Адыгеим икъэралыгъо автоинспекторхэм пэшIорыгъэшъ Iофтхьа­бзэу «КIэлэцIыкIу хэу­шъхьафыкIыгъэ тIысыпI» зыфиIорэр ра­гъэкIокIыгъ.

Ащ къыдыхэлъытагъэу гъогурыкIоным ишапхъэхэр гъогогъу 46-рэ аукъуагъэу къыхагъэщыгъ, ащ щыщэу 21-р кIэлэцIыкIухэр зэрэзэращэхэрэм епхыгъ.
ГъогурыкIоныр щынэгъон­чъэнымкIэ автоинспекцием и ГъэIорышIапIэ, хэушъхьафыкIыгъэ батальоным ыкIи взводым янарядхэм якъулыкъушIэхэр зэхэтхэу Iофтхьабзэр рагъэкIо­кIыгъ. ПстэумкIи инспектор 64-рэ ыкIи наряд куп 12-рэ ащ хэлэжьагъ.
ХэбзэухъумакIохэм автомобилистхэм зэдэгущыIэгъухэр адашIыгъэх. КIэлэцIыкIу хэушъ­хьафыкIыгъэ тIысыпIэр ыкIи щынэгъончъэ бгырыпхыр агъэ­фе­дэнэу зэрищыкIагъэр, сабый­хэр шапхъэхэм адимыштэу зэрэзэращэхэрэм тхьамыкIагъоу къыздахьыхэрэр къафаIотагъ.
Сабыйхэр гъогу хъугъэ-шIа­гъэм зыхафэхэкIэ, хэушъхьафыкIыгъэ тIысыпIэм зэриухъу­мэрэр агурагъэIуагъ. Джащ фэдэу зыныбжь илъэс 12 мы­хъугъэ кIэлэцIыкIур ащ фэдэ тIысыпIэм исэу зэрэзепщэн фаер водительхэм агу къагъэ­кIыжьыгъ.
Iофтхьабзэм икIэух шапхъэ­хэр зэрытхэгъэ гукъэгъэкIыжь тхьапэхэр хэлэжьагъэхэм афа­го­щыгъэх.