ЕгъэшIэрэ щысэу тиIэщт!
Хэгъэгу зэошхом къыгъэлъэгъуагъэр цIыфхэм акIуачIэ зыкIыныгъэм къызэрэхэкIырэр, советскэ дзэкIолIмэ, цIыф къызэрыкIомэ япсэемыблэжьныгъэ фэдэ дунаим зэрэщымыхъугъэр, зэкъотхэу пыим зэдебэнхэзэ ТекIоныгъэр къызэрэдахыгъэр ары.
ЛIыхъужъныгъэу зы адыгэ унэгъо къызэрыкIо — Шъхьэлахъохэм яунагъо щыщхэм — зэрахьагъэм, Хэгъэгур къагъэгъунэнэу къуаджэу ШIоикъо дэкIыгъэхэу зы ным ишъэуибгъурэ къорэлъфищымрэ ыкIи язы нысэ (къэзыгъэзэжьыгъэхэр шъэуитIурэ къорэлъфитIурэ) бэрэ тегущыIагъэхэп.
Хэгъэгу зэошхом итарихъ щыщэу мы хъугъэ-шIагъэр зыгу къэкIыжьыщтыгъэр а унагъом иIахьылхэр ыкIи къоджэдэсхэр ары ныIэп. А лъэхъаным зэрэхэгъэгоу арагъэшIэгъагъ ыкIи щысэу къафахьыгъагъ нэмыкI унагъо — Пшызэ и Тимашевскэ район ит къутырэу Ольховскэм щыщ Епистиния Степановам — фашистмэ язаохэзэ фэхыгъэ шъэуи 8-мэ янэ. Советскэ Союзым илIэуж пчъагъэ ахэм ялIыхъужъныгъэ щысэ къафахьызэ къэхъугъэх — ныбжьыкIэмэ япатриотическэ пIуныгъэ къыдыхэлъытагъэу ахэм афэгъэхьыгъэ кинофильмхэр тырахыгъэх, тхылъхэр атхыгъэх. Степановхэр зыщыпсэущтыгъэхэм Епистиния Степановам имыжъосын къыщызэIуахыгъ, «Матьгероиня» зыфиIорэр къыфагъэшъошэгъагъ, Хэгъэгу зэошхом иорденэу а I-рэ шъуашэ зиIэр къыратыгъагъ, урамым ыкIи еджапIэм ащ ыцIэ афаусыгъагъ. Илъэс заулэкIэ узэкIэIэбэжьмэ, къэбар жъугъэм иамалхэм къащыхаутыгъэ тхыгъэхэм ыкIи общественностым яшIуагъэкIэ, тарихъым хэхьэгъэ дзэкIолIхэм янэу Шъхьэлэхъо Чэбэхъан Умарэ ыпхъум, зишъэуибгъу фронтым къимыкIыжьыгъэм, икъэбар зэрэ Краснодар краеу зэлъашIагъ.
Епистиния Степановам иадыгэ «шыпхъоу» Шъхьэлэхъо Чэбэхъан игугъу джы нахьыбэрэ ашIэу хъугъэ. Апэрэу ащ фэгъэхьыгъэ къэбарыр «Кубановедение» зыфиIорэ учебникыкIэм дагъэхьагъ, ублэпIэ классхэм ащеджэхэрэм зэрагъашIэ.
ТекIоныгъэм ия 75-рэ илъэс зыщыхагъэунэфыкIыгъэ уахътэм, ШIэжьымрэ Щытхъумрэ я Илъэс зыщагъэнэфэгъагъэм, лIыхъужъныгъэ зезыхьэгъэ адыгэ бзылъфыгъэм икъоджэ гупсэу ШIоикъо 2020-рэ илъэсым ишышъхьэIу мазэ и 15-м саугъэт щыфагъэуцугъ. Ащ фэгъэхьыгъэ зэхахьэм нэбгырэ шъэ пчъагъэ зэрищэлIэгъагъ: ветеранхэр, тылым щылэжьагъэхэр, лъэпкъ организацие зэфэшъхьафхэм ялIыкIохэр, гъунэгъу псэупIэхэм къарыкIыгъэхэр, чIыпIэ хэбзэ къулыкъухэм япащэхэр, Шъхьэлэхъо лIакъом щыщхэу Шъачэ, ТIопсэ районым ыкIи Адыгеим ащыпсэухэрэр.
Саугъэтым икъызэIухын къыщыгущыIагъэхэм къаIотагъ тинахьыжъхэм псэемыблэжьныгъэу къахэфагъэр, зышъхьамысыжьхэу фашист техакIомэ зэрябэныгъэхэр, ящыIэныгъэ атызэ ти Хэгъэгу къызэрагъэгъунагъэр, тылым щыIэхэми ТекIоныгъэр къызэрагъэблэгъагъэр, лIыхъужъныгъэ зезыхьэгъэ бзылъфыгъэхэу зилъфыгъэхэр фронтым зыгъэкIотагъэхэр егъэшIэрэ щысэу зэрэщытынхэ фаер. ДзэкIолI къызэрыкIохэм янэу Шъхьэлэхъо Чэбэхъан фагъэуцугъэ саугъэтым псэр атызэ мамырыр дунаим къызэрэфахьыгъэр ныбжьыкIэмэ агу къегъэкIыжьы, егъэгупшысэх.
…Чэбэхъан Умарэ ыпхъум сабый пшIыкIутф ыпIугъ ыкIи къыIэтыгъ: ежь иехэу шъэуихырэ пшъэшъищырэ, ишъхьэгъусэ апэрэ шъузэу иIагъэм къыкIэныгъэхэ кIэлиплIырэ пшъэшъитIурэ. Чэбэхъан цIыфышIоу, гушIубзыоу щытыгъ, игъашIэ сабыймэ япIун фигъэхьыгъ, зыкIи ахэр зэхидзыгъэхэп.
