Джа цIэр зиIэ пэшIорыгъэшъ Iофтхьабзэ Адыгеим икъэралыгъо автоинспекторхэм инспектор ныбжьыкIэхэр (ЮИД) ягъусэхэу рагъэкIокIыгъ.

ЖъоныгъуакIэм и 15-р уна­гъом и Дунэе мафэу хагъэу­нэфыкIы, ащ къыдыхэлъы­тагъэу мы Iофтхьабзэр зэхащагъ. МэфэкIыр зыфэIоры­шIэхэрэм ащыщ унагъом иIо­фыгъохэм общественностым ынаIэ атыридзэныр. НепэкIэ Iофыгъоу къэуцухэрэм къахэгъэщыгъэн фае гъогурыкIоным ишапхъэхэр гъэцэкIэгъэнхэм имэхьанэ, сыда пIомэ кIэлэцIыкIухэм янэ-ятэхэм щысэ атырахы.
Илъэс къэс мы мафэм гъогу полицейскэхэм Iоф­тхьэ­бзэ зэфэшъхьафхэр зэхащэх. Мыекъопэ районым икъэралыгъо инспекторхэм ЮИД-р ягъусэхэу «Шапхъэхэр бгъэцакIэхэзэ, унагъор къэу­хъум!» зыфиIорэр рагъэкIо­кIыгъ.
Ар окIофэ, полицейскэхэм автомобильхэр къагъэуцухэзэ, кIэлэцIыкIухэм, водительхэм ыкIи ахэм къадисыгъэхэм мэфэкIымкIэ афэгушIуагъэх, къэнэфырэ пкъыгъохэр ыкIи сурэтшIыгъэ ромашкэхэр аратыгъэх. Къэгъагъэм итхьапэ пэпчъ гъогурыкIоныр щынэ­гъончъэным къызыщыфэ­джэхэрэ гущыIэхэр ныбжьыкIэхэм атыратхагъэх шIокI имыIэу щынэгъончъэ бгы­рыпхыр агъэфедэнэу, къапэ­благъэхэр, ягупсэхэр къау­хъумэнхэу.
Iофтхьабзэм хэлэжьагъэхэр зэкIэ ягуапэу, гушIохэзэ къя­дэIугъэх. Гъогум сакъыныгъэ къызщыхагъэфэнэу, япсау­ныгъи, ящыIэныгъи лъыплъэнхэу къагъэгугъагъэх.