КIэлэцIыкIухэм ягъэмэфэ зы­гъэпсэфыгъо уахътэ ипэгъокIэу Мыекъуапэ игурыт еджапIэу
N 2-м АР-м икъэралыгъо автоинспекторхэм Iофтхьабзэ щызэхащагъ.

ГъогурыкIоным ишапхъэхэр зэгъэшIэгъэнхэм ыкIи ныбжьыкIэхэр щынэгъончъэу гъогум зэрэщызекIощтхэ шIыкIэхэм ар афэгъэхьыгъагъ.
ЗэIукIэгъум хэлэжьагъэх гъогурыкIоныр щынэгъончъэнымкIэ Къэралыгъо автоинспекцием пропагандэмкIэ иотдел ипащэу Бзэджэжъыкъо Мурат ыкIи федеральнэ проектэу «Лаборатория без­опасности» зыфиIорэм илIыкIохэр.
Бзэджэжъыкъо Мурат кIэлэеджакIохэм зафигъазэзэ, гъогум сакъыныгъэ къызщыхагъэфэным, шIокI имыIэу шапхъэхэр агъэцэкIэнхэм къыфэджагъ ыкIи илъэс еджэгъур дэгъоу къаухынэу, псауныгъэ яIэнэу афэлъэIуагъ.
Нэужым «Лаборатория безопасности» зыфиIорэм илIыкIохэм ублэпIэ классхэм арысхэм зэдэгущыIэгъухэр адашIыгъэх. ЗэIукIэгъум анахьэу щызэхафыгъэхэм ащыщ амыгъэIорышIэрэ лъэсрыкIо зэпырыкIыпIэхэр зэрэзэпачыщтхэр. Ащ епхыгъэ шапхъэхэр икIэрыкIэу кIаджыкIыжьыгъэх.
Къэралыгъо автоинспекторхэм кIэлэ­еджакIохэм агу къагъэкIыжьыгъэхэм ащыщ мэзахэ зыхъукIэ къэнэфырэ пкъы­гъохэр ящыгъынхэм ахалъхьанхэ зэрэфаер. Джащ фэдэу ахэр автомобильхэмкIэ зэращэхэ зыхъукIэ хэушъхьа­фыкIыгъэ тIысыпIэр ыкIи щынэгъончъэ бгырыпхыр агъэфедэнхэр зыщагъэгъупшэ хъущтэп.
Полицием икъулыкъушIэхэр хэушъхьафыкIыгъэу къызщыуцугъэхэм ащыщ гъэмафэм кушъхьэфачъэхэр ыкIи СИМ-хэм ягъэфедэн жъугъэу къызэрежьэрэм дакIоу, ахэр зэрагъэIорышIэщтхэмкIэ шIэныгъэ икъу аIэкIэлъынэу зэрэщытыр. Гъогур — джэгупIэ чIыпIэп, ащ лъэшэу ущысакъын, тэрэзэу ущызекIон фае.
Къэшъо флешмобкIэ Iофтхьабзэр аухыгъ, ащ ягуапэу кIэлэцIыкIухэр хэлэ­жьагъэх.
Мыщ фэдэ пэшIорыгъэшъ Iофтхьа­бзэхэр джыри республикэм иеджапIэхэм ащызэхащэщтых.