ИцIыкIугъом къыщегъэжьагъэу Чэбэхъан мэкъумэщышIэ лъапсэу иIэр ыгъэгъощагъэп, янэ-ятэмэ яунэ исы зэхъуми адэIэпыIэщтыгъ, шъофми унэгъо хъызмэтми ащылэжьагъ, хьалыгъу Iулъхьэм уасэу иIэр зыфэдэр ышIэу къэтэджыгъ.
Ежь къыдэмыхъугъэр — зэрэфаем фэдэу гъэсэныгъэ зэригъэгъотын зэримылъэкIыгъэр — икIалэхэм аритышъугъ: Шъхьэлахъомэ якIалэхэми япшъашъэхэми гъэсэныгъэ яIагъ.
КъызэраIотэжьырэмкIэ, Чэбэхъан Шапсыгъэ районым щыщ адыгэ бзылъфыгъэхэмкIэ апэрэу тхьамыкIэхэм якомитет хэхьэгъагъэмэ ащыщыгъ, къоджэ Советым хэтыгъ, ШIоикъо бзылъфыгъэхэм ясовети щызэхищэгъагъ. ЗэIукIэхэм бэрэ къащыгущыIэщтыгъ, гумэкIыгъохэм ягугъу ахэм къащишIыщтыгъ.
Къуаджэм щыщ нахьыжъмэ агу къэкIыжьы Чэбэхъан Iэзэным зэрэхишIыкIыщтыгъэр, къэкIырэ уцхэр ыгъэфедэхэзэ цIыфмэ зэряIазэщтыгъэр. Советскэ хабзэр къызщыдахыгъэ апэрэ илъэсхэм къуаджэм джыри IэзапIэ иIагъэп, а лъэхъаным сымаджэ хъухэрэр зэуалIэщтыгъэхэр Чэбэхъан ары. Шъхьэлахъохэм яунэ IэпыIэгъу лъыхъухэрэр, цIыкIуи ини, екIуалIэщтыгъэх.
Заор къызежьэм, Чэбэхъан икIалэхэр заом ыгъэкIуатэхэзэ ариIуагъ «ныр къамыушъхьакIунэу, псэемыблэжьэу зэонхэу, пыир агъэтэкъонэу».
ИкIэлибгъу зэрэщымыIэжьым фэгъэхьыгъэ тхыгъэхэр къызIукIэгъэ Чэбэхъанэу лIыхъужъныгъэшхо зезыхьагъэм лъытэныгъэшхо фашIызэ къоджэдэсмэ агу къэкIыжьы.
Шъхьэлэхъо Осмэн, танкист, Житомир дэжь заом щыхэкIодагъ. Аюб, артиллерист, Севастополь иухъумакIу, 1941-рэ илъэсым фэхыгъэ. Хъусен 1942-рэ илъэсым Армавир щыхэкIодагъ. Джамбот, Москва къэзгъэгъунэрэмэ ахэтыгъ, уIагъэхэм 1942-рэ илъэсым арылIыкIыгъ. Аскэрбый, 1941-рэ илъэсым Москва щыкIогъэ Парадым хэлэжьагъ, уIагъэу тещагъэхэм 1942-рэ илъэсым арылIыкIыгъ. Аталахь Мэздэгу дэжь щыфэхыгъ. Хьасан — ЧIыгу Залэм илIыхъужъхэм ащыщ — 1943-рэ илъэсым уIагъэхэм арылIыкIыгъ. Шъхьэлэхъо Фаинэ (Афанасьевар), Аскэрбый ишъхьэгъусэ, медицинэ къулыкъум имладшэ сержант, Севастополь къыгъэгъунэзэ бэдзэогъум и 2-м, 1942-рэ илъэсым фэхыгъэ.
ТхьамыкIагъоу къыфэкIуагъэр ным ыгу фэщэчыгъэп — шышъхьэIум и 14-м, 1943-рэ илъэсым Шъхьэлэхъо Чэбэхъан игъонэмысэу дунаим ехыжьыгъ. Ар зыщагъэтIылъыгъэ мафэм джыри изы кIалэу Хьасан зэрэщымыIэжьым фэгъэхьыгъэ къэбар гомыIур ШIоикъо къаIопщыгъ. Ар ТIуапсэрэ Къырымрэ къыухъумэхэзэ ауIэгъагъ, Краснодар дэтыгъэ госпиталым ыпсэ щыхэкIыгъ. Джыри Шъхьэлахъохэм язы кIалэ — Хьаджрэт — янэ зыщымыIэжьым мазэ нахь темышIагъэу Украинэм щыхэкIодагъ.
ХыIушъо шапсыгъэмэ я Адыгэ Хасэ иобщественникхэм, Шъхьэлэхъо лIакъом ыкIи ШIоикъо щыпсэухэрэм игъоу алъэгъугъ лIыхъужъныгъэ зезыхьэгъэ дзэкIолIмэ янэу Шъхьэлэхъо Чэбэхъан фэгъэхьыгъэ мыжъосын ТIуапсэ щыгъэуцугъэныр, шъхьэкIэфэныгъэшхо Ным зэрэфашIырэм, апсэ емыблэжьхэу фашизмэм текIогъэ лIэужхэм яшыхьатэу ар хъунэу алъытэ.
Ныбэ Анзор.
Сурэтыр авторым ихъарзынэщ къыхэхыгъ.