Нэтыхъуае итарихъ, ащ щыпсэурэ цIыф пэрытхэм ащыщхэм тапэкIэ къэстхыгъэгъэ статьям сакъыщытегущыIэгъагъ, ау гъэзет нэкIубгъом зэкIэ ибгъэфэныр зэрэкъиным къыхэкIэу, тицIыф шIагъохэм джыри ягугъу къэсшIы сшIоигъу.

Ахэм ащыщых кIэлэегъа­джэхэр. Хъалыщхэр пштэхэмэ, кIэлэегъэджэ унагъоу щытых: Хъалыщ МулиIэт Налщык дэт университетыр къыухыгъ, хьисапыр илъэс 40-м ехъугъэу еджапIэм щарегъэхьы. Анахь кIэлэегъэджэ дэгъоу респуб­ликэм зыцIэ щыраIорэмэ ащыщ. Илъэс 20-м ехъурэ Отрадненскэ гурыт еджапIэм ипащэу Iоф ышIагъ. Убзылъфыгъэу ащ фэдэ IэнатIэр зепхьаныр къиныгъэ, ау иIофшIэн дэгъоу ыгъэцэкIагъ. Ышнахьыжъэу Хъалыщ Нурбыйи пащэу Iоф ышIэщтыгъ. Ащи хэбзэ гъэшIэгъон хэлъыгъ: еджакIохэу техникумхэм, институтхэм ачIэхьащтхэр ежь ышъхьэкIэ къалэм ыщэщтыгъэх ыкIи ушэтынхэм ятын аухыфэ ар къадэтыщтыгъ. Ар къэзыухыгъэ кIалэхэм IэнатIэхэр яIэхэу Iоф ашIэ. Нурбый цIыф гукIэгъугъ. Зыгорэм фишIэрэм гухахъо хигъуатэщтыгъ. Гъэхъагъэу мы­хэм яIэр бэ, рагъэджагъэхэм IэнатIэхэр агъотыгъэх, ежьхэр щытхъу тхылъхэмкIэ ыкIи бгъэ­халъхьэхэмкIэ къыхагъэ­щыгъэх.
Хъалыщ (Болэт) Маринэ кIэлэегъэджэ унагъом щыщ. Апэрэ классым исхэр регъа­джэх. Ежь езыгъэджэгъэ кIэлэ­егъаджэхэм аготэу Iоф ешIэ.
ЛIыхэсэ (Хьалыщ) Светланэ пчэдыжь къэс къуаджэм ща­лъэгъу, гуIэзэ еджапIэм макIо. А зы кIэлэегъаджэр ары Нэтыхъое ублэпIэ еджапIэм щылажьэрэр, классищ кIэлэ­еджэкIо 16 зэкIэмкIи хъухэу регъаджэх. Методикэ хэхыгъэ къыугупшысыгъэу ар илъэс
20-м ехъугъэу джарэущтэу мэлажьэ.
АР-м гъэсэныгъэмрэ шIэныгъэмрэкIэ и Министерствэ и Щытхъу тхылъ пчъагъэ ащ къы­фагъэшъошагъ. Светланэ общественнэ IофшIэнхэр дэгъу дэдэу зэрехьэх. Саугъэтэу чылэм дэ­тыр кIэлэеджакIохэр игъусэхэу егъэкIэракIэ, хэдзынхэр рагъэкIокIыхэ хъумэ, ащ изэхэщэн Iофхэм чанэу ахэлажьэ.
Мэджэс Руслъан биологие шIэныгъэмкIэ кандидат, Налщык дэт университетыр къыухыгъ. КIэлэегъэджэ дэгъоу зыцIэ ра­Iорэмэ ащыщ. Руслъан сабыиплI епIу.
