоо-пщаух. ХьакIэщэу къыдэуцуагъэхэм республикэ Iофтхьэбзэ зэфэшъхьафыбэ ащызэхащэ, зекIохэмкIэ лъэгъупхъэ. Мы зэпстэури къыкIэкIуагъ Адыгеим ипащэхэмрэ хэбзэгъэуцумрэ язэдэлэжьэныгъэ.
«Адыгэ Республикэм и ЛIышъхьэу КъумпIыл Муратрэ Владислав Резникрэ аIэ зэкIэдзагъэу Адыгеим ифедэхэм зэрафэлажьэхэрэр зыслъэгъукIэ сэгушIо. Непэ Адыгеим амалышхохэр зэриIэхэм фэдэу ыпэкIэ зыкIи слъэгъугъэп. Сихэку гупсэ зызэриштэрэр зыслъэгъукIэ, ащкIэ зишIуагъэ къэзыгъэкIогъэ цIыфым сызэ­рэфэразэм нахь хэхъо. Тиреспубликэ Владислав Резник ищыкIэгъэ дэдэу зэрэщытым сицыхьэ телъ. Адыгеим ипащэхэм къырахьыжьэрэ Iофтхьэбзэшхо пстэумкIи адырегъаштэ. Ахэр зэрэзэ­гъусэхэм къыхэкIэу сыд фэдэрэ пшъэ­рылъхэм язэшIохыни афэукIочIы», — къыхигъэщыгъ МэщбэшIэ Исхьакъ.

ШIагъэм джыри бэ хагъэхъон агу зэрэхэлъыр КъумпIыл Мурат къыIуагъ. Владислав Резник ренэу республикэ пащэхэм зэпхыныгъэ адыриI, гумэкIы­гъуабэмэ язэшIохын къыхэлажьэ. Мыщ дэжьым анахьэу къыхигъэщыгъэр цIыф къызэрыкIохэм якъиныгъохэм зэрапэмы­чыжьэр ары.
«ЦIыфхэм цыхьэ зэрэфашIырэр къы­гъэлъэгъуагъ хэдзынхэм ялъэхъан ыкIи ахэр къыфэразэх IэпыIэгъу зэрари­гъэгъотырэм пае», — къыIуагъ КъумпIыл Мурат.
Республикэм иапшъэрэ тынэу «Ады­геим и Щытхъузехь» зыфиIорэр Владислав Резник фэгъэшъошэгъэным фытегъэ­псыхьэгъэ унашъом Адыгеим и ЛIышъхьэ кIэтхагъ.
«Псауныгъэ, щыIэкIэшIу иIэнхэу, Iофэу ышIэрэм хигъэхъонэу сыфэлъаIо! Сицыхьэ телъ тизэдэлэжьэныгъэ ишIуагъэкIэ дгъэнэфэрэ пстэури къызэрэддэхъущтым», — къыщеIо КъумпIыл Мурат Владислав Резник фигъэхьыгъэ шIуфэсым.

Зыгъэхьазырыгъэр
МэщлIэкъо Саид.