ТибэнакIохэр къахэщыгъэх
ДзюдомкIэ Ермэлхьаблэ щыкIогъэ зэнэкъокъухэм Адыгеим испортсменхэм медалибгъу къащахьыгъ. Къыблэ федеральнэ шъолъырым ичемпионат къэралыгъом исубъекти 8-мэ къарыкIыгъэ бэнэкIо 246-рэ хэлэжьагъ. Адыгеир къэзыгъэлъэгъуагъэр нэбгырэ 32-рэ.
Хъулъфыгъэхэм язэнэкъокъу тиреспубликэ илIыкIохэм медаль къызыщамыхьыгъэр килограмм 73-м нэс ыкIи 100-м ехъу къэзыщэчыхэрэм якупхэр ары. Дышъэ медаль къыдихыгъ Бэгъ Аслъан. ЯтIонэрэ хъугъэх Пэф Алыйрэ Джарымэкъо Долэтрэ. Ящэнэрэ чIыпIэхэр къафагъэшъошагъэх ЦIыкIу Рэмэзан, Еутых Рэмэзан, Датхъужь Алый, Малыщ Аскэр.
Бзылъфыгъэхэм язэнэкъокъу тиреспубликэ испортсменхэм тыжьын медалитIу къыщахьыгъ. Къахэщыгъэхэр Татьяна Шаталовамрэ Анастасия Коржовамрэ.
Чемпионатым хэлэжьэгъэ командэхэм ахэт нэбгырэ пчъагъэмкIэ Адыгеир ятIонэрэ хъугъэ. Краснодар краим нэбгыри 129-рэ къыгъэлъэгъуагъ, ахэм ащыщэу 32-мэ хагъэунэфыкIырэ чIыпIэхэр къыдахыгъэх.