Ацумыжъ (ЛIышэ) МулиIэт ублэпIэ еджапIэм классищ зэ­хэсэу бэрэ щыригъэджагъэх. Отраднэ гурыт еджапIэм джырэ уахътэм адыгабзэр щарегъэхьы. Поселкэу Iоф зыщишIэрэм лъэпкъ зэфэшъхьафмэ ащыщ кIэлэеджакIохэр адыгабзэкIэ къыщегъэгущыIэх. Адыгэ шэн-­хабзэхэм афэгъэхьыгъэ пчы­хьэзэхахьэхэр кIэлэеджакIохэм арегъэшIы. Олимпиадэхэм, зэ­нэкъокъухэм ахэр ахегъэла­жьэх. КIалэхэр зэрэригъа­джэ­хэрэ методикэу зэхигъэуцуагъэм игугъу шIукIэ республикэм щашIыгъ, кIэлэегъаджэхэм язэ­нэкъокъуи апэрэ чIыпIэр къыщихьыгъ, УФ-м иIофышIэ гъэсэныгъэмкIэ гъэшIуагъ.
Блэгъожъ (Хьагуп) Ларисэ кIэлэегъаджэу Iоф зишIэрэр илъэс 25-м ехъугъ. КIэлэеджа­кIохэри, ны-тыхэри ащ лъэшэу къыфэразэх. Джырэ мафэхэм егъэджэн IофымкIэ пащэм игуа­дзэу мэлажьэ.
КIэлэегъаджэу езыгъэджагъэ­хэм агоуцожьыгъэхэу Iоф зы­шIэрэмэ ащыщых Хьатх Ма­рианнэ, Чэлэбый Казбек, Гъу­кIэлI Къэплъан, Алые Тамилэ.
Хьахъурэтэ (Ацумыжъ) Зурет Мыекъуапэ дэт кIэлэегъэ­джэ училищыр (колледжыр) къызиухыгъэм къыщегъэжьа­гъэу кIэлэпIоу кIэлэцIыкIу Iыгъы­пIэм щэлажьэ. ИIофшIэн шIу елъэгъу. Зэнэкъокъоу «КIэлэпIум и Илъэс» зыфиIорэм хэлажьи, ятIонэрэ чIыпIэр къыдихыгъ. КIэлэцIыкIухэр, ны-тыхэр Зурет лъэшэу къыфэразэх. КIэлэцIыкIухэр зэрэригъэджэщтхэм екIолIэкIэ зэфэшъхьафхэр къыфегъоты. Ахэм шIулъэгъуныгъэу афыриIэр гъу­нэнчъ. Щытхъу тхылъыбэ Зурет къыфагъэшъошагъ.
Культурэм
иIофышIэхэр
Ахэм ащыщ Ацумыжъ Мысырхъан культурэм и Унэ ипа­щэу илъэс 47-рэ хъугъэу Iоф ешIэ. Бек (ШэхэлI) Саиди ащ илъэс 30-м къехъугъэу щэлажьэ. Чэлэбый (Нэгъой) Гощнагъо илъэс 20 хъугъэ ащ зы­щылажьэрэр. Вокалистэу, клубым иIофышIэу Хьатитэ (Мэзэгъ) Разиет, тхылъеджапIэм иIофышIэхэу Хьахъурэтэ (Жанэ) Загрэтрэ (илъэс 30-м къе­хъугъэу Iоф ешIэ) Хэшх (Гунай) Сусаннэрэ яIоф чанэу агъэцакIэ. Мыхэр Iофтхьэбзэ зэ­фэшъхьафэу районым, респуб­ликэм ащыкIохэрэм ахэлажьэх. КIэлэцIыкIоу агъасэхэрэм зэ­нэкъокъухэм апэрэ чIыпIэхэр къащахьых. Чылэм щызэхащэрэ зэхахьэмэ язэхэщакIох.
Медицинэм
иIофышIэхэр
Участковэ врач-терапевтэу Хьахъурэтэ (Хьагуп) Симэ, фельдшерэу Болэт (Кобл) ­Саидэ, Чэлэбый (Ацумыжъ) Заремэ цIыфхэр агъэразэх. Мыхэм IэпыIэгъушхо афэхъух тимедсестра ныбжьыкIэхэр. Ахэр: Хьахъурэтэ Саид, Хьагъур Оксан, Цушъхьэ Замир, Чэлэбый Рим Руслъанэ ыпхъур, Чэлэбый Рим Ас­лъанэ ыпхъур, Бек Бэл. Фармацевтхэу Хьахъурэтэ Нэфсэт, Хьахъурэтэ Рим.
ТиухъумакIохэм щытхъур
адэжь
Нэтыхъуае щыщ нэбгыриплI ухъумэкIо органхэм ащыла­жьэ­хэу къыхэзгъэщыхэ сшIоигъу.
Цушъхьэ Рустам Мыекъопэ къэралыгъо технологическэ уни­верситетыр къыухыгъ, Яблоновскэм икоммунальнэ хъызмэт инженер шъхьаIэу щылэжьагъ. Нэужым юридическэ гъэсэны-
гъэ зэригъэгъотыжьи, МВД-м къулыкъу щихьынэу, уголовнэ лъыхъоным иоперуполномоченнэу IофшIэныр ригъэжьагъ.
Къулыкъу зыдихьырэмэ ягъу­сэу Чэчэн Республикэми мэзи­хырэ къэтыгъ.
Бгъэхэлъхьэ зэфэшъхьаф­хэм­кIэ Рустам Урысыем щыха­гъэунэфыкIыгъ, 2020-рэ илъэсым Адыгэ Республикэм и МВД уголовнэ лъыхъонымкIэ анахь къулыкъушIэ дэгъоу къыхигъэщыгъ.
Джырэ уахътэм Рустам МВД-м Тэхъутэмыкъое районымкIэ иотдел уголовнэ лъы­хъонымкIэ иоперуполномоченнэ шъхьаI, полицием имайор.
Унэгъо Iужъоу, сабыи 10 зэ­рысыгъэм щапIущтыгъ Хъурымэ Тимур. Дзэм къулыкъур зыщехьым ыуж Адыгэ къэра­лыгъо кIэлэегъэджэ институтым ихимико-биологическэ факультет къыухыгъ. КIэлэегъаджэу Iоф­шIэныр римыгъажьэзэ, ухъумэкIо къулыкъум ар рагъэблэ­гъагъ. Джырэ уахътэм зыныбжь имыкъугъэмэ Iоф адэзышIэрэ от­делым щэлажьэ. Къэралыгъо ыкIи къулыкъу бгъэхалъхьэхэр иIэх.
Чэлэбый Аслъан Ярославскэ хэкум и МВД идзэхэм къулыкъур ащихьыгъ. Къызегъэзэ­жьым, Аслъан ухъумэкIо органхэм ахэхьагъ, Чэчэн Респуб­ликэм, джащ фэдэу Владикавказ ащыIагъ, зэо зэпэуцужьхэм ахэлэжьагъ.
Милицием иотличник, медальхэу «За отличие в службе III степени», «За службу на Кавказе», «За службу России» зыфиIохэрэр къыфагъэшъошагъэх. Илъэс 27-рэ къулыкъум хэтыгъ. Сабыищ иI.
Чэлэбый Мэджыд 1957-рэ илъэсым къэхъугъ. ПсэолъэшI сэнэхьатыр иIэу къулыкъум кIуа­гъэ. Мэджыдэ чIыдагъэ къызщычIащырэ чIыпIэу Казахстан щыIэм щылэжьагъ. Ащ ыуж Ростов МВД-м идзэ команднэ апшъэрэ училищэу дэтым къулыкъу щихьыгъ. Армениемрэ Азербайджанрэ зызэпэуцухэм, рэхьатныгъэм лъыплъэнхэу ащэгъагъэхэм Мэджыдэ ахэ­тыгъ. Бгъэхалъхьэхэр ащ къыщыфагъэшъошагъэх. Адыгеим къызегъэзэжьым, къулыкъум пи­дзэжьыгъ, бэ темышIэу Чэчэн Республикэм зэо-зэутэкIэу къа­щыхъугъэхэм агъэкIогъагъ. Гъэ­хъагъэу ышIыгъэхэм афэшI гъогогъу пчъагъэрэ медальхэмкIэ къыхагъэщыгъ. Илъэс 22-рэ ащ къулыкъу ыхьыгъ, джырэ уахътэм зегъэпсэфы.
ШэхэлI Вячеслав физическэ культурэм и Академиеу Краснодар дэтым спортымкIэ ифакультет къыухыгъ. Ащ ыуж участковэ инспекторэу Iоф ышIагъ, Адыгэ Республикэм и Федеральнэ миграционнэ къулыкъуи щылэжьагъ. ЯтIонэрэ апшъэрэ гъэсэныгъэ, юрист сэнэхьатыр, зэригъэгъотыгъ. Илъэс 22-м къыкIоцI зэо-зэу­тэкIхэр къызщыхъугъэ чIыпIэхэм ащыIэнэуи хъугъэ, Владикав­казрэ Чэчэнымрэ пIэлъэ гъэнэфагъэм къулыкъур ащихьыгъ. Гъэхъагъэу ышIыгъэхэр бгъэхалъхьэ зэфэшъхьафхэмкIэ къы­хагъэщыгъ.
2014-рэ илъэсым къалэу Шъачэ Олимпийскэ джэгунхэр зыщыкIогъэ уахътэм щынэгъончъэным щылъыплъагъэхэм Вячеслав ахэтыгъ. Ащ пае медальхэри Рэзэныгъэ тхылъэу Урысыем и Президент зыIапэ кIэдзагъэри къыфагъэшъоша­гъэх.
Дзэм дэгъоу къулыкъу щызыхьыгъэ тикIалэхэм янэ-ятэхэм зэрафэразэхэр къизыIотыкIырэ тхылъхэр къафагъэхьэу бэрэ къыхэкIыгъ. ГущыIэм пае, Хьагупэ Даур ыкIи Дамир, Хьагъур Мурат ыкIи Аскэр тилIэ­ужхэмкIэ щысэтехыпIэ хъугъэх.
Унэгъо дахэхэр тиIэх
Тикъоджэ цIыкIоу нэбгырэ 360-рэ нахьыбэ зыщымыпсэу­рэм унэгъо Iужъухэри дэсых. БлэкIыгъэ лIэшIэгъум ия 80-рэ илъэс­хэм унагъомэ сабыи 7 — 8-хэр къарыхъухьэщтыгъэх. Нахьыжъхэм ащыщэу къэнэ­жьыгъэр макIэ. Ахэм ащыщых Ацумыжъ Любэ, Ацумыжъ Фатимэт, Меркицкэ Раисэ, Хьатит Гощэунай, ШэхэлI Разиет. Мы бзылъфыгъэ­мэ аныбжь илъэс 80-м ехъугъ.
Тиунэгъо ныбжьыкIэхэми уарыгушхонэу щыт
Сабыи 3 — 5-р яIэх тибзылъ­фы­гъэ хъупхъэхэу Ацумыжъ Маринэ, Болэт Сабинэ, Нэпсэу Фатимэ, Мэджэс Саидэ, Хьа­гъур Оксанэ, Хэшх Сусанэ.
ТиныбжьыкIэхэм лъэшэу тащэгугъы. Ахэм ащыщхэм ацIэ къесIон.
Чэлэбый Рэмэзан дэгъу дэ­дэу еджапIэр къыухыгъ. Ащ чIэ­сызэ Дунэе пэIудзыгъэ олимпиадэу хьисапымкIэ зэхащагъэм апэрэ чIыпIэр къыщыдихыгъагъ.
Студентызэ апшъэрэ еджапIэ­хэм зэхащэрэ урысые ыкIи ду­нэе шIэныгъэ-практическэ кон­фе­ренциехэм ахэлажьэу ыуб­лагъ. Ащ фэдэ конференциеу Казахстан щыкIуагъэм апэрэ шъуашэ зиIэ дипломымрэ сертификатымрэ къыщыфагъэшъошагъэх.
Рээазан ыныбжь джыри ­илъэс 25-м нэсыгъэп, ау илэгъухэм къадэмыхъурэр къыдэ­хъугъ: шIэ­ныгъэ дэгъу зэрэIэ­кIэлъым гу къылъати, Тэхъутэмыкъое районым иадминист­рацие рагъэблэгъагъ, район пащэм иIэпыIэгъоу джырэ уахъ­тэм Iоф ешIэ.
Ацумыжъ Адам Налщык дэт университетыр къыухыгъ, исэнэхьаткIэ мэлажьэ.
ЛIыхэсэ Рэмэзан юрист сэ­нэхьатым феджагъ, магистратурэр къеухы. А сэнэхьат дэдэр зэрагъэгъоты Хьахъурэтэ Абрекрэ Цушъхьэ Абрекрэ. Дэгъу дэдэу еджагъ, програм­мист сэ­нэхьатыр зэригъэгъотыгъ Бо­лэт Астемыр.
Сэ, Хьахъурэтэ Светэ, культурэм илъэс 50-рэ Iоф щыс­шIагъ. Сэнэхьатыр джыри сицIы­кIугъом къыхэсхыгъагъ. Гъо­гогъу пчъагъэрэ СССР-м культурэмкIэ и Щытхъу тхылъхэр, медальхэу «Ветеран труда», «Ударник культармеец», «Пшызэ 75-рэ. Краснодар», «Адыгеим къэралыгъо гъэпсыкIэ зиIэр илъэси 100 хъугъэ» зыфиIохэрэр къысфагъэшъошагъэх, «АР-м культурэмкIэ изаслуженнэ IофышI» зыфиIорэ цIэ лъапIэри сэхьы, Адыгэ автоном хэкум культурэм иIофышIэхэм язэфэс мэкъэтынымкIэ фитыныгъэ сиIэу сыхэлэжьэгъагъ. Республикэ зэнэкъо­къоу «Къоджэ тхылъеджэпIэ анахь дэгъу» зыфиIорэм апэрэ шъуашэ зиIэ дипломыр къыщыдэсхыгъ. Сэкъатныгъэ зиIэхэр социальнэу ухъумэгъэнхэм фэгъэхьыгъэ зэнэкъокъум сызыхэ­лажьэм, къэралыгъо премие къыщысхьыгъ. Гъэхъагъэу сшIыгъэр зэкIэ сизэкъуагъэмэ къыз­дэхъущтыгъэп, сэ къоджэдэсхэм ахэр афэсэгъэхьых. СыдигъокIи сичылэгъухэр сиIэпыIэгъугъэх, сиIофшIэн уасэ къыфашIыгъ, бгъэхалъхьэхэр къысфашIыхэмэ, ахэр къыздэгушIощтыгъэх. Ахэм сызэрафэразэр къэсыушыхьатэу тарихъ тхылъэу «Трижды рожденный» зыфиIорэр къыдэзгъэкIыгъ. Къуаджэм имэфэкI мафэ сикъо­джэгъумэ зэкIэмэ тхылъхэр афэзгощыгъэх. Джырэ уахътэм сэ къэсылэжьыгъэ зыгъэпсэфыгъо уахътэр сэгъакIо. Тэхъутэмыкъое районым иадминистрацие ипэщагъэу Шъхьэлэхъо Азмэт, джырэкIэ ипащэу Шъао Аскэр, администрацием иIофхэмкIэ гъэIорышIакIоу Хьатит Симэ, Тэхъутэмыкъое къоджэ псэупIэм иадминистрацие иIофышIэ шъхьа­Iэхэу М. Х. Мышъэм ыкIи А. С. Нэужьырэкъом, культурэм игъэ­IорышIапIэ, заом ыкIи IофшIэным иветеранхэм я Совет, сэ­къат­ныгъэ зиIэхэм яобществэ ипащэу С. Х. Нэгъоим, зэкIэ сиIофшIэгъухэм сафэраз. Нэтыхъуае имэфэкI мафэкIэ тикъо­джэгъухэм сафэгушIо, ягухэлъхэр къадэ­хъунхэу сафэлъаIо!
Хьахъурэтэ Светлан.
Нэтыхъуай.